இந்திய லிஸ்ட் ஏ கிரிக்கெட் வரலாற்றில் முதல்முறை; ஆல்ரவுண்டர் ஷஷாங்க் சிங் சாதனை
செய்தி முன்னோட்டம்
விஜய் ஹசாரே கோப்பையில் சத்தீஸ்கர் கிரிக்கெட் அணி புதன்கிழமை (நவம்பர் 29) மணிப்பூரை எதிர்கொண்டு 88 ரன்கள் வித்தியாசத்தில் அபார வெற்றி பெற்றது.
இந்த போட்டியில் முதலில் பேட்டிங் செய்த சத்தீஸ்கர் 50 ஓவர்களில் 6 விக்கெட் இழப்பிற்கு 342 ரன்கள் குவித்தது. சத்தீஸ்கர் அணியின் ஆல்ரவுண்டர் ஷஷாங்க் சிங் 152 ரன்களும், கேப்டன் அமன்தீப் கார் 88 ரன்களும் எடுத்தனர்.
கடினமான இலக்குடன் களமிறங்கிய மணிப்பூர் 50 ஓவர்களில் 9 விக்கெட் இழப்பிற்கு 254 ரன்கள் மட்டுமே எடுத்து தோல்வியைத் தழுவியது.
மணிப்பூரின் பிரபுல்லோமணி சிங் 67 ரன்களும், லாங்லோனியாம்பா கெய்ஷாங்பாம் 61 ரன்களும் எடுத்தனர். சத்தீஸ்கர் ஆல்ரவுண்டர் ஷஷாங்க் சிங் 5 விக்கெட்டுகளை வீழ்த்தினார்.
Shashank Singh creates new record in List A cricket
சர்வதேச அளவில் மூன்றாவது வீரராக சாதனை படைத்த ஷஷாங்க் சிங்
மேலே குறிப்பிட்டுள்ளபடி சத்தீஸ்கர் ஆல்ரவுண்டர் ஷஷாங்க் சிங் சதமடித்து 152 ரன்கள் எடுத்ததோடு, சிறப்பாக பந்துவீசி 5 விக்கெட்டுகளை கைப்பற்றினார்.
இதன் மூலம் அணியின் வெற்றிக்கு முக்கிய பங்கு வகித்ததோடு, லிஸ்ட் ஏ கிரிக்கெட்டில் ஒரு போட்டியில் 150 ரன்கள் எடுத்ததோடு, 5 விக்கெட்டுகளை வீழ்த்தி இரட்டை சாதனை படைத்த முதல் இந்தியர் ஆனார்.
மேலும், சர்வதேச அளவில் இந்த சாதனையை செய்த மூன்றாவது வீரராகவும் ஆனார்.
இதற்கு முன்னதாக, வெஸ்ட் இண்டீஸ் ஜாம்பவான் ஆல்வின் கல்லிச்சரண் (206 ரன்கள், 6 விக்கெட்டுகள்) மற்றும் மைக் ப்ராக்டர் (154* ரன்கள், 5 விக்கெட்டுகள்) ஆகியோர் மட்டுமே லிஸ்ட் ஏ கிரிக்கெட்டில் இந்த சாதனையை படைத்துள்ளனர்.