கொல்கத்தாவில் எல் கிளாசிகோ: ரியல் மாட்ரிட் லெஜண்ட்ஸ் - பார்சிலோனா லெஜண்ட்ஸ் அணிகள் மோதல்
செய்தி முன்னோட்டம்
இந்தியக் கால்பந்தின் தலைநகரான கொல்கத்தாவில் உள்ள புகழ்பெற்ற சால்ட் லேக் மைதானத்தில், உலகின் முன்னணி கால்பந்து கிளப் அணிகளான ரியல் மாட்ரிட் லெஜண்ட்ஸ் மற்றும் பார்சிலோனா லெஜண்ட்ஸ் அணிகள் மோதும் எல் கிளாசிகோ காட்சிப் போட்டி வரும் நவம்பர் 25 அன்று நடைபெறவுள்ளது. அண்மையில் ஐந்து முறை உலக சாம்பியனான பிரேசில் அணியை எதிர்த்து இந்திய அணி களம் கண்ட மிகப்பெரிய வரலாற்றுப் போட்டியை நடத்திய அதே மைதானத்தில், அடுத்த ஒரு மாதத்திற்குள் சர்வதேச கால்பந்தின் ஜாம்பவான்கள் நேருக்கு நேர் மோதும் மற்றொரு விருந்து ரசிகர்களுக்குக் கிடைக்கவுள்ளது. இந்த அறிவிப்பை மேற்கு வங்க விளையாட்டுத் துறை அமைச்சர் தனது சமூக வலைத்தள பக்கத்தில் அதிகாரப்பூர்வமாக உறுதிப்படுத்தியுள்ளதால் கால்பந்து ரசிகர்கள் உற்சாகமடைந்துள்ளனர்.
முந்தைய போட்டிகள்
களமிறங்கும் முன்னணி நட்சத்திரங்கள்
இப்போட்டிக்கான அதிகாரப்பூர்வ அணி வீரர்கள் பட்டியல் இன்னும் வெளியிடப்படவில்லை என்றாலும், கால்பந்து உலகின் மாபெரும் ஆளுமைகளான லூயிஸ் பிகோ, கார்லஸ் புயோல், ஐகர் கேசில்லஸ் உள்ளிட்ட நட்சத்திர வீரர்கள் இப்போட்டியில் பங்கேற்பார்கள் எனப் பெரிதும் எதிர்பார்க்கப்படுகிறது.
ஸ்பெயின் நாட்டின் இருபெரும் பலம் வாய்ந்த அணிகள் இந்தியாவில் காட்சிப் போட்டியில் மோதுவது இது இரண்டாவது முறையாகும்.
முன்னதாக மும்பையில் நடந்த போட்டியில் ரியல் மாட்ரிட் லெஜண்ட்ஸ் அணி 2-0 என வென்றது. மேலும், இவ்விரு அணிகள் மோதிய சமீபத்திய ஆட்டம் 1-1 என சமனில் முடிந்தது.
இந்நிலையில், கடந்த 2018-ல் கொல்கத்தாவில் மோகன் பகானை 6-0 என வீழ்த்திய பார்சிலோனா அணி, தற்போது மீண்டும் அங்கு களம் காண்கிறது.
நட்புப் போட்டிகள்
கொல்கத்தாவின் நீண்டகால கால்பந்து பாரம்பரியம்
வரவிருக்கும் இந்த எல் கிளாசிகோ போட்டி கொல்கத்தாவின் புகழ்பெற்ற கால்பந்து வரலாற்றுக்குப் பெருமை சேர்க்கும் மற்றொரு மைல்கல்லாக அமையவுள்ளது.
கடந்த 1977-ஆம் ஆண்டு ஈடன் கார்டன்ஸ் மைதானத்தில் நியூயார்க் காஸ்மோஸ் அணியை வழிநடத்தி பிரேசில் ஜாம்பவான் பீலே மோகன் பகானுக்கு எதிராக விளையாடினார்.
அதன் பிறகு 2008-ல் ஜெர்மனியின் பேயர்ன் முனிச் அணியும், 2011-ல் அர்ஜென்டினா அணியின் நட்சத்திர நாயகன் லியோனல் மெஸ்ஸி வெனிசுலாவுக்கு எதிராகக் களம் கண்ட போட்டியும் இதே சால்ட் லேக் மைதானத்தில்தான் அரங்கேறின.
சமீபத்தில் பிரேசில் மற்றும் உருகுவே அணிகள் பங்கேற்ற சர்வதேச நட்புப் போட்டிகளைத் தொடர்ந்து, தற்போது ரியல் மாட்ரிட் மற்றும் பார்சிலோனா லெஜண்ட்ஸ் அணிகளின் மோதல் கொல்கத்தாவை மீண்டும் உலகக் கால்பந்து வரைபடத்தில் தலைநிமிரச் செய்துள்ளது.
embed
Twitter Post
El Clásico Loading..#Barcelona Legends vs #RealMadrid Legends.. November 25, 2026 Vivekananda Yuva Bharati Krirangan, #Kolkata pic.twitter.com/otLcLJUM28— Dr.Indranil Khan (@IndranilKhan) October 13, 2026