சென்சார் சிக்கலில் ரவி மோகனின் கராத்தே பாபு: படம் வெளியாவதில் தாமதம் ஏற்பட வாய்ப்பு
செய்தி முன்னோட்டம்
டாடா திரைப்படத்தின் பிரம்மாண்ட வெற்றியைத் தொடர்ந்து இயக்குநர் கணேஷ் கே பாபு இயக்கத்தில், நடிகர் ரவி மோகன் (ஜெயம் ரவி) நடிப்பில் உருவாகியுள்ள புதிய திரைப்படமான கராத்தே பாபு, தணிக்கைக் குழுவின் தீவிர ஆய்வில் சிக்கியுள்ளது. முழுக்க முழுக்க அரசியல் நையாண்டி கதைக் களத்தை கொண்டு உருவாக்கப்பட்டுள்ள இப்படத்தில், நிஜ வாழ்க்கை அரசியல் தலைவர்களை விமர்சிக்கும் வகையிலான பல சர்ச்சைக்குரிய காட்சிகள் இடம்பெற்றிருப்பதாகக் கூறப்படுகிறது. இதனால் சுமார் 20 நாட்களுக்கு முன்பு படத்தைப் பார்த்த தணிக்கைக் குழுவினர் அதிர்ச்சியடைந்து, இப்படத்தை மறுஆய்வுக் குழுவுக்கு அனுப்பி வைத்துள்ளதாகத் தகவல்கள் தெரிவிக்கின்றன.
சர்ச்சை காட்சிகள்
நிஜ அரசியல்வாதியின் பின்னணியும் சர்ச்சை காட்சிகளும்
இப்படத்தின் கதாநாயகன் கதாபாத்திரம் தமிழகத்தின் நிஜ வாழ்க்கை அரசியல்வாதியான எம்.எல்.ஏ. சேகர்பாபுவின் வாழ்க்கையை மையமாகக் கொண்டு உருவாக்கப்பட்டிருப்பதாகக் கோலிவுட் வட்டாரங்களில் பேசப்படுகிறது.
மேலும் தற்போதைய அரசியல் சூழலில் உள்ள பல முக்கியப் புள்ளிகளை நேரடியாகத் தாக்கும் வகையிலான வசனங்களும் காட்சிகளும் படத்தில் தாராளமாக வைக்கப்பட்டுள்ளதாகத் தெரிகிறது.
வழக்கமான திரைப்படத் தணிக்கையைக் கடந்து, அரசியல்ரீதியான நேரடிக் குறிப்புகள் அதிகளவில் காணப்படுவதால், சென்சார் போர்டு இதற்கு எளிதில் அனுமதி வழங்கத் தயங்கி வருகிறது.
ரிலீஸ் தள்ளிவைப்பு
தொடரும் சென்சார் தாமதம்
தணிக்கைத் துறையின் இந்தத் தீவிர மறுஆய்வு நடைமுறைகள் மற்றும் சட்டரீதியான சிக்கல்கள் காரணமாகப் படத்தின் சான்றிதழ் பெறுவதில் பெரும் காலதாமதம் ஏற்பட்டுள்ளது.
இதன் விளைவாக, நடப்பு ஆண்டிலேயே திரைக்கு வரவிருந்த கராத்தே பாபு படத்தின் வெளியீடு தள்ளிப்போகும் சூழல் உருவாகியுள்ளதுடன், ஒருவேளை ரிலீஸ் 2027-ஆம் ஆண்டு வரை கூட நீட்டிக்கப்படலாம் என்று திரைத்துறை வட்டாரங்கள் தெரிவிக்கின்றன.
அரசியல் நையாண்டிப் படங்களுக்குத் தணிக்கை வாரியம் விதிக்கும் கடுமையான கட்டுப்பாடுகள், தற்போது தமிழ் சினிமா ரசிகர்கள் மற்றும் சமூக வலைத்தளங்களில் விவாதத்தைக் கிளப்பியுள்ளது.