இந்தியன் 3 பொங்கல் ரிலீஸ்; தள்ளிப்போகிறதா ரஜினிகாந்தின் தர்மன் திரைப்படம்?
செய்தி முன்னோட்டம்
உலகநாயகன் கமல் ஹாசன் நடிப்பில் இயக்குநர் ஷங்கர் இயக்கியுள்ள 'இந்தியன் 3' திரைப்படம் எதிர்வரும் பொங்கல் பண்டிகையை முன்னிட்டு திரையரங்குகளில் வெளியாக திட்டமிடப்பட்டு வருவதாகத் திரையுலக வட்டாரங்களில் தகவல் கசிந்துள்ளது. தயாரிப்பு நிறுவனமான லைகா புரொடக்ஷன்ஸ், எஞ்சியுள்ள 15 நாள் படப்பிடிப்பை விரைந்து முடித்து, ஏற்கனவே படமாக்கப்பட்ட காட்சிகளுடன் இணைத்துப் பொங்கல் விருந்தாக வெளியிடத் தீவிர முனைப்பு காட்டி வருகிறது. இதன் காரணமாக, பொங்கலுக்கு வெளியாகவிருந்த சூப்பர் ஸ்டார் ரஜினிகாந்தின் 'தர்மன்' திரைப்படம் ஏப்ரல் 30-ஆம் தேதிக்கு ஒத்திவைக்கப்படலாம் எனக் கூறப்படுகிறது.
வாரணாசி
ராஜமௌலியின் 'வாரணாசி' தாக்கமும் ரிலீஸ் தேதியும்
முதலில் தமிழ்ப் புத்தாண்டு தினமான ஏப்ரல் 14 அன்று 'தர்மன்' படத்தை வெளியிடப் படக்குழு ஆலோசித்ததாகக் கூறப்பட்டது.
ஆனால், எஸ்.எஸ். ராஜமௌலி இயக்கத்தில் மகேஷ் பாபு நடிக்கும் பிரம்மாண்ட படைப்பான 'வாரணாசி' திரைப்படம் ஏப்ரல் 7 அன்று திரைக்கு வரவுள்ளது.
தொடக்க இரண்டு வாரங்களுக்கு பெரும்பாலான திரையரங்குகளை முன்பதிவு ஒப்பந்தங்கள் மூலம் 'வாரணாசி' தன்வசப்படுத்தும் சூழல் உள்ளதால், ரஜினியின் 'தர்மன்' படத்தை ஏப்ரல் 30-ஆம் தேதிக்குத் தள்ளிவைப்பது குறித்துப் பரிசீலிக்கப்பட்டு வருவதாகத் தெரிகிறது.
தர்மன் படக்குழு
இறுதி முடிவு தயாரிப்பு நிறுவனத்தின் கையில்
இந்தியன் 3 திரைப்படத்தின் இறுதிக்கட்டப் பணிகள் முழுவீச்சில் நடைபெற்று வருவதை லைகா புரொடக்ஷன்ஸ் அண்மையில் உறுதிப்படுத்தியிருந்தாலும், அதிகாரப்பூர்வ ரிலீஸ் தேதியை இதுவரை வெளியிடவில்லை.
அதேபோல், ரஜினிகாந்தின் 'தர்மன்' படக்குழுவினரும் தங்களது வெளியீட்டுத் திட்டங்களை அதிகாரப்பூர்வமாக இன்னும் உறுதிப்படுத்தவில்லை.
தமிழ் சினிமாவின் இருபெரும் ஆளுமைகளான ரஜினி மற்றும் கமல் ஹாசன் படங்களின் வெளியீட்டுத் தேதிகள் மற்றும் பான்-இந்தியா மோதல்கள் குறித்த இந்தத் திரைத் தகவல்கள் கோலிவுட் வட்டாரங்களில் மிகப்பெரிய எதிர்பார்ப்பையும் விவாதத்தையும் ஏற்படுத்தியுள்ளன.