15 வயதில் சாதனை! ISSF ஜூனியர் உலகக்கோப்பை ஷாட்கன் போட்டியில் இந்தியாவின் யுகன் சக்திவேல் தங்கம் வென்று அசத்தல்
செய்தி முன்னோட்டம்
இத்தாலியின் போர்பெட்டோ நகரில் நடைபெற்று வரும் ISSF ஜூனியர் உலகக்கோப்பை ஷாட்கன் 2026 துப்பாக்கிச் சுடுதல் போட்டியில், இந்தியாவின் 15 வயது இளம் வீரர் யுகன் சக்திவேல் முத்துகுமார் தங்கப் பதக்கம் வென்று பிரமாண்ட சாதனை படைத்துள்ளார். வெள்ளிக்கிழமை நடைபெற்ற ஆண்களுக்கான டிராப் (Men's Trap) பிரிவின் இறுதிப் போட்டியில் மிகச்சிறப்பாக செயல்பட்ட அவர், இந்தியாவிற்கான முதல் பதக்கத்தை உறுதி செய்தார். கூடுதல் விபரங்கள் இங்கே:-
இறுதிப் போட்டி
இறுதிப் போட்டியில் இத்தாலி வீரரை வீழ்த்தி பெற்ற வரலாற்று வெற்றி
8 வீரர்கள் பங்கேற்ற விறுவிறுப்பான இறுதிச் சுற்றில், 15 வயதான யுகன் சக்திவேல் 30 இலக்குகளில் 27 இலக்குகளை சரியாக சுட்டு முதலிடத்தைப் பிடித்தார்.
இத்தாலியின் பிரான்செஸ்கோ டான்போக்லியோவை வெறும் 1 புள்ளி வித்தியாசத்தில் வீழ்த்தி யுகன் தங்கப் பதக்கத்தை கைப்பற்றினார்.
முன்னதாக தகுதிச் சுற்றில் 114/125 புள்ளிகளுடன் 6-வது இடம் பிடித்த அவர், ஷூட்-ஆஃப் சுற்று மூலம் இறுதிப் போட்டிக்குத் தகுதி பெற்றிருந்தார் என்பது குறிப்பிடத்தக்கது.
மகளிர் பிரிவு
மகளிர் பிரிவு மற்றும் பிற இந்திய வீரர்களின் செயல்பாடுகள்
மகளிருக்கான டிராப் பிரிவில் ஜூனியர் ஆசிய சாம்பியனான இந்தியாவின் சபீரா ஹாரிஸ் தகுதிச் சுற்றில் 108 புள்ளிகளுடன் ஆறாவது இடத்தைப் பிடித்து இறுதிப் போட்டிக்கு முன்னேறினார்.
ஆனால் இறுதிச் சுற்றில் 15 இலக்குகளில் 9-ஐ மட்டுமே சுட்டு 6-வது இடத்தைப் பிடித்தார்.
ஆண்களுக்கான தகுதிச் சுற்றில் பிற இந்திய வீரர்களான அர்ஜுன் 12-வது இடத்தையும், வினய் பிரதாப் சிங் 13-வது இடத்தையும், உத்தவ் சிங் ரத்தோர் 16-வது இடத்தையும் பிடித்தனர்.
பதக்கங்கள்
தொடரின் இறுதிப் போட்டி மற்றும் இந்தியாவின் பதக்கக் கணக்கு
நடப்பு ஆண்டின் இரண்டாவது ஜூனியர் உலகக்கோப்பைத் தொடரான இப்போட்டியில், முன்னதாக எகிப்தின் கெய்ரோவில் நடைபெற்ற முதலாவது தொடரில் இந்தியா 5 தங்கம் உட்பட 16 பதக்கங்களை வென்று பதக்கப் பட்டியலில் முதலிடம் பிடித்திருந்தது.
போர்பெட்டோ தொடரானது சனிக்கிழமை நடைபெறவுள்ள ஜூனியர் மிக்ஸ்டு டீம் டிராப் (Junior Mixed Team Trap) போட்டியுடன் நிறைவடைகிறது.
இதில் இந்திய அணி மேலும் ஒரு பதக்கத்தைக் கைப்பற்றும் என எதிர்பார்க்கப்படுகிறது.