மும்பை இந்தியன்ஸ் vs ராயல் சேலஞ்சர்ஸ் பெங்களூர் : பிளேஆப் வாய்ப்பை தக்கவைக்கப்போவது யார்?
ஐபிஎல் 2023 தொடரின் 54வது போட்டியில் செவ்வாய்க்கிழமை (மே 9) மும்பை இந்தியன்ஸ் மற்றும் ராயல் சேலஞ்சர்ஸ் பெங்களூர் அணிகள் மும்பை வான்கடே மைதானத்தில் மோதுகின்றன. நடப்பு ஐபிஎல் சீசனில் ராயல் சேலஞ்சர்ஸ் பெங்களூர் மற்றும் மும்பை இந்தியன்ஸ் அணிகள் 10 போட்டிகளில் விளையாடியுள்ள நிலையில், தலா 5 வெற்றி மற்றும் தோல்விகளுடன் புள்ளிப் பட்டியலில் ஐந்து மற்றும் ஆறாவது இடங்களில் உள்ளன. லீக் போட்டிகள் இறுதிக்கட்டத்தை நெருங்கி வரும் நிலையில், இரு அணிகளுமே பிளே ஆப் வாய்ப்பை தக்கவைக்க இந்த போட்டியில் வெற்றி பெறுவது முக்கியம் என்பதால் போட்டியில் பரபரப்புக்கு பஞ்சமிருக்காது என எதிர்பார்க்கப்படுகிறது.
போட்டியில் வீரர்கள் எட்ட வாய்ப்புள்ள மைல்ஸ்டோன்கள்
இஷான் கிஷன் ஐபிஎல்லில் 100 சிக்சர்கள் எனும் மைல்கல்லை எட்ட இன்னும் 4 சிக்சர்கள் தேவை. சூர்யகுமார் யாதவ் 63 ரன்களை எடுத்தால் ஐபிஎல்லில் 3,000 ரன்கள் எனும் மைல்கல்லை எட்டுவார். மேலும் ஐபிஎல்லில் 100 சிக்சர்களை எட்ட, இன்னும் 4 சிக்சர்கள் அடிக்க வேண்டும். ரோஹித் ஷர்மா ஐபிஎல் வரலாற்றில் இரண்டாவது அதிக சிக்சர் அடித்த வீரர் என்ற சாதனை படைக்க இன்னும் 2 சிக்சர்கள் தேவை. மேலும் ஐபிஎல்லில் ஃபீல்டராக 100 கேட்சுகளை எடுத்த நான்காவது வீரர் என்ற சாதனையை படைக்க இன்னும் 2 கேட்சுகள் தேவை. ஃபாஃப் டு பிளெசிஸ் 86 ரன்கள் எடுத்தால் ஐபிஎல்லில் 4,000 ரன்கள் எனும் மைல்கல்லை எட்டுவார்.
