ஐசிசி மகளிர் U-19 டி20 உலகக்கோப்பை : இங்கிலாந்தை வீழ்த்தி சாம்பியனானது இந்தியா!
ஐசிசி மகளிர் U-19 டி20 முதல் உலகக் கோப்பையை ஞாயிற்றுக்கிழமை (ஜனவரி 29) இந்திய அணி வென்றது. இறுதிப்போட்டியில் டாஸ் வென்று பந்துவீச்சைத் தேர்வுசெய்த இந்தியா, இங்கிலாந்தை வெறும் 68 ரன்களுக்கு ஆட்டமிழக்கச் செய்தது. இந்திய பந்துவீச்சாளர்கள் அனைவருமே சிறப்பாக செயல்பட்டாலும், டைட்டாஸ் சாது 4 ஓவர்களில் வெறும் 6 ரன்களை மட்டும் கொடுத்து 2 விக்கெட்டுகளை கைப்பற்றினார். இங்கிலாந்து தரப்பில் மிடில் ஆர்டர் வீரர் ரியானா மெக்டொனால்ட் கே (19) அதிக ரன் எடுத்தார். பின்னர், சௌமியா திவாரி (24*) மற்றும் கோங்காடி த்ரிஷா (24) ஆகியோரின் அசத்தல் ஆட்டத்தால் 7 விக்கெட் வித்தியாசத்தில் கோப்பையை வென்றது.
ஐசிசி போட்டிகளில் இந்திய மகளிருக்கான முதல் கோப்பை
U-19 டி20 உலகக் கோப்பையின் முதல் சீசனான இதில், இந்திய மகளிர் அணி கோப்பையை கைப்பற்றியுள்ளனர். ஐசிசி நடத்தி வரும் எந்த ஒரு மகளிர் அணிக்கான தொடர்களிலும், இந்தியா பெறும் முதல் கோப்பை இதுவாகும். மேலும், ஒருநாள், டி20 என எந்த ஒரு கிரிக்கெட் வடிவத்திலும், ஐசிசி உலகக் கோப்பையை வென்ற முதல் ஆசிய மகளிர் அணி என்ற பெருமையையும், இதன் மூலம் இந்தியா பெற்றுள்ளது. இதற்கிடையே, U-19 டி20 உலகக் கோப்பை தொடரின் முதல் சீசனில் அதிக ரன் குவித்த வீராங்கனையாக இந்தியாவின் ஸ்வேதா செஹ்ராவத் திகழ்கிறார்.
