ஐபிஎல் 2026: 4வது அரைசதத்துடன் ஆட்டநாயகன் விருது வென்ற ஹென்ரிச் கிளாசன்! மும்பையை வீழ்த்திய ஹைதராபாத்
செய்தி முன்னோட்டம்
ஐபிஎல் 2026 தொடரில் மும்பை இந்தியன்ஸ் அணிக்கு எதிரான ஆட்டத்தில், சன்ரைசர்ஸ் ஹைதராபாத் அணி 244 ரன்கள் என்ற இமாலய இலக்கை வெற்றிகரமாகத் துரத்திப் பிடித்தது. எட்டு பந்துகள் மீதமிருந்த நிலையில் 6 விக்கெட் வித்தியாசத்தில் ஹைதராபாத் அணி இந்த அபார வெற்றியைப் பதிவு செய்தது. இந்த வெற்றியின் மூலம் ஹைதராபாத் அணி புள்ளிப்பட்டியலில் மூன்றாவது இடத்திற்கு முன்னேறியதுடன், நடப்புத் தொடரில் தனது ஐந்தாவது தொடர் வெற்றியை உறுதி செய்துள்ளது.
ஹென்ரிச் கிளாசன்
கிளாசனின் அதிரடி ஆட்டம் மற்றும் அரைசதம்
இந்த ஆட்டத்தில் ஹென்ரிச் கிளாசன் 30 பந்துகளில் 65 ரன்கள் எடுத்து இறுதிவரை ஆட்டமிழக்காமல் இருந்தார். இதில் 7 பவுண்டரிகள் மற்றும் 4 சிக்ஸர்கள் அடங்கும். 216.67 என்ற ஸ்டிரைக் ரேட்டில் விளையாடிய அவர், இந்த சீசனில் தனது 4வது அரைசதத்தைப் பதிவு செய்தார். ஐபிஎல் தொடரில் இது அவருக்கு 11வது அரைசதமாகும். அவரது இந்தச் சிறப்பான அதிரடி ஆட்டத்திற்காக அவருக்கு ஆட்டநாயகன் விருது வழங்கப்பட்டது.
அபார சேஸிங்
ஹைதராபாத் அணியின் இமாலய இலக்கு வேட்டை
244 ரன்கள் என்ற கடினமான இலக்கை நோக்கி ஆடிய ஐதராபாத் அணிக்கு, அபிஷேக் சர்மா மற்றும் டிராவிஸ் ஹெட் ஜோடி பவர்-பிளேயில் மட்டும் 92 ரன்களைக் குவித்து மின்னல் வேகத் தொடக்கத்தை அளித்தது. ஹெட் 19 பந்துகளில் 48 ரன்களும், அபிஷேக் 17 பந்துகளில் 36 ரன்களும் எடுத்தனர். பின்னர் களமிறங்கிய கிளாசன், நிதீஷ் ரெட்டியுடன் இணைந்து 80 ரன்கள் பார்ட்னர்ஷிப் அமைத்து அணியை வெற்றிக்கு மிக அருகில் அழைத்துச் சென்றார். இறுதியில் சலில் அரோரா 10 பந்துகளில் 30* ரன்கள் விளாசி வெற்றியை உறுதி செய்தார்.
புள்ளிவிவரங்கள்
கிளாசனின் புள்ளிவிவரங்கள் மற்றும் சாதனைகள்
இந்த சீசனில் 414 ரன்களைக் கடந்துள்ள கிளாசன், அதிக ரன்கள் எடுத்தவர்கள் பட்டியலில் தற்போது இரண்டாவது இடத்தில் உள்ளார். மேலும், சன்ரைசர்ஸ் ஹைதராபாத் அணிக்காகத் தொடர்ந்து 4-வது சீசனாக 400 ரன்களுக்கு மேல் எடுத்து அவர் சாதனை படைத்துள்ளார். ஒட்டுமொத்த டி20 போட்டிகளில் 6,600 ரன்களைக் கடந்துள்ள அவர், தனது 41வது டி20 அரைசதத்தை இந்தப் போட்டியில் பதிவு செய்துள்ளார். 58 ஐபிஎல் போட்டிகளில் விளையாடியுள்ள கிளாசன், 43.04 சராசரியுடன் 1,894 ரன்களை எட்டியுள்ளார்.
எஸ்ஆர்எச்
ஹைதராபாத் அணியின் எழுச்சி
ஹைதராபாத் அணி தற்போது 12 புள்ளிகளுடன் புள்ளிப்பட்டியலில் வலுவான நிலையில் உள்ளது. தொடர்ச்சியான ஐந்து வெற்றிகள் அந்த அணியின் தன்னம்பிக்கையை அதிகரித்துள்ளன. அபிஷேக் சர்மா 425 ரன்களுடன் ஆரஞ்சு தொப்பியைத் தக்கவைத்துக் கொண்டுள்ளார். மறுபுறம், மும்பை இந்தியன்ஸ் அணி தனது 8 போட்டிகளில் 6 தோல்விகளுடன் ஒன்பதாவது இடத்திலேயே நீடிக்கிறது. வான்கடே மைதானத்தில் நடைபெற்ற இந்த ரன் மழையிலான ஆட்டம் ரசிகர்களுக்கு மிகப்பெரிய விருந்தாக அமைந்தது.