மகளிர் ஐபிஎல் 2023 : மும்பை இந்தியன்ஸ் அணியின் கேப்டனாக ஹர்மன்ப்ரீத் கவுர் நியமனம்
மகளிர் ஐபிஎல்லில் ஹர்மன்ப்ரீத் கவுர் மும்பை இந்தியன்ஸ் அணியின் கேப்டனாக நியமிக்கப்பட்டுள்ளார். பிப்ரவரியில் நடந்த ஏலத்தில் நாட் ஸ்கிவர்-பிரண்ட் ரூ.3.20 கோடி மற்றும் பூஜா வஸ்த்ரகர் 1.90 கோடிக்கும் வாங்கப்பட்ட நிலையில், ஹர்மன்ப்ரீத் வெறும் ரூ.1.80 கோடிக்கு தான் வாங்கப்பட்டார். எனினும் அவர் தான் மும்பை இந்தியன்ஸ் அணியை வழிநடத்துவார் என்று எதிர்பார்க்கப்பட்ட நிலையில், தற்போது மும்பை இந்தியன்ஸ் நிர்வாகம் அதிகாரப்பூர்வமாக உறுதிப்படுத்தியுள்ளது. இது குறித்த தனது ட்விட்டர் பக்கத்தில் ஹர்மன்ப்ரீத்தை ஹாரி பாட்டருடன் ஒப்பிட்டு மும்பை இந்தியன்ஸ் ஒரு போஸ்டரை வெளியிட்டு தெரிவித்துள்ளது. இதன் மூலம் நாட் ஸ்கிவர்-பிரண்ட், ஹேலி மேத்யூஸ் மற்றும் அமெலியா கெர் போன்ற சிறந்த சர்வதேச வீராங்கனைகளை ஹர்மன்ப்ரீத் வழிநடத்த உள்ளார்.
ஹர்மன்ப்ரீத் கவுரின் கேப்டன்சி செயல்திறன்
2020 ஆம் ஆண்டு ஆஸ்திரேலியாவில் நடந்த இறுதிப் போட்டி உட்பட, கடந்த மூன்று டி20 உலகக் கோப்பைகளில் ஹர்மன்ப்ரீத் இந்தியாவை நாக் அவுட் சுற்று வரை அழைத்துச் சென்றுள்ளார். ஹர்மன்ப்ரீத் ஆடவர் மற்றும் மகளிர் என ஒட்டுமொத்த கிரிக்கெட் வரலாற்றில் 150 டி20 போட்டிகளில் விளையாடியுள்ளார். ஐபிஎல்லில் மும்பை இந்தியன்ஸை வழிநடத்தும் இந்திய வீரர் ரோஹித் ஷர்மா, 148 போட்டிகளுடன் இரண்டாவது இடத்தில் உள்ளார். மார்ச் 4 ஆம் தேதி நவி மும்பையில் உள்ள டி.ஒய்.பாட்டீல் மைதானத்தில் நடைபெறும் மகளிர் ஐபிஎல்லின் முதல் ஆட்டத்தில் மும்பை இந்தியன்ஸ் குஜராத் ஜெயன்ட்ஸ் அணியை எதிர்கொள்கிறது.
இந்த காலவரிசையைப் பகிரவும்