ஒலிம்பிக் தங்கத்தை குறிவைத்து இந்திய ஹாக்கி அணியை மாற்றியமைக்க புதிய திட்டம்
செய்தி முன்னோட்டம்
வரும் 2028-ஆம் ஆண்டு அமெரிக்காவின் லாஸ் ஏஞ்சல்ஸ் நகரில் நடைபெறவுள்ள ஒலிம்பிக் போட்டிகளைக் குறிவைத்து, இந்திய ஆடவர் ஹாக்கி அணியில் மிகப்பெரிய அளவிலான மாற்றங்களைச் செய்யத் திட்டமிட்டுள்ளதாகத் தலைமைப் பயிற்சியாளர் கிரெய்க் ஃபுல்டன் அதிகாரப்பூர்வமாகத் தெரிவித்துள்ளார். இந்த மாத இறுதியில் நடைபெறவுள்ள நியூசிலாந்து தொடர் முடிந்தவுடன், இந்திய அணியின் ஆட்டத்திறன் முழுமையாக ஆய்வு செய்யப்பட்டு, வரும் பிப்ரவரி மாதம் தொடங்கவுள்ள எஃப்ஐஹெச் புரோ லீக் தொடருக்கு புதிய வீரர்கள் கொண்ட அணி தேர்ந்தெடுக்கப்படவுள்ளது.
புதிய குழு தேர்வு
நியூசிலாந்து நூற்றாண்டு தொடர்
இந்திய ஹாக்கி அணி கடந்த 1926-ஆம் ஆண்டு முதன்முதலாக நியூசிலாந்திற்குச் சுற்றுப்பயணம் மேற்கொண்டதன் 100-வது ஆண்டு நிறைவு விழாவை கொண்டாடும் வகையில், வரும் நவம்பர் 19, 21 மற்றும் 22 ஆகிய தேதிகளில் ஆக்லாந்தில் 3 போட்டிகள் கொண்ட சர்வதேச டெஸ்ட் தொடர் நடைபெறவுள்ளது.
இத்தொடருக்கான அணி விரைவில் அறிவிக்கப்படவுள்ள நிலையில், நியூசிலாந்து தொடர் முடிந்ததும் வீரர்களின் செயல்பாடு விரிவாக மதிப்பிடப்பட்டு, 2027-28-ஆம் ஆண்டுக்கான புதிய முதன்மைக் குழு இறுதி செய்யப்படும் என்று ஃபுல்டன் உறுதிப்படுத்தியுள்ளார்.
அடுத்த ஆண்டு பிப்ரவரியில் இந்தியாவில் நடைபெறவுள்ள ப்ரோலீக் போட்டிகளில் ஜெர்மனி, அர்ஜென்டினா, கிரேட் பிரிட்டன் மற்றும் ஸ்பெயின் ஆகிய வலிமையான அணிகளை எதிர்கொள்ளும் இந்திய அணியில், இளமையும் வேகமும் நிறைந்த புதிய முகங்கள் களமிறக்கப்பட உள்ளனர்.
முன்னேற்றம்
ஐரோப்பிய அணிகளுக்கு எதிரான சவால்
சமீபத்திய ஆண்டுகளில் ஆசிய அணிகளுக்கு எதிராக அபாரமாக ஆடி வெற்றிகளைக் குவித்து வந்தாலும், உலகக் கோப்பையில் 8-வது இடத்திற்குத் தள்ளப்பட்டது போன்ற சறுக்கல்களைச் சுட்டிக்காட்டிய ஃபுல்டன், ஐரோப்பிய நாடுகள் மற்றும் சர்வதேச தரவரிசையில் முன்னிலையில் உள்ள முன்னணி அணிகளுக்கு எதிராகத் தாக்குதல் மற்றும் தற்காப்பு வியூகங்களை மேம்படுத்த வேண்டியது அவசியம் என வலியுறுத்தினார்.
முக்கிய ஆட்டங்களில் அழுத்தத்தை எதிர்கொள்ளும் மனநிலையும், முக்கியத் தருணங்களில் கோல் அடிக்கும் திறனும் வளர்த்தெடுக்கப்பட வேண்டும் என்றும், தனிப்பட்ட வீரர்களைக் குறை சொல்வதை விடுத்து, ஒட்டுமொத்த அணியின் அணுகுமுறையையும் LA 2028 ஒலிம்பிக் தங்கப் பதக்கத்தை நோக்கி மாற்றியமைப்பதே தனது முதன்மை நோக்கம் என்றும் அவர் குறிப்பிட்டுள்ளார்.