ஐபிஎல் 2023 : பஞ்சாப் கிங்ஸ் அணியில் ஜானி பேர்ஸ்டோக்கு பதிலாக மேத்யூ ஷார்ட் சேர்ப்பு
பஞ்சாப் கிங்ஸ் அணிக்காக விளையாடி வரும் இங்கிலாந்து விக்கெட் கீப்பர்-பேட்டர் ஜானி பேர்ஸ்டோ நீக்கப்பட்டு அவருக்கு பதிலாக ஆஸ்திரேலிய வீரர் மேத்யூ ஷார்ட் சேர்க்கப்பட்டுள்ளார். கடந்த செப்டம்பரில் காயம் அடைந்ததில் இருந்து ஓய்வில் இருந்த ஜானி பேர்ஸ்டோ பிப்ரவரி பிற்பகுதியில் மீண்டும் பயிற்சியை தொடங்கினர். ஆனால் இந்த ஆண்டு முக்கியமான பல போட்டிகள் அடுத்தடுத்து உள்ளதால், இங்கிலாந்து கிரிக்கெட் வாரியம் பேர்ஸ்டோவின் உடற்தகுதியை மனதில் வைத்து அவர் ஐபிஎல்லில் பங்கேற்க தடையில்லா சான்றிதழ் வழங்க மறுத்துவிட்டது. இதையடுத்து ஷார்ட் அணியில் இணைக்கப்பட்டுள்ளார். இது அவரது முதல் ஐபிஎல் தொடராகும். ஷார்ட் சமீபத்தில் பிக் பாஷ் லீக்கில் 144.47 ஸ்ட்ரைக் ரேட்டில் 458 ரன்களுடன் இரண்டாவது அதிக ரன் எடுத்தவராக இருந்தது குறிப்பிடத்தக்கது.
