நாளை வானில் தோன்றும் ஸ்ட்ராபெர்ரி முழு நிலவு! எப்போது, எப்படிப் பார்ப்பது? முழு விவரம்
செய்தி முன்னோட்டம்
வானியல் ஆர்வலர்களால் இந்த ஆண்டில் மிகவும் எதிர்பார்க்கப்பட்ட முக்கிய நிகழ்வுகளில் ஒன்றான 'ஸ்ட்ராபெர்ரி நிலவு' (Strawberry Moon 2026) இன்று திங்கட்கிழமை (ஜூன் 29) இரவு வானில் தோன்றவுள்ளது. உலக அளவில் இந்த நிலவின் முழுமையான ஒளிர்வு இன்று இரவு தெரிந்தாலும், இந்தியாவில் இருக்கும் வானியலாளர்களுக்கு ஜூன் 30 ஆம் தேதி அதிகாலை நேரத்தில்தான் இதன் உச்சகட்ட ஒளிர்வை முழுமையாகக் காணக்கூடிய வாய்ப்பு கிடைக்கும். இருப்பினும் திங்கட்கிழமை மாலை முதலே வானில் தோன்றும் இந்த முழு நிலவை மக்கள் வெறும் கண்களால் தெளிவாக ரசிக்கலாம்.
சரியான நேரம்
ஸ்ட்ராபெர்ரி நிலவு தோன்றும் சரியான நேரம்
ஜூன் 29 ஆம் தேதி இரவு 7:57 EDT (இந்திய நேரப்படி ஜூன் 30 அதிகாலை 5:27 மணி) அளவில் இந்த ஸ்ட்ராபெர்ரி நிலவு தனது உச்ச ஒளிர்வை அடையும். ஜூன் 29 ஆம் தேதி மாலை சூரிய அஸ்தமனத்திற்குப் பிறகு, நிலவு அடிவானத்தில் தோன்றும் நேரமே இதனைப் பார்வையிடுவதற்கான மிகச் சிறந்த தருணமாகும். இந்த குறிப்பிட்ட நேரத்தில் நிலவு கிழக்கு வானில் சற்று தாழ்வாகத் தோன்றுவதுடன், பார்ப்பதற்குத் தனித்துவமான தங்கம் அல்லது ஆரஞ்சு நிறத்தில் பிரகாசமாகக் காட்சியளிக்கும்.
பெயர்க் காரணம்
ஸ்ட்ராபெர்ரி என்று பெயர் வரக் காரணம் என்ன?
இந்த நிலவிற்கும் ஸ்ட்ராபெர்ரி பழத்தின் நிறத்திற்கும் எந்தச் சம்பந்தமும் இல்லை. வட அமெரிக்காவை சேர்ந்த அல்கொன்குவியன் எனப்படும் பூர்வீகப் பழங்குடியின மக்கள், ஜூன் மாதத்தில் காட்டு ஸ்ட்ராபெர்ரி பழங்களை அறுவடை செய்வதை வழக்கமாகக் கொண்டிருந்தனர். அந்த குறுகிய கால அறுவடையைக் குறிப்பதற்காகவே ஜூன் மாத முழு நிலவிற்கு ஸ்ட்ராபெர்ரி நிலவு என்று பெயரிட்டனர். இதுமட்டுமின்றி அரபாஹோ மற்றும் ஹுரோன்-வெண்டாட் போன்ற பிற பழங்குடியின சமூகங்களும் தங்களது வெவ்வேறு பருவநிலைக்கு ஏற்ப இதற்குப் பல பெயர்களைப் பயன்படுத்தியுள்ளனர்.
அறிவியல் காரணம்
நிலவின் நிறம் மாறுவதற்கான அறிவியல் காரணம்
பொதுவாக நிலவு வெள்ளை அல்லது வெளிர் மஞ்சள் நிறத்தில் தான் இருக்கும். ஆனால், நிலவு அடிவானத்திற்கு அருகில் இருக்கும் போது, அதிலிருந்து வரும் ஒளி பூமியின் தடிமனான வளிமண்டலத்தில் நீண்ட தூரம் பயணிக்க வேண்டியிருக்கும். அப்போது குறைந்த அலைநீளம் கொண்ட நீல நிற ஒளிகள் சிதறடிக்கப்பட்டு, ஆரஞ்சு மற்றும் தங்கம் போன்ற வெப்பமான நிறங்கள் மட்டுமே நம் கண்களுக்குத் தெளிவாகத் தெரியும். இதனாலேயே அடிவானத்தில் தோன்றும் போது நிலவு தங்கம் அல்லது ஆரஞ்சு நிறத்தில் ஒளிர்கிறது.
எப்படி பார்ப்பது?
ஸ்ட்ராபெர்ரி நிலவை எப்படிப் பார்ப்பது?
இந்த ஆண்டின் ஸ்ட்ராபெர்ரி நிலவு, கோடைகால சங்கிராந்திக்குப் (Summer solstice) பிறகு வருவதால், வடக்கு அரைக்கோளத்தில் உள்ளவர்களுக்கு இது அடிவானத்திற்கு மிக அருகில் தாழ்வாகத் தோன்றும். அதிகப்படியான நகர விளக்குகள் மற்றும் மாசு இல்லாத, கிழக்கு அல்லது தென்கிழக்கு திசையில் வானம் தெளிவாகத் தெரியும் ஒரு திறந்தவெளியைத் தேர்ந்தெடுத்துக் கொள்ள வேண்டும். பைனாகுலர் மூலம் பார்த்தால் நிலவின் மேற்பரப்புத் துல்லியமாகத் தெரியும் என்றாலும், வெறும் கண்களாலேயே இந்த அழகிய வானியல் நிகழ்வை முழுமையாக ரசிக்க முடியும்.