ரிமோட் ஒர்கிங் உங்கள் மனநிலையை பாதிக்கக்கூடும் என்கிறது ஆய்வுகள்
செய்தி முன்னோட்டம்
சயின்ஸ் இதழில் சமீபத்தில் வெளியிடப்பட்ட ஒரு ஆய்வு, அலுவலகத்தில் பணிபுரிபவர்களைக் காட்டிலும் தொலைதூரத்தில் இருந்து பணிபுரிபவர்கள் (Remote Working) மனச்சோர்வு மற்றும் பதட்டத்தால் பாதிக்கப்படுவதற்கான வாய்ப்புகள் அதிகம் என்பதை வெளிப்படுத்தியுள்ளது. இந்த ஆய்வை நியூயார்க் ஃபெடரல் ரிசர்வ் வங்கியின் பொருளாதார நிபுணரான நடாலியா இமானுவேல் வழிநடத்தினார். பாரம்பரிய அலுவலகப் பணிகளை விட தொலைதூர பணியை பலர் விரும்பினாலும், இந்த வேலை முறை அதிகரித்த சமூகத் தனிமை மற்றும் மனநலப் பிரச்சினைகளுக்கு வழிவகுக்கும் என்று அந்த ஆய்வு கண்டறிந்துள்ளது
மன அழுத்தம்
ரிமோட் வேலை மற்றும் மனநலம்
ரிமோட் வேலைகளில் இருப்பவர்கள், பணி நேரத்தில் அதிக நேரம் தனியாகச் செலவிடுவதாகவும், மனநலப் பராமரிப்பு வழங்குநர்களை அடிக்கடி சந்திப்பதாகவும் இந்த ஆய்வு கண்டறிந்துள்ளது. மேலும், அவர்கள் தங்களின் மனநலத்தை எதிர்மறையாக மதிப்பிடுகின்றனர். தொலைதூரப் பணியின் நெகிழ்வுத்தன்மை இருந்தபோதிலும், அது முன்பு நினைத்ததைப்போல ஒட்டுமொத்த நல்வாழ்வுக்கு பயனுள்ளதாக இருக்காது என்பதை இது உணர்த்துகிறது.
தனிமையின் எழுச்சி
வேலை நாட்களில் தனிமைப்படுத்தல் அதிகரிப்பு
இந்த ஆய்வு, தொலைதூர மற்றும் நேரடிப் பணிகளில் உள்ள அமெரிக்க பணியாளர்களிடம் நடத்தப்பட்ட ஐந்து தேசியக் கணக்கெடுப்புகளின் தரவுகளைப் பகுப்பாய்வு செய்தது. அறுவை சிகிச்சை அல்லது இயந்திரப் பொறியியல் போன்ற தொலைதூரப் பணிகளில் உள்ளவர்களுடன் ஒப்பிடுகையில், மென்பொருள் பொறியியல் மற்றும் சந்தைப்படுத்தல் போன்ற தொலைதூரப் பணிகளில் உள்ள பணியாளர்கள் தனியாகச் செலவிடும் நேரம் 58% அதிகரித்துள்ளதாக அது கண்டறிந்தது. மேலும், இந்தத் தொலைதூரப் பணியாளர்கள், தங்கள் நாள் முழுவதையும் எந்தவொரு மனிதத் தொடர்பும் இன்றிச் செலவிடுவதற்கான வாய்ப்பு 72% அதிகமாக இருந்தது.
மன உளைச்சல்
மன உளைச்சல் மற்றும் மனநல மருந்துகள்
கவலை மற்றும் மனச்சோர்வு குறித்த தரப்படுத்தப்பட்ட கேள்வித்தாளின் மூலம் அளவிடப்பட்டபடி, தொலைதூரத்தில் இருந்து பணிபுரிபவர்களிடம் மன உளைச்சலின் அறிகுறிகள் அதிகரித்திருப்பதையும் இந்த ஆய்வு கண்டறிந்துள்ளது. அவர்கள் மனநல பராமரிப்பு வழங்குநர்களை அதிக முறை சந்தித்ததுடன், பரிந்துரைக்கப்பட்ட மனநல மருந்துகளையும் அதிகமாகப் பயன்படுத்தினர். தனியாக வசிப்பவர்களுக்கு இதன் விளைவுகள் இன்னும் மோசமாக இருந்தன; அவர்கள் தங்கள் நாட்களைச் சமூகத் தொடர்பு இல்லாமல் கழிப்பதற்கான வாய்ப்பு 83% அதிகமாக இருந்தது.
சுகாதார அபாயங்கள்
உடல் நலத்தில் தனிமையின் தாக்கம்
தனிமையும் தனிமையுணர்வும் மன மற்றும் உடல் நலத்தில் ஏற்படுத்தும் பாதகமான விளைவுகளை இந்த ஆய்வு எடுத்துக்காட்டுகிறது. சிகாகோ பல்கலைக்கழகத்தின் பூத் வணிகப் பள்ளியின் நடத்தை அறிவியல் பேராசிரியரான நிக்கோலஸ் எப்லி, தனியாக இருப்பது நோய் எதிர்ப்பு மண்டலத்தின் செயல்பாட்டையும் இதய மண்டலத்தின் செயல்பாட்டையும் பாதிக்கக்கூடும் என்று கூறினார். இது ஒட்டுமொத்த நல்வாழ்வுக்கு சமூகத் தொடர்புகளின் முக்கியத்துவத்தை அடிக்கோடிட்டுக் காட்டுகிறது.
வேலை-வாழ்க்கை சமநிலை
தொலைதூரப் பணியாளர்கள் மற்றும் முதலாளிகளுக்கான பரிந்துரைகள்
அனைவரையும் அலுவலகத்தில் வேலை செய்யக் கட்டாயப்படுத்த வேண்டும் என்று எப்லி பரிந்துரைக்கவில்லை, ஆனால் அதனை மேலும் கவர்ச்சிகரமானதாக மாற்றுமாறு அறிவுறுத்துகிறார். மேலும், நிறுவனங்கள் ஊழியர்களை மீண்டும் பணிக்கு அழைக்கத் தொடங்கும் போது, புதிதாக வருபவர்களுடன் மற்ற சக ஊழியர்களும் இருப்பதை உறுதி செய்ய வேண்டும் என்றும் அவர் வலியுறுத்துகிறார். சசெக்ஸ் பல்கலைக்கழகத்தின் உளவியலாளரும்,' Once Upon a Stranger: The Science of How 'Small' Talk Can Add Up to a Big Life' என்ற நூலின் ஆசிரியருமான கில்லியன் சாண்ட்ஸ்ட்ரோம், remote-ல் இருந்து வேலை செய்பவர்கள் தினசரி மனிதத் தொடர்புகளை வேண்டுமென்றே நாட வேண்டும் என்று அறிவுறுத்துகிறார்.