'ரயில்வே அதிகாரி பேசுறேன்னு போன் வரும்!' ஊழியர்களின் பணத்தை குறிவைக்கும் மோசடி கும்பல்; ரயில்வே வாரியம் எச்சரிக்கை
செய்தி முன்னோட்டம்
இந்திய ரயில்வே வாரியம் தனது ஊழியர்கள் மற்றும் ஓய்வூதியதாரர்களுக்கு ஒரு முக்கியமான சைபர் பாதுகாப்பு எச்சரிக்கையை விடுத்துள்ளது. அண்மைக்காலமாக, சில மோசடி கும்பல்கள் தங்களை மூத்த ரயில்வே அதிகாரிகள் என்று அடையாளப்படுத்திக் கொண்டு, ஜூனியர் ஊழியர்கள் மற்றும் ஓய்வூதியதாரர்களைத் தொலைபேசி அழைப்புகள் மற்றும் வாட்ஸ்அப் செய்திகள் மூலம் தொடர்பு கொண்டு வருவது கண்டறியப்பட்டுள்ளது. இத்தகைய போலி அதிகாரிகள், தனிப்பட்ட தகவல்களைப் பெற்று பண மோசடியில் ஈடுபட முயற்சிப்பதாக ரயில்வே வாரியம் எச்சரித்துள்ளது.
நூதன முறை
வங்கி விவரங்களைக் கேட்கும் நூதன முறை
இந்த மோசடி கும்பல்கள் பெரும்பாலும் பிபிஓ புதுப்பித்தல், கேஒய்சி சரிபார்ப்பு அல்லது கூடுதல் ஓய்வூதியப் பலன்கள் தருவதாகக் கூறி ஆசை காட்டுகின்றனர். இதற்காக ஊழியர்களின் வங்கி கணக்கு விவரங்கள், ஓடிபி, கடவுச்சொற்கள் அல்லது ஆதார் எண்களைக் கேட்கின்றனர். ஆனால், எந்தவொரு ரயில்வே அதிகாரியும் தொலைபேசி வழியாகவோ அல்லது சமூக வலைதளங்கள் வாயிலாகவோ இத்தகைய ரகசியத் தகவல்களைக் கேட்க அதிகாரம் பெற்றவர்கள் இல்லை என்பதை வாரியம் தெளிவுபடுத்தியுள்ளது.
அறிவுரைகள்
ஓய்வூதியதாரர்களுக்கான சிறப்பு அறிவுரைகள்
ஓய்வூதியதாரர்கள் மற்றும் அவர்களின் குடும்ப உறுப்பினர்கள் மிகவும் விழிப்புடன் இருக்குமாறு கேட்டுக் கொள்ளப்பட்டுள்ளனர். பிபிஓ அல்லது சேவைப் பதிவேடுகளைப் புதுப்பிப்பதற்காக ரயில்வே நிர்வாகம் ஒருபோதும் குறுஞ்செய்தி வாயிலாக லிங்குகளை அனுப்பாது. சமீபத்திய மாதங்களில், பல ஊழியர்கள் இத்தகைய ஆசை வார்த்தைகளை நம்பி தங்கள் ரகசியத் தகவல்களைப் பகிர்ந்து பணத்தை இழந்துள்ளனர். எனவே, தெரியாத எண்களில் இருந்து வரும் சந்தேகத்திற்கிடமான அழைப்புகளை நம்ப வேண்டாம் என்று அறிவுறுத்தப்பட்டுள்ளது.
புகாரளிக்கும் முறை
புகாரளிக்கும் முறை மற்றும் புதிய சட்டங்கள்
சந்தேகத்திற்கிடமான அழைப்புகள் அல்லது செய்திகள் வந்தால், உடனடியாக சைபர் கிரைம் போலீசாருக்கோ அல்லது சம்பந்தப்பட்ட நிர்வாக அலுவலகத்திற்கோ புகார் அளிக்க வேண்டும். இதற்கிடையில், வளர்ந்து வரும் சைபர் அச்சுறுத்தல்களைச் சமாளிக்க ஒரு விரிவான புதிய சட்டக் கட்டமைப்பை உருவாக்க அரசு ஆலோசித்து வருவதாக மத்திய தகவல் தொழில்நுட்பத் துறை அமைச்சர் அஷ்வினி வைஷ்ணவ் தெரிவித்துள்ளார். 'ஏஐ மற்றும் சைபர் அச்சுறுத்தல் ஆராய்ச்சி மையத்தை' தொடங்கி வைத்துப் பேசிய அவர், பாதுகாப்பு அச்சுறுத்தல்களை அரசு மற்றும் தனியார் நிறுவனங்கள் இணைந்து எதிர்கொள்ள வேண்டிய நேரம் இது என்று குறிப்பிட்டுள்ளார்.