அதிகரிக்கும் டிஜிட்டல் கைது மோசடி; புதிய எச்சரிக்கை வெளியிட்டது என்பிசிஐ
செய்தி முன்னோட்டம்
அண்மைக் காலமாக அதிகரித்து வரும் டிஜிட்டல் கைதுகள் (Digital Arrests) என்ற சைபர் கிரைம் மோசடி குறித்துத் தேசியப் பரிவர்த்தனைக் கழகம் (என்பிசிஐ) பொது மக்களுக்கு அவசர எச்சரிக்கை விடுத்துள்ளது. தெரியாத எண்களில் இருந்து வரும் அழைப்புகளைப் புறக்கணிக்குமாறு என்பிசிஐ தனது புதிய ஆலோசனையில் வலியுறுத்தியுள்ளது. இந்த மோசடியில் சைபர் குற்றவாளிகள், காவல்துறை, சிபிஐ, வருமான வரி அல்லது சுங்கத்துறை அதிகாரிகள் போல ஆள்மாறாட்டம் செய்து மக்களைத் தொலைபேசியில் மிரட்டிப் பணம் பறிக்க முயல்கின்றனர். இந்த அதிகாரபூர்வமற்ற அழைப்புகளைப் புறக்கணித்து, உடனடியாகப் புகார் அளிக்குமாறு என்பிசிஐ அறிவுறுத்தியுள்ளது.
செயற்கை நுண்ணறிவு
யதார்த்த சூழலை உருவாக்க செயற்கை நுண்ணறிவு
பெரும்பாலான மோசடிக்காரர்கள் சட்ட நடவடிக்கை எடுக்கப்படும் என்று அச்சுறுத்துவதால், மக்கள் பீதியடைந்து பணத்தை இழக்கின்றனர். மோசடி அழைப்புகள் உண்மையானவை போலத் தோற்றமளிக்க, அவர்கள் சம்பந்தப்பட்ட நிறுவனங்களின் அதிகாரப்பூர்வ சின்னங்களைப் பயன்படுத்துகின்றனர். மேலும், பின்னணியில் அலுவலகச் சத்தம் இருப்பது போன்ற யதார்த்தமான சூழலை உருவாக்க செயற்கை நுண்ணறிவை (ஏஐ) பயன்படுத்துகின்றனர். பொதுமக்கள் இதுபோன்ற அழைப்புகள் வரும்போது பீதியடையத் தேவையில்லை என்று என்பிசிஐ அறிவுறுத்துகிறது.
புகார்
எப்படி புகார் செய்வது?
எந்த அதிகாரப்பூர்வ விசாரணை அமைப்பும் இந்த முறையில் தனிநபர்களைத் தொடர்பு கொள்ளாது. வாட்ஸ்அப் அல்லது பிற சமூக ஊடகங்கள் வழியாகச் சந்தேகத்திற்குரிய அழைப்புகள் அல்லது செய்திகள் வந்தால், பின்வரும் நடவடிக்கைகளைப் பின்பற்றலாம்:- அந்தச் செய்தி அல்லது தளத்தின் திரைப்பிடிப்பை (Screenshot) எடுக்கவும். சஞ்சார் சாதி (Sanchar Sathi) இணையதளத்தில் அதைப் புகார் செய்யவும். அல்லது 1930 என்ற உதவி எண்ணைத் தொடர்புகொண்டு புகாரைப் பதிவு செய்யலாம். எந்தவொரு அரசாங்க நிறுவனமோ அல்லது காவல் துறையோ தொலைபேசி மூலம் பணம் அல்லது வங்கிக் கணக்கு பரிமாற்றத்தைக் கேட்காது என்று என்பிசிஐ திட்டவட்டமாகக் கூறியுள்ளது. அத்தகைய அழைப்புகள் அல்லது செய்திகள் மூலம் யாராவது உங்களைத் துன்புறுத்தினால், கட்டாயம் புகார் அளியுங்கள்.