நெப்டியூன் ரகசியம்: 400 கோடி ஆண்டுகள் பழமையான நிலவு அழியாமல் தப்பியதை கண்டுபிடித்த ஜேம்ஸ் வெப் டெலஸ்கோப்
செய்தி முன்னோட்டம்
நமது சூரிய மண்டலத்தின் எட்டாவது மற்றும் மிகத் தொலைவில் உள்ள பனி ராட்சத கிரகமான நெப்டியூன், மற்ற கிரகங்களைப் போலல்லாமல் மிகவும் விசித்திரமான மற்றும் ஒழுங்கற்ற நிலவுகளின் கட்டமைப்பைக் கொண்டுள்ளது. இந்நிலையில், நாசாவின் அதிநவீன ஜேம்ஸ் வெப் விண்வெளி டெலஸ்கோப் திரட்டிய புதிய தரவுகளை ஆய்வு செய்த கலிபோர்னியா இன்ஸ்டிடியூட் ஆஃப் டெக்னாலஜி விஞ்ஞானிகள், நெப்டியூனின் மூன்றாவது பெரிய நிலவான நெராய்ட், சுமார் 400 கோடி ஆண்டுகளுக்கு முன்பு அந்த அமைப்பில் ஏற்பட்ட மாபெரும் விண்வெளிப் பேரழிவிலிருந்து ஒற்றை ஆளாக முழுமையாகத் தப்பிப்பிழைத்த ஒரே அசல் நிலவு (Lone Intact Survivor) என்ற அதிரடி உண்மையை தற்பொழுது கண்டுபிடித்துள்ளனர்.
விண்வெளிப் போர்
விண்வெளிப் போராக மாறிய ராட்சத நிலவு ட்ரைடான் வருகையும் நெப்டியூன் நிலவுகளின் அழிவும்
சூரிய மண்டலத்தின் தொடக்க காலத்தில், வியாழன் மற்றும் சனி கிரகங்களைப் போலவே நெப்டியூனும் தங்களின் சுழற்சி திசையிலேயே சுற்றும் நேர்த்தியான பல அசல் நிலவுகளைக் கொண்டிருந்தது. ஆனால், சூரிய மண்டலத்தின் எல்லையான கியூப்பர் பெல்ட் (Kuiper Belt) பகுதியிலிருந்து வந்த ட்ரைடான் (Triton) என்ற ராட்சத நிலவு, நெப்டியூனின் ஈர்ப்பு விசையால் ஈர்க்கப்பட்டு உள்நோக்கிப் பாய்ந்தது. நெப்டியூனின் சுழற்சிக்கு எதிர் திசையில் (Retrograde Orbit) சுற்றத் தொடங்கிய இந்த ட்ரைடான், அங்கிருந்த அசல் நிலவுகள் மீது பயங்கரமாக மோதி, பல நிலவுகளை முற்றிலும் அழித்துச் சிதைத்தது. தற்போதைய நெப்டியூனின் உட்புற நிலவுகள் அனைத்தும் அந்த மோதலில் உடைந்த குப்பைகளின் எச்சங்கள் (Rubble Piles) மட்டுமே ஆகும்.
ஜேம்ஸ் வெப்
நெராய்ட் நிலவின் நீர் மற்றும் கார்பன் டை ஆக்சைடு ரகசியத்தை வெளிப்படுத்திய ஜேம்ஸ் வெப்
இந்த மாபெரும் மோதலில் இருந்து நெராய்ட் நிலவு மட்டும் எப்படித் தப்பியது என்பது குறித்துப் புதிய ஆய்வறிக்கையை சயின்ஸ் அட்வான்சஸ் இதழில் வெளியிட்டுள்ள முதன்மை ஆராய்ச்சியாளர் மேத்யூ பெல்யாகோவ் பல சுவாரசியமான விபரங்களைப் பகிர்ந்துள்ளார். இதற்கு முன்பு நெராய்ட் நிலவும் கியூப்பர் பெல்ட்டில் இருந்து வந்த விண்கல் என்றே கருதப்பட்டது. ஆனால், ஜேம்ஸ் வெப் டெலஸ்கோப்பின் அகச்சிவப்பு கதிர்கள் மூலம் 10 நிமிடங்கள் 40 வினாடிகள் எடுக்கப்பட்ட அவதானிப்பில், நெராய்ட் நிலவின் மேற்பரப்பில் அதிகப்படியான நீர்-பனிக்கட்டிகளும், கார்பன் டை ஆக்சைடும் இருப்பது கண்டறியப்பட்டுள்ளது. இது கியூப்பர் பெல்ட் பொருட்களின் தன்மையோடு ஒத்துப்போகாமல், யுரேனஸ் கிரகத்தின் அசல் நிலவுகளின் வேதியியல் பண்புகளுடன் அச்சு அசலாக ஒத்துப்போகிறது.
தப்பிப் பிழைக்கும் வாய்ப்பு
கம்ப்யூட்டர் சிமுலேஷன் சோதனையில் உறுதியான 25 சதவீத தப்பிப்பிழைக்கும் வாய்ப்பு
விஞ்ஞானிகள் இந்த புதிய கோட்பாட்டை உறுதி செய்வதற்காக அதிநவீன கணினி உருவகப்படுத்துதல் சோதனைகளை மேற்கொண்டனர். அதில், ராட்சத நிலவான ட்ரைடான் நெப்டியூன் மண்டலத்திற்குள் நுழைந்து அசல் நிலவுகளைத் தாக்கும் போது, சுமார் 25 சதவீத சூழ்நிலைகளில் ஏதேனும் ஒரு நிலவு மட்டும் அந்த மோதலில் இருந்து தப்பித்து மிகவும் தொலைதூர நீள்வட்டப் பாதைக்குத் தள்ளப்பட வாய்ப்புள்ளது என்பது நிரூபணமானது. இந்த விதியின்படியே, பேரழிவின் போது நெராய்ட் நிலவு மட்டும் அதிர்ஷ்டவசமாகத் தப்பித்து, நெப்டியூனின் மிக வெளிவட்டப் பாதைக்குத் தள்ளப்பட்டுள்ளது. இந்த மோதலின் விளைவாகவே, நெராய்ட் நிலவு தற்பொழுது சூரிய மண்டலத்திலேயே மிக நீளமான, முட்டையுருவான (Highly Eccentric) பாதையில் நெப்டியூனைச் சுற்றி வரக் காரணமாக அமைந்துள்ளது.
புதிய ஆய்வு
1989 வாயேஜர் 2 விண்கலத்திற்குப் பின் நெப்டியூன் அமைப்பை ஆராயும் புதிய அறிவியல்
கிரேக்க புராணங்களில் வரும் கடல் தேவதைகளின் நினைவாகப் பெயரிடப்பட்ட நெராய்ட் நிலவு, சுமார் 338 கிலோமீட்டர் விட்டம் கொண்டது. பூமிக்கு மிகத் தொலைவில் இருப்பதால், கடந்த 1977இல் ஏவப்பட்டு 1989ஆம் ஆண்டு நெப்டியூனைக் கடந்து சென்ற நாசாவின் வாயேஜர் 2 விண்கலம் எடுத்த ஒரு மங்கலான பிக்சலேட்டட் புகைப்படம் மட்டுமே நம்மிடம் உள்ள ஒரே ஆதாரமாகும். தற்பொழுது ஜேம்ஸ் வெப் டெலஸ்கோப் தந்துள்ள இந்த புதிய தரவுகள், பனி ராட்சத கிரகங்களைச் சுற்றி நிலவுகள் எவ்வாறு உருவாகின்றன என்ற விண்வெளி அறிவியலின் அடுத்தகட்ட ஆராய்ச்சி வளையத்தைத் தொடங்கியுள்ளது. இந்த ரகசியங்களை முழுமையாக அறிய, நெப்டியூன் கிரகத்திற்குப் பிரத்யேக விண்கல விண்வெளித் திட்டம் ஒன்றை அனுப்புவது மட்டுமே தீர்வாக அமையும் எனப் பேராசிரியர்கள் தெரிவித்துள்ளனர்.