புதிய பணிநீக்க அறிவிப்பை வெளியிட்டது லிங்க்டுஇன் நிறுவனம்!
செய்தி முன்னோட்டம்
மைக்ரோசாப்ட் நிறுவனத்தை தாய் நிறுவனமாகக் கொண்ட அமெரிக்காவைச் சேர்ந்த லிங்க்டுஇன் நிறுவனம் புதிய பணிநீக்க அறிவிப்பு ஒன்றை வெளியிட்டிருக்கிறது.
கடந்த பிப்ரவரி மாதம் தான் முதல் சுற்று பணிநீக்கத்தில் ஈடுபட்டது அந்நிறுவனம். தற்போது மற்றொரு பணிநீக்க அறிவிப்பை வெளியிட்டிருக்கிறது.
20,000 பணியாளர்களைக் கொண்ட அந்நிறுவனம் 716 பேரை பணிநீக்கம் செய்யவிருப்பதாக அறிவித்திருக்கிறது.
இதுகுறித்து அந்நிறுவன சிஇஓ ரியான் ரோஸ்லன்ஸ்கி பணியாளர்களுக்கு எழுதிய கடிதத்தில், "மாறி வரும் சந்தை நிலவரம் மற்றும் வாடிக்கையாளர் தேவை ஆகியவற்றை கருத்தில் கொண்டு சில முடிவுகளை நிறுவனம் எடுத்திருக்கிறது.
வளர்ச்சியடையும் வாய்ப்புகள் கொண்ட சந்தைகளில் நம் கவனத்தை திருப்பவும் இந்த முடிவுகள் எடுக்கப்பட்டுள்ளன" எனத் தெரிவித்துள்ளார்.
லிங்க்டுஇன்
சீனாவில் சேவை நிறுத்தம்:
லிங்க்டுஇன் நிறுவனமானது இன்கரியர்ஸ் (InCareers) சேவையை சீனாவில் மட்டும் வழங்கி வந்தது.
சீனாவில் நிலவும் சவாலான சூழ்நிலைகள் காரணமாக அந்த சேவையை நிறுத்திக் கொள்ளவிருப்பதாக அறிவித்திருக்கிறது.
லிங்க்டுஇன்னின் பணிநீக்க அறிவிப்பில் இன்கரியர்ஸ் சேவையில் பணிபுரிந்தவர்களும் அடக்கம்.
2021-ல் லிங்க்டுஇன் சேவையை சீனாவில் இருந்து நிறுத்தியதையடுத்து, தற்போது இன்கரியர்ஸ் சேவையையும் நிறுத்தியிருக்கிறது அந்நிறுவனம்.
வரும் ஆகஸ்ட் 9-ம் தேதி முதல் இன்கரியர்ஸ் சேவை சீனாவில் செயல்படாது என அறிவித்திருக்கிறது லிங்க்டுஇன்.
இந்தப் பணிநீக்கத்தைத் தொடர்ந்து 250 புதிய வேலைவாய்ப்புகள் நிறுவனத்திற்குள்ளேயே உருவாகியிருப்பதாகவும், பணிநீக்கம் செய்யப்பட்ட பணியாளர்கள் அந்த பணிகளுக்கு விண்ணப்பிக்கலாம் எனவும் அந்நிறுவனம் தெரிவித்திருக்கிறது.