பூமிக்குக் காத்திருக்கும் பெரும் ஆபத்து! 50 ஆண்டுகளில் 11 ட்ரில்லியன் டன் பனிப்பாறைகள் உருகியுள்ளது; விஞ்ஞானிகள் எச்சரிக்கை
செய்தி முன்னோட்டம்
கடந்த 50 ஆண்டுகளில் கிரீன்லாந்து மற்றும் அண்டார்டிகா பகுதிகளில் இருந்து சுமார் 11.3 ட்ரில்லியன் டன் பனிப்பாறைகள் உருகி மறைந்துள்ளதாக புதிய ஆய்வு ஒன்று தெரிவித்துள்ளது. செயற்கைக்கோள் தரவுகளை அடிப்படையாகக் கொண்டு நடத்தப்பட்ட இந்த ஆய்வின் முடிவுகள் சயின்டிஃபிக் டேட்டா இதழில் வெளியிடப்பட்டுள்ளன. பூமி வெப்பமயமாதல் காரணமாக உருகும் இந்த பனிப்பாறைகள், உலகளாவிய கடல் நீர்மட்டம் உயர்வதற்கு மிக முக்கியமான காரணியாக மாறியுள்ளதாக அதில் எச்சரிக்கப்பட்டுள்ளது.
அதிர்ச்சி அறிக்கை
50 கால கட்ட தரவுகளை ஆய்வு செய்து வெளியான அதிர்ச்சி அறிக்கை
நார்தம்பிரியா பல்கலைக்கழகத்தின் உதவிப் பேராசிரியர் இனெஸ் ஒடோசகா தலைமையிலான சர்வதேச விஞ்ஞானிகள் குழு இந்த விரிவான ஆய்வை நடத்தியுள்ளது.
1979 முதல் 2023 வரையிலான காலக்கட்டத்தில் 50 சுயாதீன செயற்கைக்கோள் தரவுகளை ஒருங்கிணைத்து இந்த மதிப்பீடு செய்யப்பட்டுள்ளது.
பனிப்பாறைகளின் இயக்கம், கனஅளவு மற்றும் ஈர்ப்பு விசை மாற்றங்களைக் கண்காணிக்கும் 42 வெவ்வேறு அமைப்புகளின் தரவுகள் இதற்காகப் பயன்படுத்தப்பட்டுள்ளன.
இந்த விரிவான ஆய்வின் முடிவுகள் சுற்றுச்சூழல் மற்றும் புவியியல் விஞ்ஞானிகளை பெரும் அதிர்ச்சியில் ஆழ்த்தியுள்ளன.
துருவப் பகுதிகளில் உள்ள பனிப்பாறைகள் மிகக் குறுகிய காலத்தில் வேகமாகப் பாழடைந்து வருகின்றன.
உருகிய பனி
கடல் நீர்மட்டம் உயர்வு மற்றும் உருகிய பனியின் பிரமாண்ட அளவு
இந்த உருகிய பனியின் அளவை விளக்கிய ஆய்வாளர் இனெஸ் ஒடோசகா, "மறைந்த பனியின் அளவைக் கணக்கிட்டால், அது 23 கிலோமீட்டர் உயரமுள்ள ஒரு பிரமாண்ட பனிக்கட்டியை நிரப்புவதற்கு சமமானது" என்று குறிப்பிட்டுள்ளார்.
இதன் காரணமாக உலகளாவிய சராசரி கடல் நீர்மட்டம் சுமார் 1 அங்குலம் வரை உயர்ந்துள்ளது.
இது சிறிய அளவாகத் தோன்றினாலும், கடலோரப் பகுதிகளை மூழ்கடிக்கும் ஆபத்தை இது பெருமளவில் அதிகரித்துள்ளது.
மேலும் கிரீன்லாந்து மற்றும் அண்டார்டிகா ஆகிய இரு துருவப் பகுதிகளுமே உலக கடல் நீர்மட்ட உயர்வின் முதன்மை காரணியாக மாறியுள்ளன.
இதனால் எதிர்காலத்தில் சர்வதேச அளவில் பெரும் பாதிப்புகள் ஏற்படக்கூடும்.
முக்கிய காரணம்
பனிப்பாறைகள் உருகுவதற்குப் பின்னணியில் உள்ள முக்கியக் காரணம்
பொதுவாக வளிமண்டல வெப்பம் மற்றும் சூரிய கதிர்வீச்சு காரணமாகப் பனியின் மேற்பரப்பு உருகுவது வழக்கம்.
ஆனால், தற்போது நடைபெற்றுள்ள 84 சதவீத பனி இழப்பிற்குப் பனிப்பாறைகள் கடலில் நேரடியாக சரிந்து கரைவதே முக்கியக் காரணமாகும்.
கடல்நீரின் வெப்பநிலை உயர்வதே இதற்கு முக்கியக் காரணம் என ஆய்வாளர்கள் கண்டறிந்துள்ளனர்.
மேற்பரப்பு உருகுதலால் வெறும் 16 சதவீத பனி மட்டுமே உருகியுள்ள நிலையில், பெருங்கடல்களின் வெப்ப உயர்வே பனிப்பாறைகளை மிக வேகமாக அழித்து வருகிறது என்பது உறுதி செய்யப்பட்டுள்ளது.
இந்த செயல்முறை துருவப் பகுதிகளை மிகவும் ஆபத்தான நிலைக்குத் தள்ளியுள்ளது.