சந்திரயான் 3: நிலவில் தரையிறங்கும் அந்த இறுதி நிமிடங்களில் என்ன நடக்கும்?
கடந்த 40 நாட்களாக இந்தியர்கள் அனைவரும் எதிர்பார்த்திருந்த தருணம் நாளை நிறைவேறவிருக்கிறது. ஆம், நிலவில் கால்பதிக்கவிருக்கிறது சந்திரயான் 3. இஸ்ரோவின் விண்வெளித் திட்டம் குறித்து அனைவரும் ஆர்வமாக இருக்கும் நிலையில், இறுதி நிமிடங்களில் என்ன நடக்கும் என்பது குறித்து விவரித்திருக்கிறார் விஞ்ஞானி ஒருவர். சந்திரயான் 3-யின் மூலம் நிலவில் மென் தரையிறக்கத்தை சாத்தியப்படுத்தத் திட்டமிட்டிருக்கிறது இஸ்ரோ. இதுவரை, அமெரிக்கா, ரஷ்யா மற்றும் சீனா ஆகிய மூன்று நாடுகள் மட்டுமே நிலவில் மென்தரையிறக்கத்தை சாத்தியப்படுத்தியிருக்கின்றன. மென் தரையிறக்கம் என்றால் என்ன? சந்திரயான் 3, விக்ரம் லேண்டரின் இறுதி நிமிடங்கள் எப்படி இருக்கும், என்னவெல்லாம் நடக்கும்? வாருங்கள் பார்க்கலாம்.
மென் தரையிறக்கம்:
பொதுவாக நிலவிலோ அல்லது பிற விண்வெளிப் பொருட்களிலோ இரண்டு விதமான தரையிறக்கங்கள் மேற்கொள்ளப்படும். ஒன்று மென் தரையிறக்கம் மற்றொன்று வன் தரையிறக்கம். இதில் வன் தரையிக்கம் எனப்படுபவை, தெரிந்தே நிலவில் அல்லது பிற பொருட்களிலே நமது விண்கலத்தையோ அல்லது பிற ஆய்வுக் கலன்களையோ மோத வைப்பது. இதன் ஒரே நோக்கம், அந்த மோதலுக்குள் நமக்குத் தேவையான தகவல்களை திரட்டுவது தான். சந்திரயான் 1 திட்டத்தில் இந்த விதமான தரையிறக்கத்தை மேற்கொண்டிருக்கிறது இந்தியா. இப்படித் தான் நிலவில் தண்ணீரின் இருப்பையும் கண்டறிந்தது இஸ்ரோ. ஆனால், மென் தரையிறக்கம் என்பது, நமது கட்டுப்பாட்டுடன் ஒரு பட்டாம்பூச்சியைப் போல மிகவும் மென்மையான முறையில் சேதாரங்கள் இன்றி ஒரு விண்கலனையோ, ஆய்வுக்கலனையோ விண்வெளிப் பொருட்களில் தரையிறக்குவது.
தோல்வியடைந்த இஸ்ரோ:
இந்த மென் தரையிறக்கத்தை சாத்தியப்படுத்துவது மிகவும் சவலான செயல். ஏனெனில், சந்திரயான் 3யின் மொத்த மென் தரையிறக்க செயல்முறையும் தானாகவே இயங்குவது தான். பூமியில் இருந்து தரையிறக்கத்தைக் கண்காணித்து வரும் இஸ்ரோ விஞ்ஞானிகளாலும் கூட எதுவும் செய்ய முடியாது. இதனை 'அந்த திகிலான 15 நிமிடங்கள்' என வர்ணிக்கின்றனர் அவர்கள். யோசித்துப் பாருங்கள், 6000கிமீ வேகத்தில் நிலவை வலம் வந்து கொண்டிருக்கும் விக்ரம் லேண்டரானது, வெறும் பதினைந்து நிமிடங்களில் சரியான முடிவுகளை எடுத்து, மேற்கூறியபடி ஒரு பட்டாம்பூச்சியைப் போல மென்மையாக நிலவின் தரையில் தரையிறங்க வேண்டும். 2019-ல் பல்வேறு தவறான முடிவுகளால் நிலவில் தரையிறக்கத்தைத் சாத்தியப்படுத்த முடியாமல் போனது. இந்த முறை அந்தத் தோல்விகளில் இருந்து பாடம் கற்றுக் கொண்டிருக்கிறது இஸ்ரோ.
இறுதி நிமிடங்கள் எப்படி இருக்கும்?
தரையிங்குவதற்கு 18 நிமிடங்களுக்கு முன்பு, தான் தரையிறங்க வேண்டிய இடத்தில் இருந்து 745.5 கிமீ தொலைவில், 30 கிமீ உயரத்தில், நொடிக்கு 1.6 கிமீ வேகத்தில் நிலவை வலம் வந்து கொண்டிருக்கும் விக்ரம் லேண்டர். அடுத்த 690 நொடுகளில், அதன் இன்ஜின்கள் செயல்பாட்டிற்கு வரும். பைக்கில் பிரேக்குகளை அழுத்துவதைப் போல, அந்த இன்ஜின்களின் செயல்பாடு விக்ரம் லேண்டரின் வேகத்தை சற்று மட்டுப்படுத்தி, நிலவை நோக்கி விழ வைக்கும். அதன் பின்பு, நிலவின் புவியீர்ப்பு விசையால் ஈர்க்கப்பட்டு நிலவின் தரையை நோக்கி நொடிக்கு 60 மீட்டர்கள் என்ற வேகத்தில் கீழ்நோக்கிப் பயணிக்கும். கீழ் நோக்கிய பயணத்தின் போதே, தரையிறங்குவதற்கு ஏதுவாக, 90 டிகிரி மேல் நோக்கி தன்னுடைய நிலையை விக்ரம் லேண்டர் சரிசெய்து கொள்ளும்.
கடைசி அத்தியாயம்:
இந்தச் செயல்பாடுகளின் இறுதியில் தரையிறங்கும் இடத்தில் இருந்து, 32 கிமீ தூரத்தில், 7.5 கிமீ உயரத்தில் விக்ரம் லேண்டர் பயணம் செய்து கொண்டிருக்கும். தரையிறங்கும் இடத்திற்கு 800 முதல் 1300 மீட்டர்கள் உயரத்திற்கு வந்ததும், இந்தப் பயணத்தின் இறுதி அத்தியாயம் தொடங்கும். இந்த சமயத்தில் தான், லேண்டரின் கேமராக்கள் மற்றும் சென்சார்கள் அனைத்தும் ஒரே நேரத்தில் வேலை செய்து லேண்டர் தரையிறங்கும் இடத்தினை படம் பிடிக்கும், தகவல்களைச் சேகரிக்கும். 12 நொடிகளில் உயரம் 150மீட்டர்களாகக் குறையும். தரையிறங்கும் இடத்தில் எந்தப் பிரச்சினையையும் சென்சார்கள் மற்றும் கேமராக்கள் கண்டறியாத பட்சத்தில், அடுத்த 73 நொடிகளில் 150 மீட்டர் உயரத்திலிருந்து மெல்ல நிலவின் மேற்பரப்பில் விக்ரம் லேண்டர் தரையிறங்கும்.
