புதிய முதலீடுகளை ஈர்க்குமா சந்திரயான் 3யின் வெற்றி?
செய்தி முன்னோட்டம்
இன்றைக்கு இந்தியாவுடைய சந்திரயான் 3 திட்டத்தின் வெற்றி, இந்தியாவிற்கு பேர் மற்றும் புகழை மட்டுமல்லாது புதிய முதலீடுகளுக்கு வழிவகை செய்யும் என சந்தை ஆய்வாளர்கள் கருத்து தெரிவித்திருக்கின்றனர். கடந்த சில நாட்களுக்கு முன்பு நிலவில் மோதி தோல்வியடைந்த ரஷ்யாவின் லூனா 25 நிலவுத் திட்டமானது, தன்னுடைய ரஷ்ய விண்வெளித் துறைக்கான அடுத்த கட்ட முதலீடுகளையும் தன்னோடு சேர்த்து கொண்டு சென்றிருக்கிறது. விண்வெளித் துறையில் முதன் முதலில் தனியாருக்கும் இடம் அளித்தது அமெரிக்க விண்வெளி அமைப்பான நாசா தான். தற்போது ஸ்பேஸ் எக்ஸ், ப்ளூ ஆரிஜின் எனப் பல்வேறு தனியார் நிறுவனங்கள் நாசாவுடன் சேர்ந்து, அமெரிக்காவின் விண்வெளித் துறையில் பெரும் பங்காற்றி வருகின்றன.
சந்திரயான் 3
நாசாவின் பாதையைப் பின்பற்றும் இந்தியா:
தனியார் நிறுவனங்களை விண்வெளித்துறையில் அனுமதிப்பது, கூடுதலான முதலீடுகளையும் ஈர்ப்பதற்கான வழியாக இருக்கிறது. தற்போது நாசாவின் விண்வெளி வீரர்களை நிலவுக்கு அழைத்துச் செல்வதற்கான 3 பில்லியன் டாலர்கள் மதிப்பு கொண்ட ஒப்பந்தத்தைக் கைபற்றியிருக்கிறது எலான் மஸ்க்கின் ஸ்பேஸ் எக்ஸ். இந்திய விண்வெளித்துறையிலும் அந்நிய நாட்டு முதலீடுகளுக்கான கதவுகளை திறக்கத் திட்டமிடப்பட்டிருக்கிறது. தற்போது 8 பில்லியன் டாலர்கள் மதிப்பு கொண்ட இந்திய விண்வெளித்துறையை, அடுத்த பத்தாண்டுகளில் 40 பில்லியன் டாலர்களாக ஐந்து மடங்கு உயர்த்த இலக்கு நிர்ணயிக்கப்பட்டிருக்கிறது. அந்த இலக்கை அடைய தனியார் நிறுவனங்கள் மற்றும் அந்நிய நாட்டு முதலீடுகளும் வணிகமும் அவசியம். அதற்கு இன்றைய சந்திரயான் 3யின் வெற்றி மிக மிக அவசியம்.