விண்வெளியில் ராஸ்பெர்ரி பழ சர்க்கரை மூலக்கூறு கண்டுபிடிப்பு: பிரபஞ்சத்தில் உயிரினங்கள் தோற்றம் குறித்த புதிய திருப்பம்
செய்தி முன்னோட்டம்
பிரபஞ்சத்தில் உயிரினங்கள் எவ்வாறு தோன்றின என்ற பல நூற்றாண்டு கால கேள்விக்கு விடையளிக்கும் ஒரு முக்கிய மைல்கல்லாக, நமது பால்வெளி அண்டத்தின் மையப்பகுதியில் உள்ள ஒரு பிரம்மாண்ட விண்மீன் விண்வெளி மேகத்தில், ராஸ்பெர்ரி பழங்களில் இயற்கையாக காணப்படும் ஒரு வகை சர்க்கரை மூலக்கூறை வானியலாளர்கள் கண்டறிந்துள்ளனர். பூமியிலிருந்து சுமார் 26,700 ஒளி ஆண்டுகள் தொலைவில் அமைந்துள்ள இந்த விண்வெளி வாயு மற்றும் தூசு படலத்தில், உண்மையான சர்க்கரை மூலக்கூறு ஒன்று நேரடியாக கண்டறியப்படுவது விண்வெளி வரலாற்றிலேயே இதுவே முதல் முறையாகும்.
கண்டுபிடிப்பு
எரிலுலோஸ் மூலக்கூறு மற்றும் கண்டுபிடிப்பு
கண்டறியப்பட்டுள்ள இந்த மூலக்கூறு எரிலுலோஸ் (Erythrulose) என்று அழைக்கப்படும் நான்கு-கார்பன் சர்க்கரையாகும்.
பூமியில் இது சிவப்பு நிற பழங்களில் மிக குறைந்த அளவிலும், முக்கியமாக தோலை தற்காலிகமாகப் பழுப்பு நிறமாக்கும் செல்ஃப்-டேனிங் லோஷன்களிலும் பயன்படுத்தப்படுகிறது.
வானியலாளர்களால் G+0.693-0.027 என்று அழைக்கப்படும் ஒரு மாபெரும் விண்வெளி மூலக்கூறு மேகத்திற்குள் இந்த சர்க்கரை கண்டறியப்பட்டுள்ளது.
ஸ்பெயின் நாட்டில் உள்ள இரண்டு அதிநவீன ரேடியோ தொலைநோக்கிகளை பயன்படுத்தி, விண்வெளியில் இந்த மூலக்கூறுகள் சுழலும் போது வெளிப்படுத்தும் தனித்துவமான ரேடியோ அலைவரிசைகளை கொண்டு ஆராய்ச்சியாளர்கள் இதைக் கண்டறிந்துள்ளனர்.
தோற்றம்
-250°C உறைகுளிரில் உருவான சர்க்கரை
வியப்பூட்டும் விதமாக, இந்த விண்வெளி மேகத்தில் எரிலுலோஸ் சர்க்கரையானது, எளிய மூன்று-கார்பன் சர்க்கரைகளை விட 8 முதல் 17 மடங்கு அதிகமாக காணப்படுகிறது.
விண்வெளியில் நிலவும் -250°C என்ற அதிதீவிரக் குளிரில், எளிய கார்பன் கலவைகள் விண்வெளித் தூசுகளின் மேற்பரப்பில் உறைந்து, பல கோடி ஆண்டுகால வேதிவினையின் காரணமாக இந்த சர்க்கரையாக மாறியிருக்கலாம் என்று வானியற்பியல் வல்லுநர்கள் கருதுகின்றனர்.
இந்த கண்டுபிடிப்பு பூமியில் உயிரினங்கள் எவ்வாறு உருவாயின என்ற கோட்பாட்டிற்கு வலுவான மூன்று சான்றுகளை வழங்குகிறது.
சான்று
உயிரினங்களின் தோற்றத்திற்கான முக்கிய சான்றுகள்
பூமி உருவான ஆரம்பக் காலகட்டத்தில், விண்வெளியில் இருந்த கரிமப் பொருட்கள் விண்கற்கள் மற்றும் வால் நட்சத்திரங்கள் மூலமாக பூமியின் மீது பொழிந்திருக்கலாம் என்ற கோட்பாட்டை இது உறுதிப்படுத்துகிறது.
டிஎன்ஏ உருவாவதற்கு முன்பு, பூமியின் முதல் மரபணு பொருளாக கருதப்படும் RNA-வின் அடிப்படை அலகுகளான 'ரிபோநியூக்ளியோடைடுகளை' உருவாக்க இந்த எரிலுலோஸ் சர்க்கரையால் வேதிவினை புரிய முடியும்.
விண்வெளியில் கண்டறியப்பட்ட இரண்டாவது 'கைரல்' மூலக்கூறு இதுவாகும்.
அதாவது, உயிரியல் கட்டமைப்புகளின் முக்கியப் பண்பான 'இடது மற்றும் வலது கை' கண்ணாடி பிம்ப அமைப்பை இது கொண்டுள்ளது.
நட்சத்திரங்களும் கிரகங்களும் உருவாவதற்கு முன்பே, விண்வெளியின் உறைந்த வெட்டவெளியில் உயிரினங்களுக்கு தேவையான அடிப்படைச் சர்க்கரை மூலக்கூறுகள் உருவாக முடியும் என்பதை இந்தக் கண்டுபிடிப்பு நிரூபித்துள்ளது.