வெளியானது ஆப்பிளின் புதிய ஃப்ளாக்ஷிப் 'ஐபோன் 15 சீரிஸ்'
புதிய ஐபோன்களை அறிமுகப்படுத்தும் தங்களுடைய வருடாந்திர நிகழ்வுகள் ஒன்றான வொண்டர்லஸ்ட் நிகழ்வை தற்போது நடத்தி முடித்திருக்கிறது ஆப்பிள். இந்த நிகழ்வில், தங்களுடைய ஃப்ளாக்ஷிப் ஐபோன் சீரிஸான ஐபோன் 15 சீரிஸை வெளியிட்டிருக்கிறது அந்நிறுவனம். ஒவ்வொரு வருடமும் அறிமுகப்படுத்துவதைப் போலவே இந்த ஆண்டும் நான்கு புதிய ஐபோன்களை அறிமுகப்படுத்தியிருக்கிறது ஆப்பிள். ஐபோன் 15, ஐபோன் 15 ப்ளஸ், ஐபோன் 15 ப்ரோ மற்றும் ஐபோன் 15 ப்ரோ மேக்ஸ் ஆகிய நான்கு ஐபோன்களையே வொண்டர்லஸ்ட் நிகழ்வில் வெளியிட்டிருக்கிறது அந்நிறுவனம். என்னென்ன வசதிகள் மற்றும் என்னென்ன விலையில் புதிய ஐபோன் 15 சீரிஸ் ஸ்மார்ட்போன்களை வெளியிட்டிருக்கிறது ஆப்பிள்? பார்க்கலாம்.
அனைத்து மாடல்களிலும் டைனமிக் ஐலேண்டு வசதி:
முந்தைய ஐபோன் 14 சீரிஸில், ப்ரோ மாடல்களில் மட்டுமே டைனமிக் ஐலேண்டு வசதியை வழங்கியிருந்தது ஆப்பிள். ஆனால், இந்த முறை 15 சீரிஸின் அனைத்து மாடல்களிலும் டைனமிக் ஐலேண்டு வசதியை அளித்திருக்கிறது அந்நிறுவனம். முன்னதாக வழங்கப்பட்டு வந்த ம்யூட் ஸ்விட்சுக்கு மாற்றாக ஆக்ஷன் பட்டனை புதிய ஐபோன் 15 சீரிஸில் அறிமுகப்படுத்தியிருக்கிறது ஆப்பிள். இதன் மூலம் பல்வேறு செயல்பாடுகளுக்கான ஷாட்கட்களை ஆக்ஷன் பட்டன் மூலம் உருவாக்கிப் பயன்படுத்த முடியும். ஆப்பிள் நிறுவனமானது, 15 மாடல்களின் வெளிப்புறத்தில் அலுமினியம் ஃப்ரேமைப் பயன்படுத்தியிருக்கும் நிலையில், 15 ப்ரோ மாடல்களின் வெளிப்புறம் டைட்டானியம் கேசிங்கைப் பயன்படுத்தியிருக்கிறது. ப்ரோ மற்றம் ப்ரோ அல்லாத மாடல்களிடையே வேறுபாட்டைக் காட்ட ப்ரோ, மாடல்களில் டைட்டானியம் நிறங்களைப் பயன்படுத்தியிருக்கிறது அந்நிறுவனம்.
ஐபோன் 15 சீரிஸ் டிஸ்பிளே:
புதிய ஐபோன் 15 சீரிஸின், 15 மற்றும் 15 ப்ரோ மாடல்களானது, 6.1 இன்ச் டிஸ்பிளேவுடனும், 15 ப்ளஸ் மற்றும் 15 ப்ரோ மேக்ஸ் மாடல்களானது, 6.7 இன்ச் டிஸ்பிளேவுடனும் வெளியாகியிருக்கிறது. ப்ரோ மாடல்களில் ஆப்பிளின் LIPO தொழில்நுட்பத்தின் உதவியுடன் ஐபோன்களின் பெசல்களின் அளவு சிறியதாக்கப்பட்டுள்ளது. மேலும், ஐபோன் 15 மற்றும் 15 ப்ளஸ் மாடல்களில் 60Hz ரெப்ரெஷ் ரேட் கொண்ட டிஸ்பிளேவும், 15 ப்ரோ மாடல்களில் LTPO தொழில்நுட்பத்துடன் 120Hz ரெப்ரெஷ் ரேட் கொண்ட டிஸ்பிளேவும் பயன்படுத்தப்பட்டிருக்கிறது. ஆனால், 15 சீரிஸின் அனைத்து மாடல் டிஸ்பிளேக்களும் 2000 நிட்ஸ் அதிகபட்ச வெளிச்சத்தை வெளிப்படுத்தும் தன்மையைக் கொண்டிருக்கின்றன.
ஐபோன் 15 சீரிஸ் ப்ராசஸர் மற்றும் கேமரா:
ஐபோன் 15 மற்றும் 15 ப்ளஸ் மாடல்களில், ஐபோன் 14 ப்ரோ மாடல்களில் பயன்படுத்தப்பட்ட A16 பயானிக் சிப்பையே கொடுத்திருக்கிறது ஆப்பிள். இது எப்போதும் ஆப்பிள் பின்பற்றும் வழக்கம் தான். இந்த மாடல்களானது அதிகபட்சமாக 6GB ரேம் மற்றும் 512GB ஸ்டோரேஜ் வசதியுடன் வெளியாகியிருக்கின்றன. 15 சீரிஸின் ப்ரோ மாடல்களில் புதிய மேம்படுத்தப்பட்ட 3nm A17 ப்ரோ பயானிக் சிப்பைக் கொடுத்திருக்கிறது ஆப்பிள். மேலும், ப்ரோ மாடல்களானது 1TB ஸ்டோரேஜ் வசதியுடன் வெளியாகியிருக்கின்றன. ஐபோன் 15 மாடல்களில் 48MP முதன்மைக் கேமராவும், 12MP அல்ட்ரா-வைடு கேமராவும் கொடுக்கப்பட்டிருக்கிறது. 15 ப்ரோ மாடல்ளில் 48MP முதன்மைக் கேமரா, 12MP டெலிபோட்டோ கேமரா மற்றும் 12MP அல்ட்ரா-வைடு கேமரா என ட்ரிபிள் கேமரா செட்டப் கொடுக்கப்பட்டிருக்கிறது.
ஐபோன் 15 சீரிஸ் விலை:
முதன் முறையாக ஐபோன் 15 சீரிஸில் டைப்-சி சார்ஜிங் போர்ட் கொடுக்கப்பட்டிருக்கிறது. இத்துடன் Qi2 வயர்லெஸ் சார்ஜிங் வசதி, வை-பை 6E கனெக்டிவிட்டி ஆகிய வசதிகளும் 15 சீரிஸ் ஐபோன்களில் கொடுக்கப்பட்டிருக்கிறது. இந்தியாவில் புதிய ஐபோன் 15 சீரிஸ் ஸ்மார்ட்போன்களின் தொடக்க விலைகள் பின்வருமாறு: ஐபோன் 15: ரூ.79,900 ஐபோன் 15 ப்ளஸ்: ரூ.89,900 ஐபோன் 15 ப்ரோ: ரூ.1,34,900 ஐபோன் 15 ப்ரோ மேக்ஸ்: ரூ.1,54,900 இந்தியாவிலேயே ஐபோன் தயாரிப்பு தொடங்கப்பட்டிருப்பதால், தற்போது வெளியீட்டிலிருந்தே இந்தியாவில் தயாரிக்கப்பட்ட ஐபோன்களை விற்பனை செய்யவிருக்கிறது அந்நிறுவனம். செப்டம்பர் 22ம் தேதி முதல், ஆப்பிள் தளங்கின் மூலம் புதிய ஐபோன் 15 சீரிஸை பெற்றுக்கொள்ள முடியும்.
இந்த காலவரிசையைப் பகிரவும்