ஆதித்யா L1 திட்டத்திற்கும் திட்ட இயக்குநராக நியமிக்கப்பட்டிருக்கும் தமிழர்
செய்தி முன்னோட்டம்
பிற விண்வெளித் திட்டங்களைப் போலவே ஆதித்யா L1 திட்டத்திலும் தமிழக விஞ்ஞானிகளின் பங்கு இன்றியமையாததாக இருக்கிறது. சந்திரயான் திட்டங்களைத் தொடர்ந்து, ஆதித்யா L1 திட்டத்தின் திட்ட இயக்குநராகவும் தமிழகத்தைச் சேர்ந்த ஒருவரே நியமிக்கப்பட்டுள்ளார்.
இஸ்ரோவின் விண்வெளித் திட்டங்களில் பணியாற்றிய தமிழக திட்ட இயக்குநர்களான மயில்சாமி அண்ணாதுரை, வனிதா முத்தையா மற்றும் வீர முத்துவேல் வரிசையில் ஆதித்யா L1 திட்டத்திற்கு திட்ட இயக்குநராக நியமிக்கப்பட்டதன் மூலம் புதிதாக இணைந்திருக்கிறது நிகர் ஷாஜி.
தென்காசியைச் சேர்ந்த இவர், செங்கோட்டை அரசுப் பள்ளியில் தன்னுடைய பள்ளிப்படிப்பை முடித்திருக்கிறார். திருநெல்வேலி அரசுப் பொறியியல் கல்லூரியில் பொறியியல் பட்டம் பெற்ற இவர், 1987ல் இஸ்ரோவில் இணைந்திருக்கிறார்.
ஆதித்யா L1
தமிழக விஞ்ஞானிகளின் பங்கு:
ஆதித்யா L1 திட்டத்தில் சூரியனை ஆய்வு செய்வதற்காக பயன்படுத்தப்படவிருக்கும் Visible Emission Line Coronagraph (VELC) என்ற கருவியை இந்தியாவின் IIA (Indian Institute of Astrophysics) கல்வி நிறுவனமே உருவாக்கியிருக்கிறது.
இந்த VELC ஒவ்வொரு நாளும் சூரியனை ஆய்வு செய்து சேகரிக்கும் தகவல்களை பூமிக்கு அனுப்புவதற்கான தகவல் வழித்தட மென்பொருளை தமிழகத்தைச் சேர்ந்த முத்து பிரியாள் தலைமையிலேயே உருவாக்கியிருக்கின்றனர்.
ஆதித்யா L1ன் உருவாக்கம் மற்றும் செயல்பாடுகளுக்காக நியமிக்கப்பட்டிருக்கும் விஞ்ஞானிகளில் குழுவில் முத்து பிரியாளும் இடம்பெற்றிருக்கிறார் என்பது குறிப்பிடத்தக்கது. இவர் தமிழகத்தின் கரைக்குடிக்கு அருகேயுள்ள தேவகோட்டையைச் சேர்ந்தவர் என்பது குறிப்பிடத்தக்கது.