சுந்தர் பிச்சைக்கு ரூ.6,200 கோடி சம்பளம்! ஆனால் ஒரு கண்டிஷன்.. கூகுளின் புதிய பிளான்
செய்தி முன்னோட்டம்
ஆல்பபெட் மற்றும் கூகுள் நிறுவனத்தின் தலைமைச் செயல் அதிகாரி சுந்தர் பிச்சைக்கு, அடுத்த மூன்று ஆண்டுகளில் சுமார் $692 மில்லியன் (சுமார் ரூ.6,200 கோடி) மதிப்பிலான புதிய ஊதியத் தொகுப்பை வழங்க அந்த நிறுவனம் ஒப்புதல் அளித்துள்ளது. இந்தத் தொகையின் பெரும்பகுதி நிறுவனத்தின் பங்குகளாகவும், குறிப்பிட்ட இலக்குகளை எட்டினால் மட்டுமே கிடைக்கும் வகையிலும் வடிவமைக்கப்பட்டுள்ளதாக தகவல் வெளியாகி உள்ளது.
நிறுவனங்கள்
வேமோ மற்றும் விங் நிறுவனங்களுடன் இணைப்பு
வழக்கமான ஊதியத் திட்டங்களைப் போலல்லாமல், இம்முறை ஆல்பபெட்டின் வளர்ந்து வரும் வேமோ மற்றும் விங் துணை நிறுவனங்களின் வெற்றியுடன் சுந்தர் பிச்சையின் ஊதியம் இணைக்கப்பட்டுள்ளது. ரோபோடாக்சிகளை இயக்கும் வேமோ நிறுவனத்தின் மதிப்பு அடுத்த மூன்று ஆண்டுகளில் உயர்ந்தால், அவருக்கு $260 மில்லியன் வரை ஊக்கத்தொகை கிடைக்கும். ட்ரோன் மூலம் டெலிவரி செய்யும் விங் நிறுவனத்தின் வளர்ச்சியைப் பொறுத்து $90 மில்லியன் வரை பங்கு ஊக்கத்தொகை வழங்கப்பட உள்ளது. இந்த புதிய முயற்சிகளில் சுந்தர் பிச்சை கூடுதல் கவனம் செலுத்துவதை ஊக்குவிக்கவே இந்த நடவடிக்கை எடுக்கப்பட்டுள்ளது.
ஊதியம்
பங்குச் சந்தை மற்றும் கால அடிப்படையிலான ஊதியம்
துணை நிறுவனங்கள் தவிர, ஆல்பபெட் நிறுவனத்தின் ஒட்டுமொத்த பங்குச் சந்தை செயல்பாடுகளும் இந்த ஊதியத் திட்டத்தில் முக்கியப் பங்கு வகிக்கின்றன: ஆல்பபெட் பங்குகள் மற்ற முன்னணி நிறுவனங்களை விடச் சிறப்பாகச் செயல்பட்டால் $252 மில்லியன் மதிப்பிலான பங்குகள் அவருக்குக் கிடைக்கும். சுந்தர் பிச்சை தொடர்ந்து மூன்று ஆண்டுகள் நிறுவனத்தில் நீடித்தால் மட்டும் $84 மில்லியன் மதிப்பிலான பங்குகள் அவருக்கு வழங்கப்படும். இவ்வளவு பெரிய தொகை பங்குகள் மூலம் கிடைத்தாலும், அவரது அடிப்படை ஆண்டுச் சம்பளம் மாற்றமின்றி $2 மில்லியன் (சுமார் ரூ.18 கோடி) என்ற அளவிலேயே நீடிக்கிறது.
தற்போதைய நிலை
நிறுவனங்களின் தற்போதைய நிலை
இந்த ஊதியத் திட்டம் ஏன் முக்கியமானது என்பதை விளக்க தொழில்துறையினர் சில தரவுகளை முன்வைக்கின்றனர். 2026 இல் டல்லாஸ், ஹூஸ்டன் போன்ற அமெரிக்காவின் முக்கிய நகரங்களுக்குத் தனது சேவையை வேமோ விரிவாக்கியுள்ளது. இதுவரை 20 கோடி மைல்களுக்கு மேல் இதன் வாகனங்கள் பயணித்துள்ளன. விங் நிறுவனம் வால்மார்ட் போன்ற பெரிய நிறுவனங்களுடன் இணைந்து 2027 க்குள் 270 க்கும் மேற்பட்ட கிளைகளில் ட்ரோன் டெலிவரியைத் தொடங்கத் திட்டமிட்டுள்ளது.