உலக தொலைக்காட்சி தினம் இன்று; எதற்காகக் கொண்டாடப்படுகிறது?
செய்தி முன்னோட்டம்
இன்றைய தினமானது உலகெங்கிலும் இருக்கும் அனைத்து நாடுகளிலும், அனைத்து வீடுகளிலும், இந்தியாவின் அனைத்துக் குடும்பங்களிலும் இன்றியமையாத மின்னணு சாதனமாக உருவெடுத்து நிற்கும் தொலைக்காட்சியைக் கொண்டாடுவதற்கான நாள்.
ஆம், 'உலக தொலைக்காட்சி தினம்' இன்று. ஒவ்வொரு ஆண்டும் நவம்பர் 21ம் தேதி உலக தொலைக்காட்சி தினமாகக் கொண்டாடப்படுகிறது.
உலகளவில் சமூகத்திலும், அரசியலிலும் தொலைக்காட்சி ஏற்படுத்திய மற்றும் ஏற்படுத்தி வரும் தாக்கத்தை அங்கீகரிக்கும் விதமாகவும், தொலைக்காட்சி எந்தளவிற்கு நம்முடைய வாழ்க்கியில் மாற்றத்தை ஏற்படுத்தியிருக்கிறது என்பதைத் தெரிந்து கொள்ளம் வகையில் ஒவ்வொரும் ஆண்டும் நவம்பர் 21ம் நாளை உலக தொலைக்காட்சி தினமாகக் கொண்டாட 1996ம் ஆண்டு அங்கீகரித்தது ஐநா பொதுச்சபை.
தொலைக்காட்சி
தொலைக்காட்சியின் உருவாக்கம்:
பிற மின்னணு சாதனங்களைப் போல தொலைக்காட்சியினை குறிப்பிட்ட ஒருவர் தான் கண்டறிந்தார் எனக் கூற முடியாது. ஏனெனில், பல்வேறு காலக்கட்டங்களில் பல்வேறு நபர்கள் இன்றைய தொலைக்காட்சியின் உருவாக்கத்திற்கு உதவி புரிந்திருக்கிறார்கள்.
எனினும், தொடக்கக் கால தொலைக்காட்சியின் உருவாக்கத்தில் முக்கியப் பங்கு வகித்தவர்களாக இருவர் குறிப்பிடப்படுகிறார்கள்.
ஒருவர் ஸ்காட்லாந்தைச் சேர்ந்த ஜான் லோகி பாய்ர்டு, இவரே தொலைக்காட்சியின் தந்தை எனவும் அழைக்கப்படுகிறார். மெக்கானிக்கல் தொலைக்காட்சியை உருவாக்கியவர் இவர்.
இன்னொருவர் அமெரிக்காவைச் சேர்ந்த பிலே டெய்லர் பிரான்ஸ்வொர்த், இவர் 1927ல் முதன்முதலாக எலெக்ட்ரிகல் தொலைக்காட்சியை செயல்படுத்திக் காட்டியவர். முதன் முதலில் ரேடியோ அலைகளின் உதவியுடனேயே தொலைக்காட்சியின் இயக்கம் இருந்திருக்கிறது.
தொழில்நுட்பம்
தொலைக்காட்சியின மேம்பாடு:
1920-களில் தொலைக்காட்சி என்ற ஒன்று அறிமுகப்படுத்தப்பட்டது, அவ்வளவு தான். தொழில்நுட்பங்கள் வளர்ந்த பிறகு 1950-களில் தான் நவீன தொலைக்காட்சிக்கான வித்து ஊன்றப்பட்டது.
பல்வேறு நபர்கள் நவீன தொலைக்காட்சியின் மேம்பாட்டிற்கு வித்திட்டிருக்கிறார்கள். மேலும், தொழில்நுட்பம் வளர வளர தொலைக்காட்சியின் வடிவமும், செயல்பாடும் சேர்ந்தே மாறியது.
கொஞ்சம் கொஞ்சமாக மேம்பட்ட தொலைக்காட்சிகள் தற்போது மிகவும் ஸ்மார்ட்டாக வந்து நிற்கின்றன. பொழுதுபோக்கு அம்சத்தை மட்டுமே குறிக்கோளாகக் கொண்டு உருவாக்கப்பட்டவை தான் தொலைக்காட்சிகள். ஆனால், சமூகத்தில் அவை பெரிய பெரிய மாற்றங்களைக் கொண்டு வரும் என அப்போது யாரும் நினைத்திருக்க மாட்டார்கள்.
சமூகம்
சமூகத்தில் தொலைக்காட்சியின் தாக்கம்:
முதலில் பொழுதுபோக்கிற்கு மட்டும் பயன்படுத்தப்பட்டாலும், பின்னர் மிகச்சிறந்த தகவல் தொடர்பு சாதனமாகவும் பயன்பட்டவை தொலைக்காட்சிகள் தான்.
எந்தவொரு நாட்டில் என்ன சம்பவம் நிகழ்ந்தாலும், அதனை நம்முடைய வீட்டிலுள்ள திரையில் பார்க்க முடியும் என்பது சாதாரண விஷயமா என்ன.
ஒரு குறிப்பிட்ட எல்லைக்குள் மட்டுமே வாழ்ந்து பழக்கப்பட்ட மனித சமூகத்துக்கு, எல்லைகளைக் கடந்து பல்வேறு நாடுகள், மதங்கள், கலாச்சாரங்கள் குறித்த முதல் புரிதல் தொலைக்காட்சியின் மூலமே ஏற்படுகிறது.
புதிய விஷயங்களைக் கற்றுக் கொள்வது முதல் நமக்கான உரிமைகள் குறித்து தெரிந்து கொள்வது வரை பல்வேறு நேரங்களில் நமக்கு அது ஆசானாகவும் இருப்பதை நம்மால் மறுக்க முடியாது.
இந்தியா
இந்தியாவில் மேற்கொள்ளப்பட்ட ஆய்வு:
இந்தியாவில் தொலைக்காட்சி என்ன விதமான தாக்கத்தை ஏற்படுத்தியிருக்கிறது என்பது குறித்த ஆய்வு ஒன்றை இந்திய ஒளிபரப்பு மன்றம் 2012ம் ஆண்டே நடத்தியது.
அந்த ஆய்வின் முடிவில், தொலைக்காட்சிகள் தங்களுடைய வாழ்வில் நேர்மறையான பல மாற்றங்களை ஏற்படுத்தியிருப்பதாவும், நேர்மறையான மாற்றங்கள் ஏற்பட உதவியிருப்பதாகவுமே பலரும் அந்த ஆய்வில் கருத்து தெரிவித்திருக்கிறார்கள்.
முக்கியமாக, தங்களுடைய படிப்பு குறித்த தகவல்களைத் தெரிந்து கொள்ளவும், அதுகுறித்த முடிவுகளை எடுப்பதற்கும் தொலைக்காட்சி உதவியதாகத் தெரிவித்திருக்கிறார்கள்.
சுய மேம்பாடு அடைய, சமூக பழக்கவழக்கங்களைக் கற்றுக் கொள்ள, புதிய வாய்ப்புகள் குறித்த தெரிந்து கொள்ள, விழிப்புணர்வு பெற மற்றும் புத்துணர்ச்சி பெற என தங்கள் வாழ்வில் தொலைக்காட்சி நேர்மறை தாக்கங்களையே அதிகம் ஏற்படுத்தியிருப்பதாகத் தெரிவித்திருக்கிறார்கள்.
பொருளாதாரம்
இந்தியாவின் தொலைக்காட்சிப் பொருளாதாரம்:
இந்திய பொருளாதாரத்தில் தொலைக்காட்சித் துறை எந்தளவிற்கு பங்களிக்கிறது என்பது குறித்து தெரிந்து கொள்ள 2017ம் ஆண்டு ஒரு ஆய்வு மேற்கொள்ளப்பட்டிருக்கிறது.
அன்றைய தேதியிலேயே இந்தியா பொருளாதாரத்தில் சுமார் ரூ.73,000 கோடி மதிப்பிற்து நேரடித் தாக்கத்தையும், ரூ.1.54 லட்சம் கோடி மதிப்பிற்கு மறைமுகத் தாக்கத்தையும் ஏற்படுத்துவதாகக் குறிப்பிட்டிருக்கிறார்கள்.
மேலும், தொலைக்காட்சித் துறையானது நேரடியாக 2017ம் ஆண்டிலேயே 4.93 லட்சம் வேலைவாய்ப்புகளையும், மறைமுகமாக 16.44 லட்சம் வேலைவாய்ப்புகளையும் உருவாக்கியிருக்கிறது.
இந்தியாவில் சினிமாவை விட பெரிய துறை தொலைக்காட்சித் துறை தான் என்பதும் இங்கே குறிப்பிடத்தக்கது.
தினசரி பலதரப்பு மக்களின் வாழ்க்கையில் நேர்மறை மாற்றத்தை ஏற்படுத்தி வரும் தொலைக்காட்சியை நாமும் இந்த தினத்தில் கொண்டாடலாமே.