தூசி மாசு என்றால் என்ன? அது மனித ஆரோக்கியத்தை எவ்வாறு பாதிக்கும்?
செய்தி முன்னோட்டம்
தூசி மாசு என்பது இன்றைய சூழலில் நாம் எதிர்கொள்ளும் மிக முக்கியமான சுற்றுச்சூழல் பிரச்சினைகளில் ஒன்றாகும். இது நமது உடல்நலத்திற்குப் பெரும் தீங்கினை விளைவிக்கக்கூடியது. காற்றில் மிதக்கும் நுண் துகள்களின் (Particulate Matter) அதிகரிப்பால் இந்த மாசு ஏற்படுகிறது. கண்ணுக்குத் தெரியாத இத்தகைய நுண்துகள்கள், நாம் சுவாசிக்கும் காற்றின் வழியாக மிக எளிதாக நுரையீரலுக்குள் நுழையக்கூடியவை. இக்கட்டுரையில், தூசி மாசு என்பதன் வரையறை, அதில் அடங்கியுள்ள பல்வேறு வகைகள் மற்றும் அவை நமது ஆரோக்கியத்தில் ஏற்படுத்தும் தாக்கங்கள் குறித்து விரிவாகக் காண்போம்.
#1
தூசி மாசின் வகைகள்
தூசி மாசை அதன் துகள்களின் அளவைப் பொறுத்து முக்கியமாக இரண்டு வகைகளாகப் பிரிக்கலாம். அவை PM10 மற்றும் PM2.5 ஆகும். PM10 துகள்கள் 10 மைக்ரோமீட்டர் அல்லது அதற்கும் குறைவான விட்டம் கொண்ட துகள்களாகும். இவை நாம் சுவாசிக்கும் பொழுது சுவாசப் பாதையில் நுழைந்து பாதிப்புகளை ஏற்படுத்தக்கூடியவை. PM2.5 துகள்கள் 2.5 மைக்ரோமீட்டர் அல்லது அதற்கும் குறைவான விட்டம் கொண்ட மிக நுண்ணிய துகள்களாகும். இவை காற்றில் நீண்ட நேரம் மிதக்கும் தன்மை கொண்டவை. இந்த இரண்டு வகைகளிலும் PM2.5 துகள்கள் மிகவும் அபாயகரமானவை எனக் கருதப்படுகின்றன. ஏனெனில், இவை அவற்றின் மிகச்சிறிய அளவின் காரணமாக நுரையீரலின் மிக ஆழமான பகுதிகளுக்குச் செல்வதுடன், இரத்த ஓட்டத்திலும் கலக்கக்கூடும்.
#2
தூசி மாசு ஏற்படுவதற்கான காரணங்கள்
தூசி மாசு அதிகரிப்பதற்குப் பல்வேறு காரணிகள் பின்னணியாக உள்ளன. அவை குறித்து இங்கே விரிவாகக் காண்போம். கட்டிடக் கட்டுமானங்கள், சாலை விரிவாக்கப் பணிகள் மற்றும் சுரங்கத் தொழில்கள் மூலம் பெருமளவிலான சிமெண்ட் மற்றும் கல் துகள்கள் காற்றில் கலக்கின்றன. வாகனங்கள் வெளியேற்றும் நச்சுப் புகை, டயர்கள் தேய்மானத்தால் ஏற்படும் நுண் துகள்கள் மற்றும் தொழிற்சாலைகளின் செயல்பாடுகள் ஆகியவை மாசினைத் தீவிரப்படுத்துகின்றன. குப்பைகள் மற்றும் விவசாயக் கழிவுகளைத் திறந்த வெளியில் எரிப்பதன் மூலம் அதிகப்படியான புகை மற்றும் சாம்பல் துகள்கள் வளிமண்டலத்தில் சேருகின்றன. காலநிலையும் தூசி மாசில் பெரும் தாக்கத்தை ஏற்படுத்துகிறது. குறிப்பாக, வறண்ட காலநிலையின் போது ஈரப்பதம் குறைவதால், தூசித் துகள்கள் காற்றில் நீண்ட நேரம் மிதக்கும் தன்மை பெறுகின்றன.
#3
தூசி மாசால் உடல்நலத்திற்கு ஏற்படும் பாதிப்புகள்
தூசி மாசு மனித ஆரோக்கியத்திற்குப் பெரும் அச்சுறுத்தலாக விளங்குவதுடன், பல்வேறு தீவிரமான உடல்நலக் குறைபாடுகளுக்கும் வழிவகுக்கிறது. காற்றில் உள்ள நுண்துகள்கள் ஆஸ்துமா மற்றும் மூச்சுக்குழாய் அழற்சி போன்ற சுவாசம் தொடர்பான நீண்டகாலப் பிரச்சினைகளை உண்டாக்குகின்றன. சுவாசப் பாதையைத் தாண்டி இரத்த ஓட்டத்தில் கலப்பதன் மூலம் இதய நோய்கள், பக்கவாதம் மற்றும் நுரையீரல் புற்றுநோய் போன்ற உயிருக்கு ஆபத்தான நோய்கள் ஏற்படக் காரணமாகின்றன. குறிப்பாக நோய் எதிர்ப்புத் திறன் குறைவாக உள்ள சிறு குழந்தைகளையும் முதியவர்களையும் இம்மாசு அதிகளவில் பாதிக்கிறது. இது அவர்களின் ஒட்டுமொத்த வாழ்க்கைதரத்தையும் ஆரோக்கியத்தையும் பெருமளவு சீர்குலைக்கிறது. நீண்ட காலத்திற்குத் தூசிமாசு நிறைந்த சூழலில் வசிப்பதன் விளைவாக, நுரையீரலின் இயல்பான செயல்பாட்டுதிறன் படிப்படியாகக் குறைந்து, மூச்சுத்திணறல் போன்ற பாதிப்புகள் நிரந்தரமாகத் தங்கக்கூடும்.
#4
தூசி மாசிலிருந்து தற்காத்துக் கொள்ளும் வழிமுறைகள்
தூசி மாசின் பாதிப்பிலிருந்து தப்பிக்கச் சில எளிய நடைமுறைகளை நாம் அன்றாட வாழ்வில் கடைப்பிடிக்கலாம். நமது இல்லங்களையும் பணிபுரியும் இடங்களையும் சீரான இடைவெளியில் சுத்தப்படுத்துவதன் மூலம் தூசி படிவதைத் தவிர்க்க முடியும். வாகன உரிமையாளர்கள் தங்கள் வாகனங்களைப் புகைப் பரிசோதனை செய்து முறையாகப் பராமரிப்பது நச்சுப் புகை வெளியேற்றத்தைக் குறைக்க உதவும். தனிநபர் வாகனப் பயன்பாட்டைக் குறைத்துக்கொண்டு, பொதுப் போக்குவரத்து வசதிகளைப் பயன்படுத்துவது சுற்றுச்சூழலுக்குப் பெரும் நன்மையை அளிக்கும். வெளியில் செல்லும்போது தரமான முகக்கவசம் (Mask) அணிவது மற்றும் உட்புறக் காற்றைத் தூய்மையாக வைத்திருக்கக் காற்று சுத்திகரிப்பு கருவிகளைப் பயன்படுத்துவதும் சிறந்த பாதுகாப்பு முறைகளாகும்.
#5
தூசி மாசு குறித்த விழிப்புணர்வை மேம்படுத்தும் வழிமுறைகள்
தூசி மாசடைவது குறித்த விழிப்புணர்வை ஏற்படுத்துவது மிகவும் அவசியம். அப்போதுதான் மக்கள் இதன் பாதிப்புகளைப் புரிந்து கொண்டு, தற்காப்பு நடவடிக்கைகளை எடுக்க முடியும். பள்ளிகள், கல்லூரிகள் மற்றும் பொது நல மையங்களில் இது தொடர்பான விழிப்புணர்வு முகாம்களை நடத்தலாம். இதன் மூலம் மக்களுக்கு இந்தப் பிரச்சனை பற்றிய தெளிவான புரிதல் கிடைக்கும். அதுமட்டுமல்லாமல், சமூக வலைதளங்களைப் பயன்படுத்தியும் விழிப்புணர்வை மக்களிடம் கொண்டு சேர்க்கலாம். நாம் அனைவரும் ஒன்றிணைந்து செயல்பட்டால் மட்டுமே, மாசு இல்லாத ஆரோக்கியமான வாழ்வை வாழ முடியும்."