மெட்ராஸ் முதல் தமிழ்நாடு வரை: நவம்பர் 1 தமிழ்நாடு தினமாக அறிவிக்கப்பட்டதன் பின்னணி
செய்தி முன்னோட்டம்
மொழிவாரியாக மாநிலங்கள் பிரிக்கப்பட்டு ஒருங்கிணைந்த தமிழக எல்லைகள் உருவான வரலாற்றுச் சிறப்புமிக்க நவம்பர் 1-ஆம் தேதியே ஆண்டுதோறும் 'தமிழ்நாடு நாளாக' அதிகாரப்பூர்வமாக கொண்டாடப்படும் என்று முதல்வர் விஜய் தலைமையிலான தமிழக வெற்றிக் கழக அரசு அறிவித்துள்ளது. முன்னதாக 2019-ல் அதிமுக ஆட்சியில் நவம்பர் 1 தமிழ்நாடு நாளாக அறிவிக்கப்பட்டிருந்த நிலையில், 2021-ல் ஆட்சிக்கு வந்த மு.க.ஸ்டாலின் தலைமையிலான திமுக அரசு, அண்ணா சட்டப்பேரவையில் தீர்மானம் கொண்டுவந்த ஜூலை 18-ஆம் தேதியை தமிழ்நாடு நாளாக மாற்றியமைத்தது. இந்நிலையில், தற்போது பொறுப்பேற்றுள்ள தவெக அரசு மீண்டும் நவம்பர் 1-ஆம் தேதியை தமிழ்நாடு தினமாக அதிகாரப்பூர்வமாக அறிவித்து அரசாணை வெளியிட்டுள்ளது.
வரலாறு
மொழிவாரி மாநிலப் போராட்டங்கள்
1948-ல் மொழிவாரி மாநிலங்கள் தேவையில்லை என்ற எஸ்.கே.தார் குழுவின் பரிந்துரைக்குப் பின், நாடு முழுவதும் மொழிவாரி மாநிலக் கோரிக்கைகள் வலுப்பெற்றன.
குறிப்பாக தெலுங்கு மக்களுக்காகப் பொட்டி ஸ்ரீராமுலு நடத்திய 76 நாட்கள் உண்ணாவிரத மரணத்தைத் தொடர்ந்து, 1953-ல் ஆந்திரம் தனி மாநிலமானது.
இதைத் தொடர்ந்து நாடாளுமன்றத்தில் நிறைவேற்றப்பட்ட மாநில மறுசீரமைப்புச் சட்டம் - 1956-ன் பிரிவு 2-ன்படி, 1956 நவம்பர் 1 அன்று மொழிவாரி மாநிலங்கள் முறைப்படி நடைமுறைக்கு வந்தன.
திருவிதாங்கூர் - கொச்சி சமஸ்தானத்திலிருந்து அகஸ்தீஸ்வரம், தோவாளை, கல்குளம், விளவங்கோடு ஆகிய தாலுகாக்கள் பிரிக்கப்பட்டு கன்னியாகுமரி மாவட்டமாகவும், செங்கோட்டை திருநெல்வேலியுடனும் இணைக்கப்பட்டு மெட்ராஸ் மாநிலத்தின் புதிய எல்லைகள் வரையறுக்கப்பட்டன.
சங்கரலிங்கனார் தியாகம்
தமிழ்நாடு பெயர் மாற்ற வரலாறு
பிற மாநிலங்களுக்குத் தாய்மொழியின் பெயர்கள் சூட்டப்பட்ட போதிலும், சென்னை மாகாணத்திற்கு 'மெட்ராஸ் ஸ்டேட்' என்ற பெயரே தொடர்ந்தது.
இதற்கு எதிர்ப்பு தெரிவித்து விருதுநகரைச் சேர்ந்த சுதந்திரப் போராட்டத் தியாகி சங்கரலிங்கனார் 76 நாட்கள் உண்ணாவிரதம் இருந்து தன் உயிரைத் தியாகம் செய்தார்.
1957 மற்றும் 1961-ல் கொண்டுவரப்பட்ட பெயர் மாற்றத் தீர்மானங்களைத் தொடர்ந்து, அரசு ஆவணங்களில் மட்டும் 'தமிழ்நாடு' எனப் பயன்படுத்த காமராஜர் ஒப்புக்கொண்டார்.
பின்னர் 1967 ஜூலை 18-ல் அறிஞர் அண்ணா தலைமையிலான திமுக அரசு வரலாற்றுச் சிறப்புமிக்க பெயர் மாற்றத் தீர்மானத்தைச் சட்டப்பேரவையில் நிறைவேற்றியது. 1969 ஜனவரி 14 அன்று மெட்ராஸ் மாகாணம் அதிகாரப்பூர்வமாக 'தமிழ்நாடு' என்று பெயர் மாற்றப்பட்டது.
தேதி முரண்பாடு
தவெக அரசின் முடிவு
மெட்ராஸ் ஸ்டேட்டிலிருந்து பிறமொழிப் பகுதிகள் பிரிந்து, எல்லைகள் காக்கப்பட்ட தினமான நவம்பர் 1 எல்லைப் போராட்ட நாளாகவே பார்க்கப்பட வேண்டும் என்றும், அண்ணா பெயர் சூட்டிய ஜூலை 18 தான் தமிழ்நாடு தினமாகக் கொண்டாடப்பட வேண்டும் என்றும் திமுக அரசு வாதிட்டு வந்தது.
எனினும், நிலப்பரப்பு ரீதியாகத் தமிழ்நாடு தனது முழுமையான பூகோள எல்லைகளுடன் மறுசீரமைக்கப்பட்டு தனித்துவமான அடையாளத்தைப் பெற்ற நவம்பர் 1-ஆம் தேதியே மிகப்பொருத்தமானது என்பதை முன்னிறுத்தி, தவெக அரசு இந்த முடிவை எடுத்துள்ளது.