சிவகாசி கண்காட்சியில் பழங்கால விண்டேஜ் கேமரா - புகைப்பட கலைஞர் விளக்கம்
விருதுநகர் மாவட்டம் சிவகாசியில் நடக்கும் கண்காட்சி ஒன்றில் பழங்கால கேமராக்கள் காட்சிப்படுத்தப்பட்டுள்ளது. பழங்காலத்தில் விண்டேஜ் கேமராக்கள் தான் அதிகளவு பயன்பாட்டில் இருந்துள்ளது. முந்தைய காலகட்டத்தில் கேமரா என்பதே அபூர்வமான பொருளாக பார்க்கப்பட்டுள்ளது. இந்நிலையில், சிவகாசி கண்காட்சியில் காட்சிப்படுத்தப்பட்டுள்ள நூற்றாண்டு பழமையான விண்டேஜ் கேமராக்கள் எப்படி இருந்தது, எவ்வாறு செயல்பட்டது? என்று புகைப்பட கலைஞர் செல்வம் என்பவர் விளக்கம் அளித்துள்ளார். அவர் கூறியதாவது, "அப்போதைய கேமரா நிறுவனங்கள் 120 ரோல் கேமராக்களை தான் தயாரித்தது. அதில் 12 புகைப்படங்கள் மட்டுமே எடுக்கக்கூடிய வகையில் பிலிம் இருக்கும். 12 புகைப்படங்கள் எடுத்தப்பின்னர் மீண்டும் புதிய ரோலினை வைக்க வேண்டும்" என்று கூறியுள்ளார்.
முதன்முதலாக கண்டறியப்பட்ட கேமராவின் பெயர் 'ஒப்ஸ்க்யூரா'
மேலும் அவர், ஒவ்வொரு முறையும் ஒரு புகைப்படம் எடுத்தப்பின்னர் பிலிமை ஒருமுறை கழற்றினால் மட்டுமே அடுத்த படம் எடுக்கமுடியும் என்றும், டிஜிட்டல் கேமராக்களில் உள்ளது போல விண்டேஜ் கேமராக்களில் ஜும் செய்வது, போகஸ் செய்வது போன்ற வசதிகள் எதுவும் இருக்கவில்லை என்றும் கூறியுள்ளார். தற்போதைய காலகட்டத்தில் கையில் வைத்திருக்கும் மொபைல் போன் மூலம் நினைத்த நேரத்தில் யார் வேண்டுமானாலும் ஓர் புகைப்படத்தினை எடுத்து பார்த்து கொள்ள முடிகிறது. ஆனால் அந்த காலத்தில் புகைப்படம் எடுப்பது என்பது அறிவு சார்ந்த நுட்பமான வேலையாக கருதப்பட்டுள்ளது என்றும் அவர் தெரிவித்துள்ளார். முதன்முதலாக கண்டறியப்பட்ட கேமராவின் பெயர் 'ஒப்ஸ்க்யூரா', இது சூரிய ஒளியினை படம்பிடிக்க பயன்படுத்தப்பட்டது என்றும், இது அளவில் மிக பெரியதாக இருந்ததாகவும் தகவல்கள் தெரிவிக்கிறது.
இந்த காலவரிசையைப் பகிரவும்