எந்தப் பயிற்சியும் இன்றிச் செயல்படும் ரோபோ ஆசிரியரை உருவாக்கி அரசு பள்ளி மாணவர் சாதனை
செய்தி முன்னோட்டம்
உத்தரப்பிரதேச மாநிலம் புலந்த்சாஹரைச் சேர்ந்த 17 வயது மாணவர் ஆதித்யா, எவ்விதமான ரோபாட்டிக்ஸ் பயிற்சியும் பெறாமல், முழுமையாகச் செயல்படக்கூடிய சோபியா (Sophia) என்ற ரோபோ ஆசிரியரை உருவாக்கி அனைவரையும் ஆச்சரியத்தில் ஆழ்த்தியுள்ளார். கிராமப்புறங்களில் கல்வியை மேம்படுத்தும் நோக்கில் நிதி நெருக்கடிக்கு மத்தியிலும் இந்தச் சாதனையை அவர் நிகழ்த்தியுள்ளார். அரசு பள்ளியில் பன்னிரண்டாம் வகுப்புப் படிக்கும் ஆதித்யா, வகுப்புகள் முடிந்த பிறகு ஒயர்கள், சர்க்யூட்டுகள் மற்றும் உதிரிப் பாகங்களுடன் தன்னை ஈடுபடுத்திக் கொண்டார். ரோபாட்டிக்ஸ் பயிற்சி வகுப்புகள் எதற்கும் செல்லாமல், தன்னார்வம் மற்றும் சுய கற்றல் மூலம் ரோபோக்களை உருவாக்கத் தொடங்கினார். சோபியா ரோபோவை உருவாக்க அவரது தந்தை நண்பர்களிடம் பணம் கடன்பெற வேண்டியிருந்தது. இருந்தபோதிலும், குடும்பத்தினர் அவரது கனவுகளுக்கு ஊக்கமளித்தனர்.
நோக்கம்
ரோபோ ஆசிரியர் கண்டுபிடிப்பின் நோக்கம்
ஆதித்யாவின் கூற்றுப்படி, சோபியாவைக் கண்டுபிடித்ததன் பின்னணியில் ஒரு எளிய நோக்கம் உள்ளது. "சில சமயங்களில் ஆசிரியர்கள் வர முடியாதபோது, குழந்தைகளுக்கு வகுப்புகள் இல்லாமல் போய்விடுகின்றன. இந்தச் சிக்கலைத் தீர்க்க விரும்பினேன்." என அவர் கூறினார். சோபியா, ஒரு உண்மையான ஆசிரியர் போலவே மாணவர்களுடன் உரையாடி, கேள்வி கேட்கும் வகையில் வடிவமைக்கப்பட்டுள்ளது. ஆதித்யா, ரோபோ ஆசிரியர்கள் கிராமப்புறப் பள்ளிகளுக்கு மிகவும் பயனுள்ளதாக இருக்கும் என்று நம்புகிறார். சோபியா இந்தியாவின் இரண்டாவது ரோபோடிக் கற்பித்தல் உதவியாளர் என்றும், இது மற்ற இளம் கண்டுபிடிப்பாளர்களுக்கு ஊக்கமளிக்கும் என்றும் அவர் கூறுகிறார். மேலும், அரசு ஒவ்வொரு மாவட்டத்திலும் புதிய கண்டுபிடிப்புகளுக்கான ஆய்வகங்களை (Innovation Labs) அமைக்க வேண்டும் என்றும் அவர் வேண்டுகோள் விடுத்துள்ளார்.