சனாதனம் குறித்த பேச்சு - உதயநிதி ஸ்டாலினுக்கு எதிராக டெல்லி காவல்துறையில் புகார்
செய்தி முன்னோட்டம்
தமிழ்நாடு முற்போக்கு எழுத்தாளர்கள் கலைஞர்கள் சங்கம் சார்பில் நேற்று(செப்.,2) சென்னை தேனாம்பேட்டையில் உள்ள காமராஜர் அரங்கில் 'சனாதன ஒழிப்பு' மாநாடு நடத்தப்பட்டது.
இதில் அமைச்சர் உதயநிதி ஸ்டாலின் கலந்துகொண்டு பேசியுள்ளார்.
அவர் கூறியதாவது, "சனாதன ஒழிப்பு மாநாடு என்று பெயரிட்டு இதில் எனக்கு வாழ்த்துரை வழங்கும் வாய்ப்பை அளித்த நிர்வாக குழுவுக்கு முதலில் எனது நன்றிகளை தெரிவித்து கொள்கிறேன்" என்றும்,
"சனாதனம் என்பது எதிர்ப்பது அல்ல, ஒழிப்பதாகும். கொரோனா, டெங்கு, மலேரியா, போன்ற நோய்களை நாம் எதிர்க்க முயற்சிக்க மாட்டோம், ஒழித்துக்கட்ட தான் முயல்வோம். அதுபோல் தான் இந்த சனாதானமும்" என்று கூறியுள்ளார்.
அதனைத்தொடர்ந்து பேசிய அவர், "மக்களை சாதி வாரியாக பிரித்து தனித்து இருக்கவேண்டும் என சொன்னதுதான் சனாதனம்" என்றும் குறிப்பிட்டிருந்தார்.
புகார்
இருபிரிவினர் இடையே பகைமையை ஏற்படுத்தும் வகையில் பேசியுள்ளதாக குற்றச்சாட்டு
இந்நிலையில், உதயநிதியின் சட்டவிரோதமான இந்த பேச்சுக்கு சட்டப்படி அவர்மீது நடவடிக்கை எடுக்க வேண்டும் என்று கோரி உச்சநீதிமன்ற வழக்கறிஞரான வினீத் ஜிண்டால் புகாரளித்துள்ளார்.
இதுகுறித்து டெல்லி காவல்துறையில் அவர் கொடுத்த புகாரில், உதயநிதியின் பேச்சு சனாதன தர்மத்திற்கு எதிராக மக்களை தூண்டும் வகையிலும், இழிவுபடுத்தும் வகையிலும் உள்ளது.
கொசு, கொரோனா போன்றவற்றோடு இந்து மதத்தை ஒப்பிட்டுப்பேசி அதனை ஒழிக்கவேண்டும் என்றும் கூறியுள்ளார்.
இந்து என்ற முறையில் இந்த பேச்சு எனது உணர்வுகளை புண்படுத்தியுள்ளது என்று புகாரில் குறிப்பிட்டுள்ளார்.
மேலும் சமூகத்தில் இருப்பிரிவினர் இடையே இவரின் பேச்சு பகைமையை ஏற்படுத்தும் வகையில் அமைந்துள்ளது.
உதயநிதி பேசியது இந்திய தண்டனைச்சட்டம் 153A,153B,298,505,295A-உள்ளிட்ட பிரிவுகளின்கீழ் தண்டனைக்குரியது என்பதால் அவர்மீது எப்.ஐ.ஆர்.போட்டு நடவடிக்கை எடுக்கும்படி கேட்டுக்கொள்வதாக புகாரில் குறிப்பிட்டுள்ளார்.