லோகோ பைலட்டுகள் செல்போன் வைத்திருக்க தடை - ஒடிசா ரயில் விபத்தின் எதிரொலி
செய்தி முன்னோட்டம்
ஒடிசா மாநிலம் பாலசோர் பகுதியில் சரக்கு ரயில் மீது கோரமண்டல் எக்ஸ்பிரஸ் ரயிலும், ஹவுரா எக்ஸ்பிரஸ் ரயிலும் மோதி மாபெரும் விபத்தானது கடந்த சில தினங்களுக்கு முன்னர் நிகழ்ந்தது.
நாட்டையே உலுக்கிய இந்த ரயில் விபத்தில் 288 பேர் உயிரிழந்துள்ளனர், 800க்கும் மேற்பட்டோர் படுகாயமடைந்து மருத்துவமனைகளில் சிகிச்சை பெற்று வருகிறார்கள்.
கடந்த 1981ம் ஆண்டு ஏற்பட்ட பீகார் ரயில் விபத்தில் 800க்கும் மேற்பட்டோர் உயிரிழந்தனர்.
அதன் பின்னர் இந்தியாவில் ஏற்பட்ட மிகப்பெரிய ரயில் விபத்து இதுவாகும் என்று தகவல்கள் தெரிவிக்கிறது.
இந்த ரயில் விபத்தின் எதிரொலியாக ரயில்வே துறை பயணிகளின் பாதுகாப்பினை உறுதி செய்ய பல நடவடிக்கைகளை தற்போது எடுத்து வருகிறது.
லோகோ பைலட்
போன் ஆப் செய்யப்பட்டிருப்பது அவ்வப்போது உறுதி செய்யப்படும்
அதன்படி, இனி ரயில்களை இயக்கும் லோகோ பைலட்டுக்கள் ஸ்மார்ட் வாட்ச் மற்றும் மொபைல் போன் வைத்திருக்க கூடாது என்று தடை விதித்து ரயில்வே நிர்வாகம் அதிரடி உத்தரவினை பிறப்பித்துள்ளது.
இதனிடையே, முன்னதாகவே பணியில் இருக்கும் பொழுது பணியாளர்கள் மொபைல் போன் பயன்படுத்த தடை விதிக்கப்பட்டிருந்தது என்பதையும் ரயில்வே நிர்வாகம் சுட்டிக்காட்டியுள்ளது.
இதனை தொடர்ந்து, ரயில்வே நிர்வாகமானது, 'மொபைல் போன் ஆப் செய்யப்பட்டிருப்பதை உறுதி செய்யும் சோதனைகள் தொடர்ந்து மேற்கொள்ளப்படும்' என்று தெரிவித்துள்ளது.
மேலும், 'ஆப் செய்யப்பட்டிருக்கும் போனையும் அருகில் வைத்திருக்கவும் தடை விதிக்கப்பட்டுள்ளது' என்று தெரிவித்துள்ளது.
அதே போல், ரயில்களை இயக்கும் பைலட்டுகளின் கவனம் மற்றும் இயக்கும் திறன் உள்ளிட்டவையும் தொடர்ந்து கண்காணிக்கப்படவுள்ளது என்று கூறப்பட்டுள்ளது குறிப்பிடத்தக்கது.