காஷ்மீரில் கட்டப்பட்ட ஏழுமலையான் கோயில் - அமித்ஷா திறந்து வைத்தார்
செய்தி முன்னோட்டம்
ஆந்திரா மாநிலத்தில் அமைந்துள்ளது திருப்பதி ஏழுமலையான் கோயில்.
இக்கோயிலுக்கு வெளிமாவட்டம், மாநிலம் இன்றி வெளிநாடுகளில் இருந்தும் பக்தர்கள் வருகைத்தந்து சாமி தரிசனம் செய்து செல்வது வழக்கம்.
உலகத்திலேயே பணக்கார தெய்வமாக கருதப்படும் ஏழுமலையான் கோயிலுக்கு வரும் பக்தர்கள் நகை, பணம் உள்ளிட்டவற்றினை காணிக்கையாக செலுத்தி வருகிறார்கள்.
அத்தகைய சிறப்புமிக்க இக்கோயிலில் சாதாரண நாட்களிலேயே அதிகளவு கூட்டம் இருக்கும் நிலையில், விடுமுறை தினங்கள், புரட்டாசி மாதம் போன்ற திருவிழா நாட்களின்போது பக்தர்கள் கூட்டம் பெருமளவு அதிகரிக்கிறது.
இதனிடையே திருப்பதியில் உள்ளது போலவே இந்தியாவின் மற்ற இடங்களிலும் திருப்பதி ஏழுமலையான் கோயிலினை கட்டலாம் என்று திருப்பதி தேவஸ்தானம் முடிவுச்செய்தது.
இதன்படி தமிழ்நாடு மாநிலத்தில் சென்னை,கன்னியாகுமரி உள்ளிட்ட மாவட்டங்களில் ஏற்கனவே ஏழுமலையான் கோயில் கட்டிமுடித்து திறந்து வைக்கப்பட்டுள்ளது.
திருப்பதி
62 ஏக்கர் பரப்பளவில் 25 கோடி மதிப்பில் ஏழுமலையான் கோயில்
இதனை தொடர்ந்து, அடுத்ததாக காஷ்மீரில் கோயிலினை அமைக்க தேவஸ்தானம் முடிவு செய்தது என்று கூறப்படுகிறது.
அதன்படி அங்கு கோயில் அமைக்க 7 இடங்கள் பரிந்துரை செய்யப்பட்ட நிலையில், 4 இடங்களை தேவஸ்தான அதிகாரிகள் நேரில் சென்று ஆய்வு மேற்கொண்டனர்.
பின்னர் குறிப்பிட்ட இடத்தினை தேர்வு செய்த அதிகாரிகள், உரிய அனுமதிகள் அனைத்தையும் பெற்றுள்ளனர்.
அதனையடுத்து தேர்வு செய்யப்பட்ட இடத்தில் கட்டுமான பணிகள் துவங்கி நடந்து வந்தது.
ஜம்மு&காஷ்மீர் சித்ரா என்னும் பகுதியில் 62 ஏக்கர் பரப்பளவில் 25 கோடி மதிப்பில் ஏழுமலையான் கோயில் தற்போது கட்டி முடிக்கப்பட்டுள்ளது.
மிக பிரமாண்டமாக கட்டப்பட்டுள்ள இக்கோயிலினை இன்று(ஜூன்.,8) மத்திய உள்துறை அமைச்சர் அமித்ஷா அவர்கள் திறந்து வைத்துள்ளார் என்பது குறிப்பிடத்தக்கது.