தூய்மை படுமோசம்; இந்தியாவின் மிக அசுத்தமான நகரங்கள் பட்டியலில் டாப் 5இல் 2 தமிழக நகரங்கள்
செய்தி முன்னோட்டம்
பிரதமரின் தூய்மை இந்தியா திட்டத்தின் கீழ் கடந்த பத்தாண்டுகளாகப் பிரச்சாரங்கள் மேற்கொள்ளப்பட்ட போதிலும், இந்தியாவின் நகர்ப்புறத் தூய்மை நிலைமை இன்னும் சவாலாகவே உள்ளது என்பதை ஸ்வச் சர்வேக்ஷன் 2025 (Swachh Survekshan 2025) அறிக்கை வெளிப்படுத்தியுள்ளது. ஒரு மில்லியனுக்கும் அதிகமான மக்கள் தொகை கொண்ட இந்திய நகரங்களின் தரவரிசையில், நாட்டின் முக்கியப் பொருளாதார மற்றும் தொழில்நுட்ப மையங்கள் பின்னுக்குத் தள்ளப்பட்டுள்ளன. நாட்டின் தொழில்நுட்பத் தலைநகரான பெங்களூர், இந்த ஆய்வில் இந்தியாவின் ஐந்தாவது அசுத்தமான நகரம் என்ற விரும்பத்தகாத இடத்தைப் பிடித்துள்ளது. நகரத்தின் கட்டுப்பாடு இல்லாத விரைவான வளர்ச்சி மற்றும் நிலையற்ற கழிவு மேலாண்மை ஆகியவை இந்த மோசமான தரவரிசைக்கு முக்கியக் காரணமாகும்.
தமிழகம்
தமிழக நகரங்களின் நிலை
தமிழ்நாட்டின் நிலைமை மேலும் கவலை அளிக்கிறது. ஆன்மீக நகரமான மதுரை 4,823 மதிப்பெண்களுடன் அசுத்தமான நகரங்கள் பட்டியலில் முதலிடம் பிடித்துள்ளது. தலைநகரான சென்னை 6,822 மதிப்பெண்களுடன் மூன்றாவது அசுத்தமான நகரமாக அறிவிக்கப்பட்டுள்ளது. கழிவுகளைப் பிரித்தெடுத்தல் மற்றும் மறுசுழற்சி முயற்சிகளில் முதலீடு செய்தபோதிலும், குறைந்த குடிமக்கள் பங்கேற்பு மற்றும் உள்கட்டமைப்பு குறைபாடுகள் இந்தச் சரிவுக்குக் காரணமாக இருக்கலாம் என்று நிபுணர்கள் கருதுகின்றனர். இந்த அறிக்கை, டெல்லி மற்றும் மும்பை போன்ற இந்தியாவின் முக்கிய நகரங்கள் கூட அடிப்படைத் தூய்மையில் போராடுவதைக் காட்டுகிறது. இதற்கு மாறாக, இந்தூர், சூரத் மற்றும் நவி மும்பை போன்ற நடுத்தர நகரங்கள் தொடர்ந்து தூய்மையான நகரங்களில் முன்னணி இடங்களைப் பிடித்து சூப்பர் ஸ்வச் லீக்கில் இடம்பிடித்துள்ளன.