'இது அப்பட்டமான திருட்டு!' ஐ-பேக் சோதனையில் குறுக்கிட்ட மம்தா? உச்ச நீதிமன்றத்தின் அதிரடி உத்தரவு!
செய்தி முன்னோட்டம்
மேற்கு வங்காள ஆளும் கட்சியான திரிணாமுல் காங்கிரஸின் தேர்தல் வியூக ஆலோசனை நிறுவனமான ஐ-பேக் அலுவலகத்தில் கடந்த வாரம் அமலாக்கத்துறை (ED) சோதனையிட்டது. அப்போது முதலமைச்சர் மம்தா பானர்ஜி குறுக்கிட்டு ஆதாரங்களை எடுத்துச் சென்றதாக அமலாக்கத்துறை உச்ச நீதிமன்றத்தில் வழக்குத் தொடர்ந்திருந்தது. வியாழக்கிழமை (ஜனவரி 15) இந்த வழக்கினை விசாரித்த உச்சநீதிமன்றம், இது ஒரு மிகவும் தீவிரமான விவகாரம் என்று கருத்து தெரிவித்துள்ளது.
திருட்டு
திருட்டு போன்ற செயல் என வாதம்
உச்ச நீதிமன்றத்தில் அமலாக்கத்துறை சார்பில் ஆஜரான சொலிசிட்டர் ஜெனரல் துஷார் மேத்தா, "மத்திய விசாரணை முகமைகள் தங்களது கடமையைச் செய்யும்போது முதலமைச்சர் குறுக்கிடுவது ஒரு அதிர்ச்சியூட்டும் போக்காக மாறியுள்ளது. ஐ-பேக் அலுவலகத்திற்குள் அத்துமீறி நுழைந்த மம்தா பானர்ஜி, அங்கிருந்த டிஜிட்டல் சாதனங்கள் மற்றும் முக்கிய ஆவணங்களை வலுக்கட்டாயமாக எடுத்துச் சென்றுவிட்டார். இது ஒரு திருட்டு போன்ற செயலாகும்" என்று வாதிட்டார். மேலும், இதற்குத் துணை நின்ற மாநில டி.ஜி.பி. உட்பட மூத்த காவல்துறை அதிகாரிகளைப் பணியிடை நீக்கம் செய்ய வேண்டும் என்றும் கோரிக்கை வைத்தார்.
பதில்
மம்தா பானர்ஜி மற்றும் திரிணாமுல் காங்கிரஸ் கட்சியின் பதில்
மம்தா பானர்ஜி தரப்பில் ஆஜரான மூத்த வழக்கறிஞர் கபில் சிபல், இந்தக் குற்றச்சாட்டுகளை முற்றிலுமாக மறுத்தார். "அமலாக்கத்துறை சோதனையிட்ட இடம் ஒரு கட்சியின் தேர்தல் தரவுகளைக் கொண்ட பகுதி. தேர்தலுக்குச் சில மாதங்களே உள்ள நிலையில், கட்சியின் ரகசியத் தகவல்களைத் திருடவே இந்தச் சோதனை நடத்தப்பட்டது. மம்தா பானர்ஜி அங்கிருந்து எதையும் திருடவில்லை; கட்சியின் சொத்துக்களைப் பாதுகாக்கவே அங்கு சென்றார்" என்று வாதிட்டார். மேலும், 2024 ஆம் ஆண்டுக்குப் பிறகு இப்போது தேர்தல் நேரத்தில் இந்தச் சோதனையை நடத்துவது உள்நோக்கம் கொண்டது என்றும் அவர் குறிப்பிட்டார்.
உத்தரவு
உச்சநீதிமன்றத்தின் அதிரடி உத்தரவு
இருதரப்பு வாதங்களையும் கேட்ட உச்ச நீதிமன்ற நீதிபதிகள் பிரசாந்த் குமார் மிஸ்ரா மற்றும் விபுல் பஞ்சோலி ஆகியோர் அடங்கிய அமர்வு கீழ்க்கண்ட முக்கிய உத்தரவுகளைப் பிறப்பித்தது: மேற்கு வங்க அரசு மற்றும் முதலமைச்சர் மம்தா பானர்ஜிக்கு இந்த விவகாரம் குறித்து நோட்டீஸ் அனுப்பப்பட்டது. ஐ-பேக் அலுவலகத்தில் நடந்த சோதனையின் சிசிடிவி காட்சிகளைப் பத்திரமாகப் பாதுகாக்க மாநில காவல்துறைக்கு உத்தரவிடப்பட்டது. அமலாக்கத்துறை அதிகாரிகளுக்கு எதிராக மாநில அரசு பதிவு செய்துள்ள எப்ஐஆர் மற்றும் பிற சட்ட நடவடிக்கைகளுக்குத் தடை விதிக்கப்பட்டது. ஒரு மாநிலத்தின் பாதுகாப்பு வளையத்தைப் பயன்படுத்தி குற்றவாளிகள் தப்பிக்க அனுமதிக்க முடியாது என்று கூறிய நீதிபதிகள், இந்த வழக்கு குறித்த அடுத்த விசாரணையை பிப்ரவரி 3 ஆம் தேதிக்கு ஒத்திவைத்தனர்.