டிஜிட்டல் கைது மோசடி: நாடு முழுவதும் விசாரிக்க சிபிஐக்கு உச்ச நீதிமன்றம் முழு அதிகாரம்
செய்தி முன்னோட்டம்
இந்தியாவில் அதிவேகமாகப் பரவி வரும் டிஜிட்டல் கைது மோசடி வழக்குகளைக் கையாள்வதற்கு உடனடியாக தேசிய அளவில் கவனம் தேவை என்று உச்ச நீதிமன்றம் வலியுறுத்தியுள்ளது. இந்த வழக்குகளைத் தானாக முன்வந்து விசாரணைக்கு எடுத்துக் கொண்ட நீதிமன்றம், இது தொடர்பாக பதிவு செய்யப்பட்ட அனைத்து எஃப்ஐஆர்களையும் சிபிஐயிடம் ஒப்படைக்க உத்தரவிட்டுள்ளது. தலைமை நீதிபதி சூர்யா காந்த் மற்றும் நீதிபதி ஜோய்மால்யா பாக்சி ஆகியோர் அடங்கிய அமர்வு, எதிர்க்கட்சிகள் ஆளும் மேற்கு வங்கம், தமிழ்நாடு, கர்நாடகா, தெலங்கானா உள்ளிட்ட அனைத்து மாநிலங்களும் தங்கள் அதிகார வரம்பிற்குள் சிபிஐ விசாரணை நடத்த உடனடியாக ஒப்புதல் அளிக்க வேண்டும் என்று உத்தரவிட்டது. சிபிஐ இனி இந்த மோசடி தொடர்பான ஒவ்வொரு வழக்கையும் விசாரிக்க முழு அதிகாரம் வழங்கப்பட்டுள்ளது.
உத்தரவு
ரிசர்வ் வங்கி மற்றும் மாநில அரசுகளுக்கு உத்தரவு
சைபர் மோசடியில் பயன்படுத்தப்பட்ட வங்கிக் கணக்குகள் குறித்துச் சிபிஐ விசாரிக்கும்போது, சம்பந்தப்பட்ட வங்கி அதிகாரிகளின் பங்கையும் ஆய்வு செய்ய உச்ச நீதிமன்றம் அனுமதி அளித்துள்ளது. இந்த மோசடிக்கு வசதி செய்யும் நோக்குடன் கணக்குகள் தொடங்கப்பட்டிருந்தால், ஊழல் தடுப்புச் சட்டத்தின் கீழ் சிபிஐ விசாரிக்கலாம் என்றும் தெளிவுபடுத்தப்பட்டுள்ளது. வங்கித் துறையில் சந்தேகத்திற்கிடமான கணக்குகளை அடையாளம் காணவும், சட்டவிரோதப் பணத்தை முடக்கவும் செயற்கை நுண்ணறிவு (ஏஐ) கருவிகளை எப்போது பயன்படுத்துவது என்பதைத் தீர்மானிக்க நீதிமன்றத்திற்கு உதவுமாறு உச்ச நீதிமன்றம் ரிசர்வ் வங்கிக்கு (ஆர்பிஐ) நோட்டீஸ் அனுப்பியுள்ளது. மேலும், தகவல் தொழில்நுட்ப விதிகள் 2021இன் கீழ் உள்ள அதிகாரிகள் சிபிஐக்கு முழு ஒத்துழைப்பு அளிக்க வேண்டும் என்றும் உத்தரவிடப்பட்டுள்ளது.