புதிய நாடாளுமன்ற திறப்பு விழாவை முன்னிட்டு 75 ரூபாய் நாணயம் வெளியிடப்படும்
செய்தி முன்னோட்டம்
புதிய நாடாளுமன்ற கட்டிட திறப்பு விழாவை நினைவுகூரும் வகையில் 75 ரூபாய் நாணயம் வெளியிடப்படும் என நிதியமைச்சகம் நேற்று(மே 26) அறிவித்துள்ளது.
இந்தியாவின் 75 ஆண்டு சுதந்திர தினத்தை கொண்டாடும் வகையில் இந்த ரூ.75 நாணயம் வெளியிடப்பட இருக்கிறது.
நாணயத்தின் ஒரு பக்கத்தில் அசோக தூணின் சிங்க தலை பொறிக்கப்பட்டிருக்கும். அதற்கு கீழே "சத்யமேவ் ஜெயதே"(வாய்மையே வெல்லும்) என்ற வாசகம் எழுதப்பட்டிருக்கும்.
இடது பக்கத்தில் "பாரத்" என்ற வார்த்தை தேவநாகரி எழுத்துகளிலும், வலதுபுறத்தில் "இந்தியா" என்ற வார்த்தை ஆங்கிலத்திலும் எழுதப்பட்டிருக்கும்.
மேலும், சிங்க தலை சின்னத்திற்கு கீழே "₹ 75" என்று ரூபாயின் மதிப்பு எழுதப்பட்டிருக்கும்.
நாணயத்தின் மறுபக்கத்தில் நாடாளுமன்ற வளாகத்தின் படம் பொறிக்கப்பட்டிருக்கும்.
details
புதிய நாடாளுமன்ற கட்டிடத்தை பிரதமர் நரேந்திர மோடி திறந்து வைப்பார்
அதற்கு மேலே "சன்சாத் சங்குல்" என்ற வார்த்தைகள் தேவநாகரி எழுத்துக்களிலும், அதற்கு கீழே "பார்லிமென்ட் காம்ப்ளெக்ஸ்"(Parliament Complex) என்ற வார்த்தை ஆங்கிலத்திலும் எழுதப்பட்டிருக்கும்.
இது 44 மில்லிமீட்டர் விட்டம் கொண்ட வட்ட வடிவிலான நாணயமாக வடிவமைக்கப்பட்டிருக்கும். அதன் விளிம்புகளில் 200 வரிகள் இருக்கும்.
35 கிராம் எடை கொண்ட இந்த நாணயம் 50% வெள்ளி, 40% செம்பு, 5% நிக்கல் மற்றும் 5% துத்தநாகம் ஆகியவற்றால் தயாரிக்கப்படும்.
புதிய நாடாளுமன்ற கட்டிடத்தை பிரதமர் நரேந்திர மோடி வரும் ஞாயிற்றுக்கிழமை திறந்து வைக்கிறார்.
இந்த விழாவில் 25 கட்சிகள் பங்கேற்கும் என்று எதிர்பார்க்கப்பட்ட நிலையில், குறைந்தது 20 எதிர்க்கட்சிகள் இந்த நிகழ்வைப் புறக்கணிக்க முடிவு செய்துள்ளன.