திருச்செந்தூர் அருகே பரிதாபம் - திடீர் வெடிச்சத்தம் கேட்டு 10 வயது பள்ளி மாணவன் பலி
திருச்செந்தூர் அருகே, பள்ளி மாணவன் விளையாடி கொண்டிருக்கையில் திடீரென ஓர் பலத்த வெடிச்சத்தத்தை கேட்டு மயங்கி சுருண்டு விழுந்துள்ளான். அவனை மருத்துவமனைக்கு கொண்டு சிகிச்சை அளிக்கப்பட்டதையடுத்து சிகிச்சை பலனின்றி பரிதாபமாக இறந்தான். இது குறித்து தற்போது வழக்கு பதிவு செய்து விசாரணை மேற்கொள்ளப்பட்டு வருகிறது. திருச்செந்தூர் மாவட்டம் அருகே தோப்பூர் என்னும் கிராமத்தை சேர்ந்தவர் சிவபெருமாள். இவருக்கு செல்வக்குமாரி என்னும் மனைவியும், 10 வயதில் அஜய் என்னும் மகன் உள்பட இரண்டு மகன்களும் உள்ளனர். சிவபெருமாள் மகனான அஜய்குமார் அந்த பகுதியிலுள்ள ஆதிதிராவிடர் நல தொடக்கப்பள்ளியில் 5ம் வகுப்பு படித்து வருகிறார். அரையாண்டு பள்ளி விடுமுறை என்பதால், அந்த பள்ளியில் கழிப்பிட பராமரிப்பு பணி நடைபெற்றுள்ளது.
சிகிச்சை பலனின்றி பாளையங்கோட்டை அரசு மருத்துவமனையில் பரிதாபமாக உயிரிழந்த மாணவன் அஜய்குமார்
சம்பவ தினத்தன்று அஜய்குமார் தனது நண்பர்களோடு அப்பகுதியில் விளையாடி கொண்டிருந்ததாக கூறப்படுகிறது. அப்போது அங்கு திடீரென பயங்கரமான வெடிச்சத்தம் ஒன்று கேட்டுள்ளது. இதனையடுத்து அஜய்குமார் மயக்கம் போட்டு விழுந்துள்ளான். அதில் அவனுக்கு தலையில் காயம் ஏற்பட்டதால், அவனுக்கு முதலுதவி செய்யப்பட்டுள்ளது. பின்னர் அவனை மீட்டு நெல்லையில் உள்ள தனியார் மருத்துவமனையில் சேர்த்துள்ளனர். அதன்பின்னர் அஜய்குமாரை மேல் சிகிச்சைக்காக நெல்லை அரசு மருத்துவமனைக்கு கொண்டு சேர்த்துள்ளனர். அங்கு மாணவனின் உடல்நிலை மோசமடைந்ததால் பாளையங்கோட்டை அரசு மருத்துவமனைக்கு கொண்டு அவசர சிகிச்சைக்காக சேர்த்துள்ளனர். எனினும் அச்சிறுவன் சிகிச்சை பலனின்றி இன்று காலையில் உயிரிழந்துள்ளான். இதனையடுத்து பள்ளி நிர்வாகம் மீது நடவடிக்கை எடுக்க கோரி அச்சிறுவனின் உறவினர்கள் உடலை வாங்காமல் மருத்துவமனை வாசலில் போராட்டம் நடத்தியதாக கூறப்படுகிறது.
