ஈஷா அறக்கட்டளைக்கு ஆதரவான சென்னை உயர்நீதிமன்ற தீர்ப்பை உறுதி செய்தது உச்ச நீதிமன்றம்
செய்தி முன்னோட்டம்
தமிழ்நாடு மாசுக்கட்டுப்பாட்டு வாரியம் ஈஷா அறக்கட்டளைக்கு எதிராக பிறப்பித்த நோட்டீஸை ரத்து செய்த சென்னை உயர்நீதிமன்றத்தின் 2022 ஆம் ஆண்டு தீர்ப்பை உச்ச நீதிமன்றம் உறுதி செய்துள்ளது. குறிப்பிட்ட சுற்றுச்சூழல் அனுமதிகள் இல்லாமல் 2006 மற்றும் 2014 க்கு இடையில் அறக்கட்டளையின் கோயம்புத்தூர் வளாகத்தில் மேற்கொள்ளப்பட்ட கட்டுமான நடவடிக்கைகள் தொடர்பான நோட்டீஸ் இது என்பது குறிப்பிடத்தக்கது. யோகா மற்றும் தியான மையத்திற்கு எதிராக எந்தவொரு கட்டாய நடவடிக்கையும் எடுக்கக்கூடாது என்று நீதிபதி சூர்யா காந்த் மற்றும் நீதிபதி என்.கே.சிங் ஆகியோர் அடங்கிய அமர்வு தீர்ப்பளித்தது. அனைத்து சட்ட விதிகளையும் கடைப்பிடித்து வருவதாக ஈஷா அறக்கட்டளை கூறியதை ஏற்றுக்கொண்ட நீதிமன்றம், எந்தவொரு எதிர்கால விரிவாக்க பணிகளுக்கும் அதிகாரிகளிடமிருந்து ஒப்புதல்களைப் பெற வேண்டும் என்று உத்தரவிட்டது.
கல்வி நிறுவனம்
ஈஷா அறக்கட்டளையை கல்வி நிறுவனமாக வகைப்படுத்திய சென்னை உயர்நீதிமன்றம்
ஈஷா அறக்கட்டளையை ஒரு கல்வி நிறுவனமாக சென்னை உயர்நீதிமன்றம் முன்னர் வகைப்படுத்தியது. அதன் அடிப்படையில், மத்திய அரசின் விதிமுறைகளின் கீழ் முன் சுற்றுச்சூழல் அனுமதி தேவைப்படுவதிலிருந்து விலக்கு அளித்தது. இந்த வகைப்பாடு அறக்கட்டளையின் யோகா மற்றும் குழு மேம்பாட்டு நடவடிக்கைகளை அடிப்படையாகக் கொண்டது. இதற்கிடையே, மாசு கட்டுப்பாட்டு வாரியத்தின் மேல்முறையீட்டில் ஏற்பட்டுள்ள குறிப்பிடத்தக்க தாமதத்தையும் உச்ச நீதிமன்றம் குறிப்பிட்டது. தாமதமான மனுக்களை பரிசீலிக்கும்போது, சாதாரண குடிமக்களை விட வசதி படைத்தவர்களுக்கு ஏன் முன்னுரிமை அளிக்க வேண்டும் என்று கேள்வி எழுப்பியது. 600 நாட்களுக்கு மேல் தாமதங்கள் வழக்கமாக ஏற்றுக்கொள்ளப்பட்டால், அது நீதித்துறை செயல்பாட்டில் ஏற்றத்தாழ்வை உருவாக்கும் என்று நீதிபதி சூர்யா காந்த் குறிப்பிட்டார்.