பெண்களுக்கு ரூ.1000 உரிமைத்தொகை - பயனாளிகளை தேர்வு செய்ய சிறப்பு முகாம்கள்
செய்தி முன்னோட்டம்
தமிழ்நாடு மாநிலத்தில் பெண்களுக்கு மாதந்தோறும் உரிமைத்தொகையாக ரூ.1000 தரப்படும் என்று தேர்தல் வாக்குறுதியாக தற்போதைய ஆளும்கட்சியான திமுக கூறியிருந்தது.
அதேப்போல் இத்திட்டம் குறித்த அறிவிப்பு இந்தாண்டு நிதிநிலை அறிக்கையிலும் இடம்பெற்றிருந்தது.
அப்போது இந்த திட்டம் குறித்த விளக்கத்தினையும் தமிழக முதல்வர் மு.க.ஸ்டாலின் சட்டப்பேரவையில் கூறியிருந்தார்.
அதன்படி, மீனவ மகளிர், நடைபாதையில் வணிகம் செய்வோர், ஒருநாளைக்கு பல்வேறு வீடுகளில் வீட்டுவேலை செய்யும் பெண்கள், கட்டுமானத்தொழில் செய்யும் பெண்கள், சிறியக்கடைகள்-வணிக கடைகள் போன்ற சிறுசிறு நிறுவனங்களில் பணிபுரிந்து குறைந்தளவு வருமானம் பெறும் பெண்கள் போன்றோருக்கு இந்த உரிமைத்தொகை அவரவர் வங்கிக்கணக்கிலேயே நேரடியாக செலுத்தப்படும் என்று அவர் தெரிவித்திருந்தார்.
இதன்படி, தமிழகத்திலுள்ள சுமார் ஒரு கோடி பெண்களுக்கு இந்த உரிமைத்தொகையினை வழங்க தமிழக அரசு முடிவு செய்துள்ளது.
தொகை
நியாய விலை கடைகளின் அருகிலேயே சிறப்பு முகாம்கள்
இந்நிலையில் தற்போது தமிழகத்தில் இந்த உரிமைத்தொகையினைப்பெற தகுதியான பெண்களை தேர்ந்தெடுக்கவும், அவர்களின் விவரங்களை சேகரிக்கவும் ஏதுவாக சிறப்பு முகாம்களை அமைக்க தமிழக அரசு முடிவு செய்துள்ளது.
இந்த முகாம்கள் நியாய விலை கடைகளின் அருகிலேயே அமைக்கவும் உத்தரவு பிறப்பிக்கப்பட்டுள்ளது.
வருவாய்த்துறை அலுவலர்கள் கொண்டு இந்த சிறப்பு முகாம்கள் நடைபெறவுள்ளது என்றும் கூறப்பட்டுள்ளது.
இதனையடுத்து நியாயவிலை கடைகளுக்கு வரும் பெண்கள் அருகிலுள்ள முகாமிற்கு சென்று தங்கள் விவரங்களை அளிக்கலாம்.
இந்த முகாம்கள் மூலம் பெண்களின் ஆதார்எண், வங்கிக்கணக்கு எண், எவ்விதக்குடும்ப அட்டை வைத்துள்ளனர், அவர்களுக்கு குடும்பத்தில் உள்ளோர் செய்யும் தொழில் குறித்த விவரங்கள் உள்ளிட்டவை சேகரிக்கப்படும் என்று கூறப்படுகிறது.
அடுத்த வாரத்தில் இருந்து இந்த முகாம்கள் மாநிலம் முழுவதும் துவங்கவுள்ளது என்றும் அறிவிக்கப்பட்டுள்ளது குறிப்பிடத்தக்கது.