பணியாளர்கள் பணி நேரத்திற்குப் பின் 'தொடர்பைத் துண்டிக்கும் உரிமை' மசோதா மக்களவையில் அறிமுகம்
செய்தி முன்னோட்டம்
அலுவலக வேலை நேரம் முடிந்த பிறகும், விடுமுறை நாட்களிலும் பணி சார்ந்த அழைப்புகள் மற்றும் மின்னஞ்சல்களுக்குப் பதிலளிப்பதைத் தவிர்க்கும் உரிமையை ஊழியர்களுக்கு வழங்கும் நோக்கில், 'தொடர்பைத் துண்டிக்கும் உரிமை மசோதா, 2025' (Right to Disconnect Bill, 2025) மக்களவையில் அறிமுகப்படுத்தப்பட்டுள்ளது. தேசியவாத காங்கிரஸ் கட்சியின் (NCP) எம்.பி. சுப்ரியா சுலே இந்தத் தனிநபர் மசோதாவைச் சமர்ப்பித்தார். இந்த மசோதா ஒரு ஊழியர் நல ஆணையத்தை (Employees' Welfare Authority) உருவாக்கவும், ஒவ்வொரு ஊழியருக்கும் அதிகாரப்பூர்வ வேலை நேரத்திற்கு அப்பாற்பட்டு, வேலை தொடர்பான அழைப்புகள் மற்றும் ஈமெயில் போன்ற தொடர்புகளைத் துண்டிக்க உரிமை வழங்கவும் முன்மொழிகிறது. மேலும், இத்தகைய தகவல்தொடர்புகளுக்குப் பதிலளிக்க மறுக்கும் உரிமையையும் இது உள்ளடக்கியுள்ளது.
மசோதாக்கள்
பிற முக்கிய மசோதாக்களும் தனிநபர் மசோதாக்களாக அறிமுகம்
மாதவிடாய் காலப் பலன்கள் மசோதா, 2024: காங்கிரஸ் எம்.பி. கடியம் காவ்யா அறிமுகப்படுத்திய இந்த மசோதா, பணியிடங்களில் பெண்களுக்கு மாதவிடாய் காலத்தில் வசதிகள் மற்றும் ஆதரவை வழங்குவதை நோக்கமாகக் கொண்டது. நீட் (NEET) விலக்கு மசோதா: தமிழ்நாடு இளங்கலை மருத்துவ சேர்க்கைகளுக்கான நீட் தேர்வில் இருந்து தமிழ்நாட்டிற்கு விலக்கு அளிக்கும் மசோதாவை காங்கிரஸ் எம்.பி. மாணிக்கம் தாக்கூர் அறிமுகப்படுத்தினார். மரண தண்டனை ஒழிப்பு மசோதா: திமுக எம்பி கனிமொழி கருணாநிதி, இந்தியாவில் மரண தண்டனையை ஒழிக்கக் கோரும் மசோதாவைச் சமர்ப்பித்தார். பொதுவாக, தனிநபர் மசோதாக்கள் அரசாங்கத்தின் பதில் கிடைத்த பிறகு திரும்பப் பெறப்பட்டாலும், இவை நாட்டின் முக்கியப் பிரச்சினைகள் குறித்து மத்திய அரசு கவனம் செலுத்த உதவுகின்றன.