திருவள்ளூர் மாவட்ட காட்டுப்பள்ளி துறைமுகத்தில் அமெரிக்க கப்பல் பழுது பார்ப்பு
திருவள்ளூர் மாவட்டம் காட்டூர் அருகே உள்ள காட்டுப்பள்ளி பகுதியில் தனியாருக்கு சொந்தமான கப்பல் கட்டும் தளம் மற்றும் துறைமுகம் இயங்கி வருகிறது. இப்பகுதியில் இந்திய கடற்படைக்கு தேவையான ரோந்து கப்பல்கள் கட்டுப்பட்டு வழங்கப்படுகிறது. மேலும் இதர கப்பல்கள் பழுதுபார்க்கும் மையம் ஒன்றும் இயங்கி வருகிறது என்று செய்திகள் தெரிவிக்கிறது. இந்நிலையில் கடந்த வருடம் ஆகஸ்ட் மாதம் அமெரிக்க கடற்படைக்கு சொந்தமான 'சார்லஸ்ட்ரூ' என்னும் ராணுவ கப்பல் ஒன்று இப்பகுதிக்கு வந்துள்ளது. பழுது மற்றும் அதன் பராமரிப்பு காரணமாக இந்த கப்பல் இங்கு கொண்டுவரப் பட்டது.
பழுது மற்றும் பராமரிப்பு பணிக்காக கொண்டுவரப்பட்ட ராணுவ கப்பல்
இதனையடுத்து. பராமரிப்பிற்காக முதன் முறையாக இந்த கப்பல் இந்தியாவிற்கு கொண்டுவரப்பட்டதால் 10 நாட்கள் தொடர்ந்து பழுது பார்க்கப்பட்டது. மற்ற இதர பராமரிப்பு பணிகளும் மேற்கொள்ளப்பட்டதையடுத்து அந்த கப்பல் அங்கிருந்து புறப்பட்டு சென்றது. இந்நிலையில் தற்போது 2வது முறையாக மீண்டுமொரு அமெரிக்க ராணுவ கப்பல் ஒன்று பழுது பார்க்கும் பணிக்காக கடந்த 11ம் தேதி காட்டுப்பள்ளி பகுதிக்கு கொண்டுவரப்பட்டுள்ளது. மேத்யூ பெர்ரி என்னும் இந்த கப்பலினை பழுது பார்க்கும் பணியில் துறைமுக தொழிலாளர்கள் ஈடுபட்டு வருகிறார்கள். இந்த பணிகள் வரும் 29ம் தேதி வரை நடைபெறும் என்று தெரிவிக்கப்பட்டுள்ளது. பழுது பார்த்து முடிக்கப்பட்ட பின்னர் இந்த கப்பலானது அங்கிருந்து புறப்பட்டு செல்லும் என்பது குறிப்பிடத்தக்கது.
