டெக் சிட்டியை டேங்கர் சிட்டியாக காங்கிரஸ் மாற்றியுள்ளது: பெங்களூரின் நிலைமை குறித்து பிரதமர் குற்றச்சாட்டு
செய்தி முன்னோட்டம்
பெங்களூரு தண்ணீர் நெருக்கடியால் கடந்த வாரம் வரை அவதிப்பட்டு வந்த நிலையில், இது குறித்து பிரதமர் மோடி கருத்து தெரிவித்துள்ளார்.
தண்ணீர் தட்டுப்பாடு காரணமாக பெங்களூரு மக்கள் டேங்கர்களுக்கு அருகில் வரிசையில் நிற்கும் காட்சிகள் கடந்த சில வாரங்களாக வைரலாகி வந்தன.
இந்நிலையில், பிரதமர் நரேந்திர மோடி கர்நாடகாவில் ஆளும் காங்கிரஸை கடுமையாக சாடியுள்ளார்.
இதற்கு பதிலடி கொடுக்கும் வகையில் பேசி இருக்கும் முதல்வர் சித்தராமையா , வெள்ளம் மற்றும் வறட்சியால் கர்நாடகம் பாதிக்கப்பட்டபோது பிரதமர் எங்கே இருந்தார் என்று கேள்வி எழுப்பியுள்ளார்.கர்நாடகாவில் உள்ள 28 மக்களவைத் தொகுதிகளுக்கும் ஏப்ரல் 26 மற்றும் மே 7 ஆகிய தேதிகளில் இரண்டு கட்டங்களாக வாக்குப்பதிவு நடைபெறுகிறது.
கர்நாடகா
"காங்கிரஸ் ஊழலில் மட்டுமே கவனம் செலுத்துகிறது": பிரதமர் மோடி
இந்நிலையில், வாக்குப்பதிவுக்கு சில நாட்களுக்கு முன்பு பெங்களூரு நகரத்தில் நடந்த பேரணியில் பேசிய பிரதமர் மோடி, நாட்டை முன்னோக்கி கொண்டு செல்ல விரும்புவதாகக் கூறினார்.
மேலும், காங்கிரஸ் "முதலீட்டுக்கு எதிரானது, தொழில்முனைவோருக்கு எதிரானது, தனியார் துறைக்கு எதிரானது, வரி செலுத்துபவர்களுக்கு எதிரானது, செல்வத்தை உருவாக்குபவர்களுக்கு எதிரானது" என்று பிரதமர் குற்றம் சாட்டினார். .
"டெக் சிட்டியை டேங்கர் சிட்டியாக மாற்றியுள்ளது காங்கிரஸ். விவசாயத்தில் இருந்து நகர்ப்புற உள்கட்டமைப்புக்கு பட்ஜெட் மாற்றப்பட்டுள்ளது. காங்கிரஸ் ஊழலில் மட்டுமே கவனம் செலுத்துகிறது. பெங்களூரு பிரச்சனைகளில் கவனம் செலுத்தவில்லை. மத்திய அரசின் திட்டங்கள் மட்டுமே வேகமாக முன்னேறி வருகின்றன." என்று அவர் கூறியுள்ளார்.