டிஜிட்டல் அரெஸ்ட் மோசடியில் சிக்காமல் தவிர்க்க என்ன செய்ய வேண்டும்? மான் கி பாத் உரையில் பிரதமர் மோடி அறிவுறுத்தல்
பிரதமர் நரேந்திர மோடி தனது மாதாந்திர வானொலி நிகழ்ச்சியான மான் கி பாத்தின் 115வது எபிசோடில், இன்று (அக்டோபர் 27) உரையாற்றினார். சமீப காலமாக இந்தியாவில் அதிகரித்து வரும் டிஜிட்டல் அரெஸ்ட் மோசடி வழக்குகள், குறிப்பாக டிராய், காவல்துறை, சுங்கத்துறை அல்லது ஆர்பிஐ அதிகாரிகளாக ஆள்மாறாட்டம் செய்து பொதுமக்களை ஏமாற்றும் கும்பல் குறித்து எச்சரித்தார். இதற்கு எதிராக மத்திய, மாநில அரசுகள் தொடர் நடவடிக்கை எடுத்து வந்தாலும், பலர் தொடர்ந்து இந்த மோசடி கும்பலுக்கு இலக்காகி வரும் நிலையில், இதுபோன்ற அழைப்புகளை எதிர்கொள்ளும் போது முதலில் பதற்றப்பபடக் கூடாது என மக்களுக்கு பிரதமர் மோடி அறிவுறுத்தினார். டிஜிட்டல் பாதுகாப்பை உறுதிப்படுத்த "நில், சிந்தி, செயல்படு" அணுகுமுறையை அவர் பரிந்துரைத்தார்.
வீடியோ அழைப்புகள் மூலம் விசாரணை கிடையாது
எந்த ஒரு உண்மையான புலனாய்வு நிறுவனமும் தொலைபேசி அல்லது வீடியோ அழைப்புகள் மூலம் விசாரணைகளைத் தொடர்புகொள்வதில்லை என்பதை பிரதமர் மோடி நினைவூட்டினார். இதைத் தவிர, இந்தியாவின் அடையாளங்களாக விளங்கும் சர்தார் வல்லபாய் படேல் மற்றும் பிர்சா முண்டா ஆகியோரின் 150வது பிறந்தநாளை முன்னிட்டு தேசிய அளவிலான கொண்டாட்டங்களை பிரதமர் அறிவித்தார். தேசிய ஒற்றுமைக்கு அவர்கள் ஆற்றிய பங்களிப்பை பாராட்டி, பிரதமர் மோடி, ஜார்க்கண்டில் முண்டாவின் பிறப்பிடமான உலிஹாட்டுக்கு தனது சமீபத்திய பயணத்தை நினைவு கூர்ந்தார். இந்தியாவின் வளர்ந்து வரும் அனிமேஷன் துறை குறித்தும் பேசிய பிரதமர் மோடி, உலக அனிமேஷன் தினம் நெருங்கி வரும் நிலையில், இந்தியாவை ஒரு அனிமேஷன் அதிகார மையமாக முன்னிறுத்துவதற்கான உறுதிமொழியை எடுக்குமாறு மக்களை வலியுறுத்தி உள்ளார்.
