திருவண்ணாமலை கிரிவலப்பாதை - குற்றப்பின்னணியுள்ள சாமியார்களை கண்டறியும் பணி
செய்தி முன்னோட்டம்
திருவண்ணாமலை மாவட்டத்தில் அமைந்துள்ள பிரசித்தி பெற்ற அண்ணாமலையார் கோயில் அமைந்துள்ளது. இங்கு பவுர்ணமி போன்ற விசேஷ நாட்களில் கிரிவலம் செல்ல பக்தர்கள் கூட்டம் அலைமோதும். இந்நிலையில் இங்கு அமைந்துள்ள கிரிவல பாதையிலும், ஆசிரமங்கள் உள்ள இடங்களிலும் ஏராளமான சாமியார்கள் நிரந்தரமாக தங்கியுள்ளனர். இவ்வாறு தங்கியுள்ள சாமியார்களுக்கு அங்குள்ள ஆசிரமங்கள், தன்னார்வலர்கள், ஆன்மீக அமைப்புகள் மூலம் அன்னதானம் அனுதினமும் வழங்கப்படுகிறது. அதேபோல் இவர்களது தேவைகள் அங்கு வரும் பக்தர்கள் மூலமும் பூர்த்தியடையும் பட்சத்தில் சாமியார்கள் இங்கு தங்க அதிக விருப்பம் கொள்கிறார்கள் என்று தெரிகிறது. இந்நிலையில், இங்குள்ள சில சாமியார்களுக்கு குற்ற பின்னணி இருக்கும் நிலையில், வெளியூரில் இருந்து வரும் சாமியார்கள் இடையே தொடர்ந்து சர்ச்சைகள் ஏற்படுகிறது என்று கூறப்படுகிறது.
சோதனை
ஒரே நாளில் 200க்கும் மேற்பட்டோரிடம் விசாரணை
அதேபோல் இங்குள்ள சில சாமியார்களுக்கு போதை பொருள் பழக்கம் இருப்பதால் கிரிவலம் செல்லும் பக்தர்களிடம் தகராறு செய்கிறார்கள் என்ற குற்றச்சாட்டும் எழுகிறது. இதனால் அங்கு தங்கியுள்ள சாமியார்களுக்கு முகவரி, புகைப்படம்,கைரேகை உள்ளிட்டவைகளை அடிப்படையாக கொண்டு ஏற்கனவே அடையாள அட்டை வழங்கப்பட்டுள்ளது என்றும் செய்திகள் தெரிவிக்கிறது. இதற்கிடையே தற்போது அவற்றை சரிபார்க்கும் பணியில் திருவண்ணாமலை மேற்கு காவல்துறை இன்ஸ்பெக்டர் ஆனந்தன், எஸ்ஐ.,சிவசங்கரன் ஆகியோர் ஈடுபட்டுள்ளனர். அதன்படி சாமியார்களின் ஆவணங்களை சரிபார்த்து அவர்கள் இங்கு தங்கியுள்ள காரணம்? எவ்வளவு நாட்கள் தங்கியுள்ளனர்?போன்ற கேள்விகளையும் கேட்டு வருகின்றனர் என்று தெரிகிறது. நேற்று(செப்.,2) ஒரே நாளில் மட்டும் 200க்கும் மேற்பட்டோரிடம் விசாரணை மேற்கொள்ளப்பட்டது குறிப்பிடத்தக்கது.