பத்மஸ்ரீ விருது 2026: ஓதுவார் திருத்தணி என்.சுவாமிநாதனின் 55 ஆண்டுகால தமிழ் இசைப் பயணம்
செய்தி முன்னோட்டம்
இந்தியாவின் மிக உயரிய குடிமை விருதுகளில் ஒன்றான பத்மஸ்ரீ விருதுக்குத் தேர்ந்தெடுக்கப்பட்டுள்ள தமிழகத்தைச் சேர்ந்த பிரபல பண் இசை கலைஞர் ஓதுவார் திருத்தணி என்.சுவாமிநாதன், வரும் மே 25 ஆம் தேதி புதுடெல்லியில் உள்ள குடியரசுத் தலைவர் மாளிகையில் நடைபெறும் பிரம்மாண்ட விழாவில் இந்தியக் குடியரசுத் தலைவரிடமிருந்து அதிகாரப்பூர்வமாக இந்த விருதைப் பெறுகிறார். தமிழ் பாரம்பரிய பண் இசை, திருமுறைத் திருப்பதிகங்கள் மற்றும் ஆன்மீகச் சொற்பொழிவுகளைப் பாதுகாத்து, அடுத்த தலைமுறைக்குக் கொண்டு சேர்த்த தங்களின் சிறந்த வாழ்நாள் சேவையைப் பாராட்டி இந்த உயரிய சிவிலியன் விருது அவருக்கு வழங்கப்படுகிறது.
55 ஆண்டுகால அசைக்க முடியாத கலைப் பயணம்
தருமபுர ஆதீனம் தேவார பாடசாலைத் தலைவர்
மத்திய அரசால் மக்களின் பத்ம (People's Padma) விருதுப் பட்டியலில் சேர்க்கப்பட்டுள்ள ஓதுவார் என்.சுவாமிநாதன், தற்பொழுது புகழ்பெற்ற தருமபுர ஆதீனத்தின் தேவார பாடசாலையின் தலைவராகப் பணியாற்றி வருகிறார். கலைத்துறையில் கிட்டத்தட்ட 55 ஆண்டுகளுக்கும் மேலான மிக நீண்ட அனுபவம் கொண்ட இவர், வானொலியின் ஏ கிரேடு தகுதி பெற்ற முன்னணி கலைஞர் ஆவார். தமிழ் பக்தி இசையையும், பன்னிரு திருமுறைப் பாடல்களையும் உலகெங்கிலும் உள்ள பல்வேறு நாடுகளுக்குக் கொண்டு சேர்த்த பெருமை இவருக்கு உண்டு. இதுவரை 100க்கும் மேற்பட்ட பக்திப் பாடல் ஆல்பங்களை இவர் வெளியிட்டுள்ளார்.
அடித்தட்டு மாணவர்களுக்கு இலவசப் பயிற்சி
அழியும் நிலையில் இருந்த வாய்மொழி மரபைக் காத்தவர்
ஓதுவார் சுவாமிநாதனின் மிக முக்கியமான சாதனை என்பது, அழிந்து வரும் நிலையில் இருந்த பாரம்பரிய வாய்மொழி இசை மரபுகளைக் காப்பாற்றியது தான். வெறும் மேடைகளில் பாடுவதோடு நின்றுவிடாமல், கிராமப்புற மற்றும் அடித்தட்டுப் பகுதிகளைச் சேர்ந்த நூற்றுக்கணக்கான மாணவர்களுக்குத் திருமுறை இசையை முற்றிலும் இலவசமாகக் கற்றுக் கொடுத்து வருகிறார். தலைமுறை தலைமுறையாக இந்த இசை வடிவம் தடையின்றித் தொடர வேண்டும் என்பதற்காகத் தங்களின் வாழ்நாளையே அர்ப்பணித்துள்ளார். இவரின் இந்தத் தூய்மையான சமூகத் தொண்டை அங்கீகரிக்கும் விதமாகவே இந்த ஆண்டுக்கான பத்மஸ்ரீ விருது இவருக்கு அறிவிக்கப்பட்டது.
#PeoplesPadma
#PeoplesPadma என்பது என்ன?
அடித்தட்டு சாதனையாளர்களுக்குப் பொது மற்றும் சுய பரிந்துரைகளை ஊக்குவிப்பதன் மூலம் பத்ம விருதுகளை மேலும் அனைவரையும் உள்ளடக்கியதாக மாற்றுவதற்காக, இந்திய அரசால் #PeoplesPadma அல்லது மக்கள் பத்ம முயற்சி தொடங்கப்பட்டது. இதன் மூலம், தேசிய அளவில் அறியப்பட்ட ஆளுமைகளுடன், அதிகம் அறியப்படாத நாயகர்களையும் அடித்தட்டுப் பங்களிப்பாளர்களையும் முன்னிலைப்படுத்துகிறது. இந்த விருதுகள், இனம், தொழில், பதவி அல்லது பாலினம் என்ற பாகுபாடின்றி, அனைத்துத் துறைகளிலும் உள்ள சிறப்புகளை அங்கீகரிக்கின்றன. வெளிச்சத்திற்கு வராமல், சமூகத்தில் தாக்கத்தை ஏற்படுத்திய தனிநபர்களைக் கௌரவிப்பதன் மூலம், பத்ம விருதுகளை 'PeoplesPadma'வாக மாற்றுவதே இதன் பரந்த நோக்கமாகும்.