திண்டுக்கல்லில் நர்சிங் மாணவி கல்லூரியின் 3ம் மாடியிலிருந்து குதித்து தற்கொலை முயற்சி
திண்டுக்கல் மாவட்டம் ஒட்டன்சத்திரம் அருகேயுள்ள கேதையறும்பு ஊராட்சிக்குட்பட்ட பழையபட்டியை சேர்ந்தவர் கன்னியப்பன், இவருடைய மகள் கார்த்திகா ஜோதி(19), ஒட்டன்சத்திரம் அருகேயுள்ள தனியார் கல்லூரி ஒன்றில் பிஎஸ்சி நர்சிங் முதலாம் ஆண்டு படித்து வருகிறார். கார்த்திகா ஜோதி அந்த கல்லூரியில் உள்ள விடுதியிலேயே தங்கி படித்துவந்துள்ளார் என்று கூறப்படுகிறது. இந்நிலையில் அவர் நேற்று(பிப்.,21) இரவு 9 மணியளவில் விடுதியின் மூன்றாம் மாடிக்கு சென்றுள்ளார். அங்கிருந்து அவர் திடீரென கீழேகுதித்து தற்கொலைக்கு முயற்சி செய்துள்ளார். படுகாயம் அடைந்து உயிருக்கு போராடி கொண்டிருந்த அவரை பார்த்து அதிர்ந்த சக மாணவிகள் விடுதி காப்பாளருக்கு தகவல் அளித்துள்ளார்கள். இதனையடுத்து அங்குவந்த விடுதி காப்பாளர் மற்றும் கல்லூரி ஊழியர்கள் கார்த்திகாவை மீட்டு அருகில் இருந்த தனியார் மருத்துவமனையில் சிகிச்சைக்காக அனுமதித்துள்ளார்கள்.
மாணவி தற்கொலை முயற்சி குறித்து தீவிர விசாரணை
அங்கு அவர் உயிருக்கு ஆபத்தான நிலையில் தீவிர சிகிச்சை பெற்றுவருகிறார் என்று தகவல்கள் தெரிவிக்கிறது. இதனை தொடர்ந்து சம்பவம் குறித்து அறிந்த ஒட்டன்சத்திரம் போலீசார் கல்லூரிக்கு நேரில் சென்று விசாரணை நடத்தினர். பின்னர் மாணவி அனுமதிக்கப்பட்டுள்ள மருத்துவமனைக்கு திண்டுக்கல் மாவட்ட போலீஸ் சூப்பிரண்ட் பாஸ்கரன், ஒட்டன்சத்திரம் மாஜிஸ்திரேட் செல்வி மகேஸ்வரி ஆகியோர் நேரில் சென்று விசாரணை நடத்தியதாக கூறப்படுகிறது. அதே போல் கல்லூரி முதல்வர், விடுதி காப்பாளர், மாணவியின் பெற்றோர், சக மாணவிகள் என அனைவரிடமும் காவல் துறை தீவிர விசாரணையினை மேற்கொண்டுள்ளது. இந்த சம்பவத்தால் அப்பகுதியில் பெரும் பரபரப்பு ஏற்பட்டது குறிப்பிடத்தக்கது.
