'எந்தவொரு ஊதியமும் தேவையில்லை' - நிபந்தனையிடும் ஓய்வுபெற்ற நீதிபதி கே.சந்துரு
நாங்குநேரி சம்பவத்தினை தொடர்ந்து, தமிழ்நாடு முழுவதுமுள்ள பள்ளி, கல்லூரி மாணவர்களிடையே சாதி, மதம் வேறுபாடுகள் ஏதுமின்றி இருக்கவும், இனக்கலவரம் ஏற்படுவதனை தடுக்கவும், நல்லிணக்கம் பேணும் வழிமுறைகளை வகுத்து தமிழக அரசுக்கு ஆலோசனை வழங்கவும் ஒரு நபர் ஆணையம் அமைக்கப்பட்டுள்ளது. இந்த ஆணையமானது ஓய்வுபெற்ற உயர்நீதிமன்ற நீதிபதி கே.சந்துரு தலைமையில் தமிழக அரசு அமைத்து உத்தரவு பிறப்பித்துள்ளது. இந்நிலையில் இவரிடம் செய்தியாளர்கள், 'நீங்கள் தலைமை வகிக்கும் எந்தவொரு ஆணையத்திற்கும் ஊதியம் ஏதும் தேவையில்லை என்று மறுப்பதாக கூறப்படுகிறேதே?" என்று கேள்வி எழுப்பியுள்ளனர். இதற்கு பதிலளித்த நீதிபதி கே.சந்துரு, "2013ம் ஆண்டு மார்ச் மாதம் உயர்நீதிமன்ற நீதிபதி பதவியிலிருந்து ஓய்வுப்பெற்றேன். அதன்பின்னர் இனி உயர்நீதிமன்றத்தில் வழக்கறிஞராக பணியாற்ற கூடாது என்னும் முடிவுக்கு வந்தேன்" என்று கூறினார்.
அனுபவம் வீணாகிவிட கூடாது என்பதற்காக நாளிதழ்களில் சட்ட விளக்கம் கொடுத்த நீதிபதி
தொடர்ந்து அவர், "ஆனால் 30 ஆண்டுகள் வழக்கறிஞராகவும், 7 ஆண்டுகள் நீதிபதியாகவும் இருந்ததன் அனுபவம் வீணாகிவிட கூடாது என்னும் நோக்கில் சில நாளிதழ்களில் தொடர்ந்து சட்ட விளக்கங்களை அளித்து வந்தேன்" என்றும் கூறியுள்ளார். அதனையடுத்து அவர், கடந்த 2016ம் ஆண்டில் குற்றவியல் நீதிமன்றங்களில் வழக்கறிஞர்கள் கட்ட பஞ்சாயத்து செய்வதாக எழுந்த குற்றச்சாட்டினையடுத்து சென்னை உயர் நீதிமன்றம் எனது தலைமையில் விசாரணை குழு அமைத்தது. அதற்கான அறிக்கையினை அந்தாண்டு நவம்பரில் கொடுத்தேன். அதற்கான எவ்வித ஊதியத்தொகையினையும் நான் பெறவில்லை என்று தெரிவித்தார்.
இன்ஷுரன்ஸ் கம்பெனி தொடர்பான வழக்கில் நீதிபதி வற்புறுத்தல் காரணமாக நிர்வாகத்தோகை பெற்ற நீதிபதி சந்துரு
இதனைத்தொடர்ந்து, இன்ஷுரன்ஸ் கம்பெனியிடம் வழக்கறிஞர்கள் மோசடி செய்து இழப்பீடு பெறுவதை தடுக்க ஒருநபர் ஆணையமாக கடந்த 2018ல் உயர்நீதிமன்றம் என்னை நியமித்தது. அதற்கான அறிக்கையினை 2019ல் கொடுத்தேன். இவ்வழக்கின் மூலம் இன்ஷுரன்ஸ் கம்பெனிகளுக்கு நல்ல லாபம் கிடைத்தது. அதனால் நீதிபதி வற்புறுத்தலின்பேரில், எனக்கான நிர்வாகத்தொகையினை மட்டும் பெற்றுக்கொண்டேன். அதனை தவிர்த்து வேறு எந்தவொரு அரசு பணிக்கும் ஊதியம் பெறக்கூடாது என்று முடிவுச்செய்து அதனை இன்றுவரை கடைபிடித்து வருகிறேன் என்றும் கூறியுள்ளார். மேலும், கடந்த அதிமுக ஆட்சியில் விவசாய மற்றும் தோட்டக்கலை தனியார் கல்லூரிகளில் படிக்கும் மாணவர்களுக்கான கட்டண விகிதம் நிர்ணயம் செய்ய என் தலைமையில் குழு அமைக்கப்பட்டது. 2020ல் இதற்கான அறிக்கையினை அரசிடம் தாக்கல் செய்தேன், எந்தவொரு கட்டணமும் பெறவில்லை என்றும் கூறினார்.
ஓய்வுபெற்ற நீதிபதி கே.சந்துருவை கண்டு ஆச்சரியமடைந்த தமிழக முதல்வர்
அதேபோல் தற்போதைய திமுக அரசு 2022ல் ஆன்லைன் ரம்மி தடை சட்டத்தினை கொண்டுவர எனது தலைமையில் ஆலோசனை குழு அமைத்தது. 2 வாரத்தில் அதற்கான அறிக்கையினை முதல்வரிடம் தாக்கல் செய்த நிலையில், எந்தவொரு சிறப்பு ஊதியமும் பெறவில்லை என்றும் தெரிவித்தார். மேலும் அவர், கடந்த 2023ம்ஆண்டு ஏப்ரலில் சிறார் அரசு இல்லங்களை ஒழுங்குபடுத்துவது, சீர்திருத்தங்களை பரிந்துரைப்பது உள்ளிட்டவைகளுக்காக அரசு என்னை நியமித்தது. இதற்கான அறிக்கையை இம்மாத இறுதியில் கொடுக்கவுள்ளேன். இதுபோன்ற பணிகளுக்கு ஊதியம் பெறாமல் பணியாற்றுவது ஆத்மத்திருப்தியினை அளிக்கிறது. தற்போது நாங்குநேரி சம்பவ எதிரொலியாக அரசு என்னை ஒரு நபர் ஆணையமாக நியமித்துள்ளது. இப்பணியையும் எந்தவொரு ஊதியமும் தேவையில்லை என்னும் நிபந்தனையிட்டு தான் ஒப்புக்கொண்டேன். முதல்வர் என்னை கண்டு ஆச்சரியப்பட்டார் என்று பேசியுள்ளார்.
ஊதியம் பெறாமல் பொதுசேவை செய்ய முன்வரவேண்டும் - கே.சந்துரு
இறுதியாக அவர் கூறுகையில், "நான் ஓய்வுபெற்ற பின்னர் அரசுடன் நான் செய்த பணிகளுக்கு ஊதியம் வாங்க நினைத்திருந்தால் மாதம் ரூ.2.5 லட்சம் வரை பெற்றிருக்க முடியும். ஆனால் எனக்கு அது தேவையில்லை. எனக்கு ஓய்வூதியம் வருகிறது. செல்லவேண்டிய இடங்களுக்கு வாடகை கார் அல்லது ஆட்டோ மூலம் செல்வேன். தூரம் என்றால் ரயிலில் பயணிப்பேன்" என்று கூறினார். தொடர்ந்து, "அரசிடம் ஊதியம் அல்லது செலவுக்கான தொகை ஏதும் பெறாமல் பொது சேவை செய்ய முடியும் என்பதனை நான் நிரூபித்துள்ளேன். என்னை போல் ஓய்வூதியம் பெறுவோர் இதுபோல் பொது சேவையாற்ற முன்வர வேண்டும் என்றும் விரும்புகிறேன்" என்று கூறியது குறிப்பிடத்தக்கது.
இந்த காலவரிசையைப் பகிரவும்