நீலகிரி வரையாடு திட்டம் - இன்று துவக்கி வைக்கிறார் முதல்வர் மு.க.ஸ்டாலின்
செய்தி முன்னோட்டம்
அழிந்து வரும் உயிரினமாக, இயற்கை பாதுகாப்புக்கான பன்னாட்டு ஒன்றியத்தால் வகைப்படுத்தப்பட்டுள்ளது தமிழ்நாடு விலங்கான நீலகிரி வரையாடு.
இதன் காரணமாக இந்த இனத்தினை பாதுகாக்கவும், அதன் இருப்பிடத்தினை மேம்படுத்தவும் தமிழக அரசு ஓர் திட்டத்தினை அறிவித்து அரசாணை பிறப்பித்துள்ளது.
அதன்படி, நாட்டிலேயே முதன்முறையாக ரூ.25.14 கோடி மதிப்பிலான நீலகிரி வரையாடு திட்டம் செயல்படுத்தப்படவுள்ளது என்று அறிவிப்புகள் வெளியானது.
இந்த திட்டத்தின் படி, ஆண்டுக்கு 2 முறை ஒருங்கிணைந்த கணக்கெடுப்பு, நோய்களை கண்டறிந்து சிகிச்சையளித்தல், டெலிமெட்ரிக் ரேடியோ காலரிங் பொருத்தி வரையாட்டினை பாதுகாத்தல் போன்ற நடவடிக்கைகள் மேற்கொள்ளப்படும் என்று கூறப்பட்டுள்ளது.
திட்டம்
'நீலகிரி வரையாடு திட்டம்' தலைமை செயலகத்தில் துவக்கி வைக்கப்படுகிறது
மேலும் இந்த திட்டத்தின்படி, ஒவ்வொரு ஆண்டும் அக்டோபர்.,7ம் தேதி 'வரையாடு தினம்' என்று அனுசரிக்கப்பட்டு, மக்கள் மத்தியில் விழிப்புணர்வினை ஏற்படுத்துதலுக்கான ஏற்பாடுகளும் செய்யப்படும் என்றும் அரசாணையில் குறிப்பிடப்பட்டுள்ளது.
இந்நிலையில், சென்னை தலைமை செயலகத்தில் இன்று(அக்.,12) வனத்துறை சார்பில் நடக்கும் நிகழ்ச்சியில் தமிழக முதல்வர் மு.க.ஸ்டாலின் இந்த வரையாடு திட்டத்தினை துவக்கி வைக்கவுள்ளார் என்று செய்திகள் வெளியாகியுள்ளது.
இதனிடையே மு.க.ஸ்டாலின் தனது சமூகவலைத்தள பக்கத்தில், 'டாக்டர்.ஈ.ஆர்.சி. டேவிதாருக்கு மரியாதை செலுத்தும் விதமாக ஒவ்வொரு ஆண்டும் அக்.,7ம் தேதி நீலகிரி வரையாடு தினமாக அர்பணிக்கிறோம்' என்று பதிவு செய்துள்ளார்.
டாக்டர்.ஈ.ஆர்.சி. டேவிதார் 1975ம் ஆண்டே நீலகிரி வரையாடு குறித்த ஆய்வினை மேற்கொண்ட முன்னோடி என்பது குறிப்பிடத்தக்கது.