அமெரிக்காவிற்கு ஏற்றுமதியாகும் நீரா பானம்
செய்தி முன்னோட்டம்
தமிழகத்தில் திருப்பூர் மாவட்டத்தினை தலைமையிடமாக கொண்டு உலக தென்னை உழவர் உற்பத்தி நிறுவனம் நடத்தப்பட்டு வருகிறது.
இந்த நிறுவனத்தின் பணி என்னவென்றால் 1200க்கும் மேற்பட்ட விவசாயிகளை பங்குதாரராக கொண்டு தென்னை மரங்களில் இருந்து நீரா பானத்தினை உற்பத்தி செய்து அதனை மக்களிடம் கொண்டு சேர்ப்பதே ஆகும்.
சென்னை, கோவை, திருப்பூர் உள்ளிட்ட முக்கிய நகரங்களில் மட்டுமே விற்பனை செய்யப்படும் இந்த நீரா பானம், பல்வேறு வைட்டமின்கள், இரும்பு மற்றும் தாதுக்கள் நிறைந்ததாகும்.
இது இ-காமர்ஸ் முறையிலும் விற்பனை செய்யப்டுகிறது.
இந்நிலையில் நீரா பானத்தை அமெரிக்காவிற்கு ஏற்றுமதி செய்யும் வாய்ப்பு ஒன்று கிடைத்துள்ளதாக தகவல்கள் தெரிவிக்கிறது.
நிர்வாக இயக்குனர் பாலசுப்ரமணியம்
தென்னை விவசாயிகளின் வாழ்வாதாரம் மேலோங்கும்
இதுகுறித்து நிர்வாக இயக்குனர் பாலசுப்ரமணியம், அமெரிக்காவில் உள்ள தமிழகத்தை சேர்ந்த கதிர்குருசாமி என்பவர் மூலம் ரீஜெண்ட் நார்த் அமெரிக்க நிறுவனம் நீரா பானத்திற்கான ஆர்டரினை கொடுத்துள்ளது என்று தெரிவித்துள்ளார்.
இதனால் தற்போது தினசரி 5000 பாக்கெட்டுகள் உற்பத்தி செய்யும் நிலையில், அதனை உயர்த்தி இனி 20,000 ஆயிரம் பாக்கெட்டுகளாக தயாரிக்க திட்டமிடப்பட்டுள்ளது.
அதன்படி ரூ.30 லட்சம் மதிப்புள்ள நீரா பானம் அமெரிக்காவிற்கு கண்டைனர் மூலம் ஏற்றுமதி செய்யப்படவுள்ளது.
இதன் ஆண்டு விற்பனை ரூ .25 கோடி ரூபாயை எட்டுவதற்கான இலக்கும் நிர்ணயிக்கப்பட்டுள்ளது.
வரும் நாட்களில் நீரா பானத்தினை 5 கண்டைனர்களில் அனுப்ப திட்டமிடப்பட்டுள்ளது.
இதன் விற்பனை அதிகரித்தால் தென்னை விவசாயிகளின் வாழ்வாதாரமும் மேலோங்கும் என்று அவர் கூறியுள்ளார்.