மும்பை கனமழை எதிரொலி: பள்ளிகளுக்கு விடுமுறை, விமானச் சேவைகள் பாதிப்பு; தொடரும் ரெட் அலர்ட்
செய்தி முன்னோட்டம்
மும்பை மற்றும் அதன் சுற்றுவட்டார பகுதிகளில் கடந்த சில தினங்களாக பெய்து வரும் அதிதீவிர கனமழை காரணமாக மக்கள் வாழ்க்கை முடங்கியுள்ளது. நகரின் பல்வேறு இடங்களில் கடுமையான வெள்ளப்பெருக்கு, மரங்கள் முறிந்து விழுதல், கட்டிட விபத்து மற்றும் மின்சாரம் தாக்கியதில் பல உயிரிழப்புகள் நேரிட்டுள்ளதால் ஒட்டுமொத்த நிர்வாகமும் தற்பொழுது உச்சகட்ட உஷார் நிலையில் வைக்கப்பட்டுள்ளது. ஞாயிற்றுக்கிழமை இரவு குடியிருப்பு ஒன்றின் ஒரு பகுதி திடீரென இடிந்து விழுந்ததில், இடிபாடுகளுக்குள் சிக்கி பெண்கள் உட்பட 6 பேர் பரிதாபமாக உயிரிழந்தனர். இதுதவிர, குர்லா மற்றும் கோரேகான் பகுதிகளில் பலத்த காற்றினால் மரங்கள் முறிந்து விழுந்ததில் இருவர் பலியாகியுள்ளனர். கடந்த ஒரே வாரத்தில் மட்டும் தேங்கி நின்ற மழைநீரில் மின்சாரம் தாக்கி, 6 பேர் உயிரிழந்துள்ளனர்.
விடுமுறை
பள்ளிகள் மற்றும் கல்லூரிகளுக்கு விடுமுறை
மும்பையில் 24 மணி நேரத்தில் 300 மில்லி மீட்டருக்கும் அதிகமான மழை பதிவாகியுள்ளதால், மாணவர்களின் பாதுகாப்பை கருத்தில் கொண்டு மும்பை மாநகராட்சி (BMC) இன்று அனைத்து அரசு மற்றும் தனியார் பள்ளிகள், கல்லூரிகளுக்கு விடுமுறை அறிவித்துள்ளது. இதேபோல் தானே, புனே மற்றும் நவி மும்பை ஆகிய அண்டை மாவட்டங்களிலும் கல்வி நிறுவனங்களுக்கு விடுமுறை அளிக்கப்பட்டுள்ளது. அத்தியாவசிய தேவைகளின்றி பொதுமக்கள் யாரும் வீட்டை விட்டு வெளியே வர வேண்டாம் என மேயர் ரிது தாவ்டே கேட்டுக்கொண்டுள்ளார்.
விமான சேவை
விமான சேவைகள் முடக்கம்
பலத்த காற்று மற்றும் மோசமான பார்வைத் திறன் காரணமாக சத்ரபதி சிவாஜி மகாராஜ் சர்வதேச விமான நிலையத்தில் ஓடுதள பணிகள் தற்காலிகமாக நிறுத்தப்பட்டன. இதனால் சுமார் 13-க்கும் மேற்பட்ட விமானங்கள் அருகிலுள்ள பிற நகரங்களுக்கு திருப்பி விடப்பட்டன மற்றும் 90 சதவீதத்திற்கும் அதிகமான விமானங்கள் 75 நிமிடங்கள் வரை தாமதமாக இயக்கப்பட்டன. இந்திய வானிலை ஆய்வு மையம் மும்பை, தானே மற்றும் பால்கர் ஆகிய மாவட்டங்களுக்குத் தொடர்ந்து ஆரஞ்சு மற்றும் ரெட் அலர்ட் எச்சரிக்கை விடுத்துள்ளதால், கடலோரப் பகுதிகள் மற்றும் தாழ்வான பகுதிகளில் வசிக்கும் மக்கள் பாதுகாப்பான இடங்களுக்கு மாற அறிவுறுத்தப்பட்டுள்ளனர்.